2 Wungnaobing 23

23 ¹Kala awungana chihovāda, athumna Judah kala Jerusalemwui akhokabing saikora awuili kazipkhuiya. ²Awungana Judah saikora kala Jerusalemli khalei mi saikora, pāngmonbing, marānbing, kala kateo kharei mi saikora ngasoda ithumwui Avāwui shimli shanhaowa. Athumwui mangāli ana ithumwui Avāwui shimli samphangkahai tuingashit lairikwui tui saikora pāhaowa. ³Awungana pākra̱ ngalemli nganingda, ali shurda, awui wuklung saikora kala amanglā saikora eina awui ningkhami, tamkachithei, kala ain mayonda, hi lairikli kapihaikasā tuingashitwui tui chi ungshung ngasak khavai, ithumwui Avāwui mangāli tuingashit akha sāhaowa. Kala mi saikora tuingashit chili ngarumsak.

⁴Awungana pāngmon kharei Hilkiah, pāngmon kakhanebing, kala khāmong khamayonbingli ithumwui Avāwui khorumshimwui eina Baal, Asherah, kala kazingramli khalei ashangva̱ saikorawui vang sākahai ot saikora khuithui khavai kasoi. Ana chili Jerusalemwui ayarli Kidron luipambingli riktāhaowa, kala athumwui hotla Bethelli khuivāhaowa. ⁵Ana Judahwui awungabingna Judahwui keinungbingwui kajujuipam kala Jerusalem kuikhamareili khalei nganamkaphā riktā khavai pangkhui kahai meoma̱li khokharuma pāngmonbing chi khuithuihaowa; kala Baal, zimik, kachāng, sirāyur, kala kazingramli khalei ashangva̱ saikorali nganamkaphā riktābingla khuithuihaowa. ⁶Ana Asherah tarung chi ithumwui Avāwui shimwui eina Jerusalemwui ayarli Kidron tampākli khuishoklaga riktāhaowa; kala achui-arui sāda chifa ngasaklaga achifa chi mikumobingwui chikhurtungli phanserhaowa. ⁷Ana ithumwui Avāwui shimli khalei khayora mayarnaobingwui shim chi sākhaitāhaowa, chili preinaobingna Asherahwui vang chonrān yeksangahaisai. ⁸Ana Judahwui keinungbingwui eina pāngmonbing saikora khuirāhaowa, kala Geba eina thuilaga Beer-sheba peida, pāngmonbingna nganamkaphā riktā kahai kajujuipambing chi makathar ngasakhaowa. Kala keinung ngaveiwui uishong, keinungwui akhavā Joshuawui ngavei zangkhavaili khalei kajujuipambing chila sākhaitāhaowa. ⁹Chithālala kajujuipamwui pāngmonbing china Jerusalemli khalei ithumwui Avāwui hanphuttungli mashanmana, kha athumwui achinā pāngmonbingwui ngachaili khawok makazang khamui shaisai. ¹⁰Mi khipānakha awui naomayara lah anaongalāva̱li Molechli meilungli mahorsang khavai, ana Hinnomwui naomayarawui tampākli khalei Topheth chi makathar ngasakhaowa. ¹¹Ana ithumwui Avāwui shim zangkhavaili, kayāngli khalei akhavā Nathan-Melechwui shimpho ngalemli Judahwui awungabingna zimikli dharkat kahai sigui chi khuithuihaowa. Kala ana zimikwui charfa chi mei eina riktāhaowa. ¹²Judahwui awungabingna Ahazwui kā atowui shimtungli sākahai hanphutbing, kala Manassehna ithumwui Avāwui shimwui kayāng khanili sākahai hanphutbing chi awungana sākhaitāhaowa; ana chipam chili sakhaimiserhaida athumwui chifa chi Kidron tampākli ahorserhaowa. ¹³Israelwui awunga Solomonna Sidonnaobingwui ningkakachaiya Ashtorethwui vang, Moabwui ningkakachaiya Chemoshwui vang, kala Ammonnaobingwui ningkakachaiya Milcomwui vang Jerusalemwui zingshoshong, Shimānwui Kaphungwui azingshong sākahai kajujuipambing chi awungana makathar ngasakhaowa. ^a a v13 Shimānwui Kaphung hi Olive Kaphungwui azingshong kaphungtungna, kaja chili Solomonna yur khangateiwui varebingli khorumshim sākahaiwui vang hi aming makaphā hi phokmi. ¹⁴Ana lungshombing chi sākhaimiserhaowa, Asherim sātekmiserhaowa, kala athumwui apambing chi miwui ara̱-arā eina pemtinghaowa.

¹⁵Israelli morei sākhangasak Nebatwui nao Jeroboamna Bethelli sākahai hanphut kala kajujuipam eina tangda ana sākhaitāhaowa; kajujuipam chi riktālaga achui-arui sāda chifa ngasakhaowa, kala Asherah tarung chila riktāhaowa. ¹⁶Josiahna ngareithuida kaphungpheili khalei chikhurbing chi theilaga, ana mibing chihovāda ara̱-arā chi khuishokta hanphuttungli riktāda chi makhao ngasakhaowa. Chithāda Varewui mina hibing rida hāngkahai atamli hāshok kahai ithumwui Avāwui tui chi ungshunghaowa. ¹⁷Ana ngahāna, "Ina theikahai hi khiwui wonrākhala?" Keinungwui mibingna hānga, "Judahwui eina kharā, kala nana sākahai otbing chi Bethelwui hanphutli vaoshok kahai Varewui miwui chikhurna."

