Nkate pa Madzi
Tumiza pao pako pa madzi, mbugawa gawo yako kuna anthu azinji, thangwi iwe nkhabe dziwa ntsoka inafika. Ule anayang'ana mphepo nkhabe kubzala. Bzala macibese na madzulo, komerwa na ceza, kumbuka nsiku za mdima zinadza, pontho dziwa kuti Mulungu anadzatonga uphale.
11 1Ponya nkate wako pa madzi, thangwi pakupita ntsiku zizinji unadzaugumana pontho. 2Pereka khundu kuna anomwe, peno kuna asere, thangwi nkhabe kudziwa nyatwa inafuna kugwera pa dziko. 3Makole mangadzala, asagwisa mvula pa dziko; na muti ungagwa cakumwera peno cakubangwe, pa mbuto pene unagwa, penepo unadzakhala. 4Ule anayang'anira mphepo nkhabe kudzabzwala, na ule anadinga makole nkhabe kudzabvuna.
5Ninga iwe nkhabe kudziwa njira ya mphepo, peno kuti magogodo asawangwa tani n'mimba mwa nkazi wa pathupi, tenepo nkhabe kudzakwanisa kudziwa basa ya Mulungu, ule anacita pinthu pyonsene.
6Bzwala mbeu yako namacibese, na namadzulo leka kupumisa djanja yako, thangwi nkhabe kudziwa inadzaphindula ndi iyi peno iya—peno khala pyonsene piwiri pinadzacita mwadidi.
Ceza Ndi Cakutapira
7Ceza ndi cakutapira, pontho ndi cakukomeresa kuna maso kuona dzuwa.
8Natenepo munthu angakhala na pyaka pizinji, mbakomerwe mu pyonsene; mbwenye mbakumbuke ntsiku za cidima, thangwi zinadzakhala zizinji. Pyonsene pinabwera ndi pyapezi.
9Komerwa, mphale, mu uphale wako, ntima wako ukupase kutsandzaya mu ntsiku za uphale wako. Famba mu njira za ntima wako na mu pyakuona pya maso ako; mbwenye dziwa kuti thangwi ya pinthu pyonsene ipi Mulungu anadzakutonga.
10Natenepo bulusa kuipirwa mu ntima wako, pontho bulusa kuwawa mu manungo mwako, thangwi uphale na kutoma kwa umaso ndi pyapezi.
