Thaoli Hachāng Kathi
Kateo khikha eina kachungkha sāmangshapa da hāngkhavai chānsambing: namkaphā tara̱li kathi yangkhai, sakorli kaka̱ raobing kala phei eina kazat wungnaobing, a khalatta tui eina shimān ngasaka makathema mi akha. Ning khamathānna khamungawui malungkhavāt tangmangasaka; shimwui kasangthing khakhong kala pamkhavai yāngli ningmayāng eina kahāng tui akha—khanikhawui kateo eina hokzanga.
10 1Hachāng kathina manam kaphā thao chi nganamshi ngasakta kapchung ngasaka; chithāda mangkhama̱ kateokhana thangkhamei kala khayākakāli reimei. 2Thangkhama miwui ning china awui yashongli lei, kha mangkhama̱ miwui ning china awui uishongli lei. 3Mangkhama̱na shongfali zatmamānlakha, awui ning mazangmana, kala a mangkhama̱na da mi saikorali theimi. 4Khamungawui malungkhavāt nali langkarthuiakha, nawui otpam machihohaialu, kaja ningzinghāringda khayon kahaibing ngalanthui ngasaka.
5Khamungawui eina kharā khalāng kathā makaphā ot akha okathuili ina theihaira: 6Mangkhama̱li kajuipam kachungkhali hamserhaira, kha kashāngabing china maishi pamli pama. 7Ina raonaobing sigui tongda theihaira, kala wungnaobing china rao thāda pheina zata. 8Chom kachuiana chili tāzangra, kala phākho kaphuiana phara̱na makeira. 9Lunggui harkhuia mina chibingna khamā za̱khuira, kala thing katekapana chibingwui vang ka̱lā shiki jihaora. 10Ngahā makharāla awui aphei makharāhaila leiakha, yāng kachungkha singkhuira; kha thangkhameina samphang ngasakra.
11Phara̱li char macharrangsi ana makeiakha, charfawui tongkazā maleimana. 12Thangkhama miwui tuina ngahānkhangai samphang ngasaka, kha mangkhama̱ miwui morchaina ali chuitāhaora. 13Awui tuiwui haokaphok china mangkhama̱na, kala awui tuiwui naolak china makhayā kapāna. 14Chithālala mangkhama̱na tui matuisera. Khi rārā chi khipākhana matheimana, kala awui thili khi shoknikhala chi khipāna mili hāngshapra?
15Mangkhama̱bing china athumwui otna athum khalattali vān ngasaka, kaja athumna keinung vāki shongfa tangdala matheimana. 16O ngalei, nawui awunga chi nao ngasāhaiakha, kala nawui wungnaobing china ngathor zātkhān sāakha, kakhanang nawui ngasāranu. 17O ngalei, nawui awunga chi khangaiwui naomayara ngasāhaiakha, kala nawui wungnaobing china khamaripwui vang maningla yāngwui vang retkahai atamli zātkhān sāakha, na sokhamina. 18Chāngshewui vang eina khanji matekra, kala pāng ngachāng makakāwui vang eina shimli tara̱ rāshungra. 19Kashakazā chi khamana̱wui vangna sākahaina, kala drakhāra̱na mirinli mathān ngasaka, kala lupāna ot saikorali ngahānkāra. 20Nawui ningli eina tangda awungali makhonshialu, kala nawui petkāli eina tangda kashāngali makhonshialu, kaja khamasaiwui vānao akhana nawui tui phungra, kala angachāng kakā yur akhana nawui hāngkahai chi unghāngra.
