Oniwaasu 10

10 ¹Eṣinṣin òkú ń mú kí òróró olùṣe tùràrí rùn, kí ó sì kan; bẹ́ẹ̀ ni ìwà òmùgọ̀ díẹ̀ ṣe wúwo ju ọgbọ́n àti ọlá lọ. ²Ọkàn ọlọ́gbọ́n ń fà sí ọwọ́ ọ̀tún rẹ̀, ṣùgbọ́n ọkàn òmùgọ̀ sí ọwọ́ òsì rẹ̀. ³Àní nígbà tí òmùgọ̀ bá ń rìn ní ọ̀nà, òye kù fún un, ó sì ń fi hàn fún gbogbo ènìyàn pé òmùgọ̀ ni òun. ⁴Bí ìbínú alákòóso bá ru sí ọ, má ṣe fi ipò rẹ sílẹ̀, nítorí ìwà pẹ̀lẹ́ ń mú kí àwọn ẹ̀ṣẹ̀ ńlá sinmi.

⁵Búburú kan wà tí mo ti rí lábẹ́ oòrùn, irú àṣìṣe tí ń ti ọ̀dọ̀ alákòóso wá: ⁶A gbé òmùgọ̀ ga sí ọ̀pọ̀lọpọ̀ ipò gíga, nígbà tí àwọn ọlọ́rọ̀ jókòó ní ipò rírẹ̀lẹ̀. ⁷Mo ti rí àwọn ẹrú lórí ẹṣin, àti àwọn ọmọ-ọba tí ń fi ẹsẹ̀ rìn bí ẹrú. ⁸Ẹnikẹ́ni tí ó bá gbẹ́ kòtò lè ṣubú sínú rẹ̀, ẹnikẹ́ni tí ó bá sì wó ògiri lulẹ̀, ejò lè bù ú jẹ. ⁹Ẹnikẹ́ni tí ó bá ń gbẹ́ òkúta lè fara pa nípasẹ̀ wọn, ẹnikẹ́ni tí ó bá sì ń là igi, ó wà nínú ewu láti ọwọ́ wọn. ¹⁰Bí àáké bá kù, tí a kò sì pọ́n ẹnu rẹ̀, ìwọ yóò lo agbára púpọ̀ sí i; ṣùgbọ́n ọgbọ́n ń mú àṣeyọrí wá.

¹¹Bí ejò bá bù ni jẹ kí a tó pè é, kò sí èrè kankan fún ẹni tí ń pe ejò. ¹²Ọ̀rọ̀ ọlọ́gbọ́n ń mú ojúrere wá fún un, ṣùgbọ́n ètè òmùgọ̀ ń pa á run. ¹³Ìbẹ̀rẹ̀ ọ̀rọ̀ rẹ̀ jẹ́ ìwà òmùgọ̀, òpin ọ̀rọ̀ rẹ̀ sì jẹ́ ìsínwín búburú. ¹⁴Síbẹ̀, òmùgọ̀ ń bá ọ̀rọ̀ sísọ lọ. Kò sí ẹni tí ó mọ ohun tí ń bọ̀, ta ni ó sì lè sọ fún ẹnikẹ́ni ohun tí yóò ṣẹlẹ̀ lẹ́yìn rẹ̀?

¹⁵Iṣẹ́ àwọn òmùgọ̀ ń dá wọn lágara, nítorí wọn kò tilẹ̀ mọ ọ̀nà tí ó lọ sí ìlú. ¹⁶Ègbé ni fún ọ, ilẹ̀, nígbà tí ọba rẹ bá jẹ́ ọmọdé, tí àwọn ọmọ-ọba rẹ sì ń ṣe àsè ní òwúrọ̀. ¹⁷Ìbùkún ni fún ọ, ilẹ̀, nígbà tí ọba rẹ bá jẹ́ ọmọ àwọn ọlọ́lá, tí àwọn ọmọ-ọba rẹ sì ń ṣe àsè ní àkókò tí ó yẹ—fún agbára, kì í ṣe fún ọtí àmupara. ¹⁸Nípa ọ̀lẹ, àjà ilé ń rẹ̀ sílẹ̀, nípa ọwọ́ tí kò ṣiṣẹ́ sì ni ilé ń jò. ¹⁹A ṣe oúnjẹ fún ẹ̀rín, wáìnì sì ń mú ayọ̀ wá sí ìyè, owó sì ń dá ohun gbogbo lóhùn. ²⁰Má ṣe ré ọba, àní nínú èrò inú rẹ, má sì ṣe ré ọlọ́rọ̀, àní nínú yàrá ìbùsùn rẹ, nítorí ẹyẹ ojú ọ̀run lè gbé ọ̀rọ̀ rẹ lọ, ẹ̀dá tí ó ní ìyẹ́ apá sì lè ròyìn ohun tí o sọ.