መክብብ 11 FHB Father's Heart Bible™

11 ¹ነንጀራኻ ኣብ ልዕሊ ማያት ደርብያ፥ ድሕሪ ብዙሕ መዓልቲ ኽትረኽባ ኢኻ እሞ። ²ንሸውዓተ ግደ ሃብ፥ ወይ ንሸሞንተ'ውን፥ እንታይ ጥፍኣት ኣብ ምድሪ ኸም ዝመፅእ ኣይትፈልጥን ኢኻ እሞ። ³እቲ ደመና እንተ መሊኡ፥ ኣብ ምድሪ ዝናም የፍስስ፤ ኦም ከዓ ናብ ደቡብ ወይ ናብ ሰሜን እንተ ወደቐት፥ ኣብቲ ዝወደቐትሉ ቦታ፥ ኣብኡ ትተርፍ። ⁴እቲ ንፋስ ዝዕዘብ ከቶ ኣይዘርእን እዩ፤ እቲ ደመና ዘስተብህል ከዓ ከቶ ኣይዓፅድን እዩ።

⁵ከምቲ መንገዲ ንፋስ ዘይትፈልጥ፥ ወይ ኣብ ማህፀን ዝጠነሰት ሰበይቲ ኣዕፅምቲ ኸመይ ኢሎም ከም ዝፍጠሩ ዘይትፈልጥ፥ ከምኡ ድማ ተግባር እቲ ዅሉ ዝገብር እግዚኣብሄር ክትፈልጥ ኣይትኽእልን።

⁶ዘርእኻ ንጊሓት ዝራእ፥ ምሸት ድማ ኢድካ ኣየተዕርፍ፤ ኣየናይ ከም ዝሰልጥ፥ እዙይ ወይ እቲ፥ ወይ ክልቲኡ ማዕረ ፅቡቕ ከም ዝኸውን ኣይትፈልጥን ኢኻ እሞ።

ብርሃን ጥዑም እዩ

⁷ብርሃን ጥዑም እዩ፥ ነዒንቲ ፀሓይ ምርኣይ ድማ ባህ ዘብል እዩ።

⁸ሰብ ብዙሕ ዓመታት እንተ ነበረ፥ ብዅሉ ይተሓጐስ፤ ግና ነቲ መዓልቲታት ፀልማት ይዘክር፥ ብዙሕ ክኸውን እዩ እሞ። ዝመፅእ ኵሉ ጊዜያዊ እዩ።

⁹ኣታ መንእሰይ፥ ብንእስነትካ ተሓጐስ፥ ልብኻ ድማ ብመዓልቲታት ንእስነትካ ደስታ ይሃብካ። ብመንገድታት ልብኻን ብራእይ ኣዒንትኻ ኪድ፤ ግና ስለ እዝ ዅሉ እዙይ እግዚኣብሄር ናብ ፍርዲ ኸም ዘምፅኣካ ፍለጥ።

¹⁰ስለዙይ ጭንቀት ካብ ልብኻ ኣርሕቕ፥ ስቓይ ድማ ካብ ስጋኻ ኣርሕቕ፤ ንእስነትን ጎሕ ህይወትን ጊዜያዊ እዩ እሞ።