Tara̱li Kashakazā
Nawui kashakazā tara̱li horsanglu kala nawui ngasā mi kachungkhali ngayeimilu, kaja khi kashuirak rāra kaji nana matheimana. Masi yangkhai mina khikha mawutmara. Ngathorli kala zingkāli wutlu, kahorli ringphālu, rākhavai kazingkha̱ zimikshobing phaningunglu, kala nganuilakhawui vang Varena bichar sāra da theilu.
11 1Nawui kashakazā tara̱li horsanglu, kaja zimiksho kachungkha kāshunghaiwui thili nana chi latluida phāra. 2Shinili yar khamilu, lah chishatli khamilu, kaja ngaleitungli khi kalākashi shokrakhala kaji nana matheimana. 3Muiyā pemtingakha, chibingna okathuitungli zingrot rotāmira; kala thingrong akha azingshongli lah atungshong tārorakha, chi tāror pam chili, apam chili chi leira. 4Masi kayanga china khipākha mayaolakmara, kala muiyā kayanga china khipākha mahātkhuilakmara.
5Masiwui shongfa nana matheila thāda, lah nao khavai sha̱naowui naopamli ara̱kui khi eina sākhuikhala kaji matheila thāda, chithāda saikora sākahai Varewui otsak nana matheirarmana.
6Ngathor nawui athā yaolu, kala ngazin eina napāngli ngasāmkakhui makhamialu, kaja hi lah chi, khikha ungshungrakhala, lah khani ngarumda kaphā sārakhala kaji nana matheimana.
Kahor Shima
7Kahor shima, kala mikna zimik theikhavai chi ngayama.
8Chieina mi akhana zingkum kachungkha okthuiakha, chi saikorali a china ringphāranu; kha a china tangkhamang zimiksho chi phaningungranu, kaja kachungkhara. Rārā saikora hi aremana.
9Ringphālu, he yaronnao, nawui nganuilakha, kala nawui nganuilakha zimiksholi naningna nali mathān khamiranu. Naning shongfali kala namik theili zatlu; kha saikora hiwui vang Varena nali bichar sāra da theilu.
10Chieina naning eina wukakhanang khuithuiulu, kala naphasā eina kachot khuimihaolu, kaja nganuilakha kala mirinwui kazing kathang chi aremana.
