Ungebila ku Bakwa Kingolu-ngolu
Kikuma kya mutwadisi wa mikunga. Mukunga wa Tavidi.
Lombilu lwa kiphala kyayilama: bayakala bana benina yi ndikila ya nyoka muna malebu ma bawu, bana bisi kosikila mvita kilumbu kyosu amana bisi sya bisinza ha kabeta ka nzila. Tavidi kisi lomba kwena Tata wandi muswa wa kukeba mu kilumbu kya mvita, amana kisi ditsikisa ni Tata wetu kazéngila mukanu wa batu ba phasi.
140 1Umphúlula, A Tata wama, mu batu ba mbi; ungebila mboti-mboti ku bakwa kingolu-ngolu, 2bana bisi kasa kifwandu kya mbi muna mbundu za bawu, amana bisi kosikila mvita kilumbu kyosu. 3Bisi zengisa ndinga za bawu hanga nyoka; ndikila ya masawa yenina muna malebu ma bawu.
4Ungebila, A Tata wama, mu moku ma batu ba mbi; ungebila mboti-mboti ku bakwa kingolu-ngolu, bana bisi kasa kifwandu kya kunsumuna. 5Bakwa lulendu bánswekila mutambu; báyala misinga mya wanda; hana kabeta ka nzila básya bisinza kikuma kya meni.
6Yázimbula kwena Tata wama: «Ngeyi wenina Tata wama.» Yuka ndinga ya kubokwadila kwama kwa kyadi. 7A Pfumu Tata, ngolu za luhulusu lwama, ngeyi wákebila mutwa wama mu kilumbu kya mvita. 8Wuhanaku, A Tata wama, tsatu za batu ba mbi; kuyambulaku kifwandu kya bawu kyálunga, hanga bavumbukaku.
9Mu mitwa mya bana bisi nzinga meni, yambula kiwayi kya malebu ma bawu meni kibafukidila. 10Makala ma mbawu mabwa hana thandu ya bawu; balósawa ku mbawu, muna mabulu ma nteke, konda kuvumbuka hika. 11Ka mangusi mosi ku kakala ha tsi; yambula mambu ma mbi malandila mukwa kingolu-ngolu, khubu hana thandu ya khubu.
12Nzayi ni Tata wetu kazéngila mukanu wa batu ba phasi, amana kahána masonga kwena batu ba mupfunu. 13Kyedika, batu ba masonga bakavútula matondu mu khumbu yaku; batu basungama bakazíngila ku thwala yaku.
