Ecclesiastes 11

11 ¹Ipaanod ang imong tinapay sa ibabaw sa katubigan, kay human sa daghang mga adlaw makaplagan mo kini pag-usab. ²Paghatag ug bahin ngadto sa pito, o bisan ngadto sa walo, kay wala ka masayod kon unsang katalagman ang moabot sa yuta. ³Kon mapuno ang mga panganod, ibubo nila ang ulan sa yuta; ug kon mahulog ang usa ka kahoy paingon sa habagatan o paingon sa amihanan, sa dapit diin kini mahulog, didto kini mohigda. ⁴Si bisan kinsa nga magtan-aw sa hangin dili gayod makapugas, ug si bisan kinsa nga magtuki sa mga panganod dili gayod makaani.

⁵Maingon nga wala ka masayod sa agianan sa hangin, o kon giunsa pagporma ang mga bukog sa tagoangkan sa usa ka mabdos nga babaye, mao usab nga dili ka makasabot sa buhat sa Dios, nga maoy nagbuhat sa tanan.

⁶Ipugas ang imong binhi sa buntag, ug sa gabii ayaw papahulaya ang imong kamot, kay wala ka masayod kon hain ang molampos—kini o kana—o kon ang duha ba molampos nga managsama.

Tam-is ang Kahayag

⁷Tam-is ang kahayag, ug makapahimuot sa mga mata nga makita ang adlaw.

⁸Busa kon ang usa ka tawo mabuhi sa daghang katuigan, pasagdi siya nga magmaya niining tanan; apan pahinumdomi siya sa mga adlaw sa kangitngit, kay daghan kini. Ang tanan nga moabot lumalabay lamang.

⁹Pagmaya, batan-ong lalaki, sa imong pagkabatan-on, ug tugoti ang imong kasingkasing nga maghatag kanimo ug kalipay sa mga adlaw sa imong pagkabatan-on. Lakaw sa mga dalan sa imong kasingkasing ug sa panan-aw sa imong mga mata; apan hibaloi nga tungod niining tanan nga mga butang dad-on ka sa Dios ngadto sa paghukom.

¹⁰Busa papahawaa ang kayugot gikan sa imong kasingkasing, ug isalikway ang kasakit gikan sa imong lawas, kay ang pagkabatan-on ug ang kaadlawon sa kinabuhi lumalabay lamang.