سولار اوستونده چؤرک
چؤره‌یئنی سولار اوستونه آت و پایینی چوخلارا بؤل، چونکی نه بلانین گلدئیئنی بئله بئلمزسن. یلی گؤزله‌ین هچ واخت توخوم سَپمز. سحر و آخشام سَپ، نوردان لذّت آل، قاباقدا اولان قارانلیق گونلری یادا سال و بئل کی، تاری جاوانلیغی محکمه‌یه چکر.
11 1چؤره‌یئنی سولار اوستونه آت، چونکی چوخ گونلردن سونرا اونو گئنه تاپاجاقسان. 2یدّی نفره بئر پای ور، حتّا سکّئز نفره ده، چونکی بئلمئرسن یِر اوزونه نه بلا گله بئلر. 3اگر بولودلار دولو اولسا، یاغیشی یِر اوزونه تؤکرلر؛ و اگر بئر آغاج جنوبا یا شئمالا دوشسه، دوشدویو یرده، اورادا قالار. 4یلی گؤزله‌ین هچ واخت توخوم سَپمز، و بولودلاری آراشدیران هچ واخت بئچمز.
5نجه کی یلئن یولونو، یا بویلو آروادین بطنئنده سوموکلرئن نجه یارانماغینی بئلمئرسن، اله‌جه ده هر شیی یارادان تارینین ائشئنی بئله بئلمزسن.
6توخومونو سحر سَپ، و آخشام اَلئنی دئنج قویما، چونکی بئلمئرسن هانسی اوغور تاپاجاق—بو یا او—یا هر ائکئسی برابر یاخشی اولاجاق.
نور شئرئندئر
7نور شئرئندئر، و گونو گؤرمک گؤزلر اوچون خوشدور.
8اگر بئر آدام چوخ ائللر یاشاسا، قوی هامیسیندا سِوئنسئن؛ آمّا قوی قارانلیق گونلرئنی یادا سالسین، چونکی اونلار چوخ اولاجاق. گلن هر شی کچئجی‌دئر.
9ای جاوان اوغلان، جاوانلیغیندا سوئن، و قوی اوره‌یئن جاوانلیغین گونلرئنده سنه شادلیق ورسئن. اوره‌یئن یوللاریندا و گؤزلرئن گؤردویونده گز؛ آمّا بئل کی، بوتون بو شیلره گؤره تاری سنی محکمه‌یه چکه‌جک.
10اوره‌یئندن قمی آت، و دردی بدنئندن گؤتور، چونکی جاوانلیق و حیاتین سحری کچئجی‌دئر.
