Mapha Hana Thandu ya Mamba
Losa mapha maku hana thandu ya mamba amana kabula ndambu yaku kwena bawombo, mukuma wuzayiku disa dina dyakwísa. Wuna wisi tala pfunzi kakúnaku. Kuna mu suka yi mu masika, sephila mwini, bamba bilumbu bya phipha bina bikwísa, amana zaya ni Nzambi kabati nata kingunza mu mukanu.
11 1Losa mapha maku hana thandu ya mamba, mukuma kunima dya bilumbu bya lawu wawána mawu hika. 2Hana ndambu kwena tsambwadi, keti kwena nana phi, mukuma wuzayiku disa dina dyakwísa hana thandu ya tsi. 3Yuka ni matuti mazedini, masi lubula mvula hana thandu ya tsi; amana yuka ni miti wabwa ku banda ho ku londi, muna kifulu kina wabwíla, kwakuna wasala. 4Wuna wisi tala pfunzi kakúnaku, amana wuna wisi simbulula matuti kahélaku.
5Bwosu wuzayiku nzila ya pfunzi, keti bwosu mifufwa misi hangama muna vumu wa mukhetu wenina ku vumu, bwabuna wufwaniku kuzaya mudimu wa Nzambi, yandi wuna wisi hanga bima byosu.
6Kuna mbutu yaku muna suka, amana ha masikidika kuhanaku koku kwaku kilembwadi, mukuma wuzayiku yina yakwenda bwambote—keti yayi ho yina—ho keti byodi byosu byakala bwambote phila mosi.
Mwini Wenina Tuluu
7Mwini wenina tuluu, amana dyenina dyamboti kwena mesu mu kumona tangwa.
8Buna yuka ni mutu wazínga mvula za lawu, kasangwala muna zawu zoosu; kaasi kabamba bilumbu bya phipha, mukuma byakála bya lawu. Bima byosu bina bikwísa byenina bya phamba.
9Sangwala, ngunza, muna kingunza kyaku, amana mbundu yaku yakuhana kyesi muna bilumbu bya kingunza kyaku. Kangala muna nzila za mbundu yaku yi muna mamona mesu maku; kaasi zaya ni kikuma kya mambu mana moosu Nzambi kakunata mu pfundusu.
10Buna senda kyadi muna mbundu yaku, amana katula phasi muna lutu lwaku, mukuma kingunza yi luyandiku lwa luzingu byenina bya phamba.