¹⁸"Aningkhānlu," da hānga. "Khipākhana awui ara̱-arā maphuralu." Chieina athumna awui ara̱-arā chi aningkhānda, Samariawui eina rāsai marānwui ara̱-arā zangserda pama. ¹⁹Josiahna Israelwui awungabingna ithumwui Avāli malungvāt ngasak khavai Samariawui keinungbingli sākhui kahai kaphung kajujuili kameoshim saikora horhaida khuithuiserhaowa; Bethelli awui kasā tākam eina anala athumli sai. ²⁰Ana chi kaphung kajujuiwui pāngmonbing saikora hanphutbingtungli taithatlaga, chitungli miwui ara̱-arā riktāda, Jerusalemli latunga.

Josiahna Makānkhami Phanit Hankhuiluishitmi

²¹Chiwui thili awungana mi saikorali kasoda hānga, "Hi tuingashit lairikli kapihaida lei athishurda, nathumwui Avāli Makānkhami Phanit mayonlu." ²²Israelli bichar sābingwui atam eina thuida, kala Israelwui kala Judahwui awungabingwui atam saikorali, chikathā Makānkhami Phanit khipākha mayonhaimana. ²³Kha Awunga Josiahna mungda tharāda kachishata kum, hi Makānkhami Phanit chi Jerusalemli ithumwui Avāli mayona.

²⁴Pāngmon Hilkiahna ithumwui Avā shimli phākasā lairikli kapihai ainwui tuibing chi ungshung khavai, Josiahna sha̱ khangasobing, mitrangbing, shimwui varebing, meoma̱bing, kala Judah eina Jerusalemli theikahai ningkakachai ot saikora horhaida khuithuiserhaowa. ²⁵Josiahwui maningla awui thilila, awui ning saikora, awui manglā saikora, kala awui yāng saikora eina, Moseswui ain saikora shurda eina, ithumwui Avāshong ngareiung kahai awunga a mathāli khipākha maleimana. ²⁶Chithālala, Manassehna ithumwui Avāli malungvāt ngasak khavai kasā saikorawui vang eina, ana Judahwuitungli awui malungkhavāt reikhamatai, kashun kala kachui kahaiwui eina mangareithuimana.

²⁷Kaja ithumwui Avāna hānga, "Ina Israelli khuithui kahai tākam eina, Judahlila iwui mangā eina khuithuira, kala ina kapangkhui Jerusalem keinung hi, kala iwui ming chili leira da ina kahāng shim chi ningkachaira."

²⁸Josiahwui kasāsā ot khavābing, kala awui sākahai ot saikora Judahwui awungabingwui Thotrinchān Lairiktungli makapihaimala? ²⁹Awui atamli Egyptwui Pharaoh Necona Euphratesli Assyriawui awungali ngachon khavai vākāhaowa. Awunga Josiahna ali samphang khavai vai, kha Necona ali theilaga Megiddoli sāthathaowa. ³⁰Awui raobingna awui phasā chi charfali Megiddowui eina Jerusalemli khuiungmida, awui khalattawui chikhurli chifaya. Chiwui thili ngalei chiwui mibingna Josiahwui naomayara Jehoahazli khuida, ali neomida, awui mahut awunga sanghaowa.

Jehoahazna Mungphoka kala Tukthuihaowa

³¹Jehoahazna awunga sākaphok tharan zingkum maga̱da kathum kāhairasai, kala kachāng kathum Jerusalemli munga. Ava̱va̱wui aming Hamutal hoi, Libnahwui eina khalei Jeremiahwui nao ngalāva̱na. ³²Kala awui avā ngarāna kasā tākam eina, anala ithumwui Avā mangāli makhayā otmāng sai. ³³Pharaoh Necona ali Jerusalemli mamungpaimara da, Hamath ngaleiwui Riblahli chaiyāng, kala ngalei chitungli lupāsā kg. thingmati kala sinā kg. thumrāda mati po khavai shai khui. ³⁴Pharaoh Necona Josiahwui naomayara Eliakimli awui mahut awunga sangda, aming ngacheida Jehoiakim phokmi. Kala ana Jehoahazli Egyptli khuivai, kala chili a thihaowa. ³⁵Jehoiakimna Pharaohli sinā eina lupāsā mi, kha Pharaohwui kapo mayara khavai ana ngalei chili shai khui. Pharaoh Necoli mikhavai, ana ngalei chiwui mibingwui eina mi kachiva̱li ashi athishurda sinā eina lupāsā ngashaikhui.

Jehoiakimna Judahli Munga

³⁶Jehoiakimna mungkaphok tharan a zingkum maga̱da phangā kāshunghairasai, kala ana Jerusalemli zingkum tharāda akha munga. Ava̱va̱li Zebidah hoi, Rumahli khalei Pedaiahwui naongalāva̱na. ³⁷Avāva̱ ngarāna kasā thāda ana ithumwui Avāwui mangāli makaphā ot chi sai.