2 Wungnaobing 22

22 ¹Josiahna mungkaphok tharan a zingkum maga̱ kāshunghairasai, kala ana Jerusalemli zingkum thumrāda akha munga. Ava̱wui ming Jedidah, Bozkathwui Adaiahwui naongalāva̱na. ²Ana ithumwui Avāwui mangāli khamashung sāda, avā Davidwui shongfa saikorali zatta, uishong lah yāshong mangareithuimana.

³Ana mungda tharāda kachishat kumli awunga Josiahna Meshullamwui naomayara Azaliahwui naomayara kapime Shaphanli ithumwui Avāwui shimli chihovāda hānga, ⁴Pāngmon kharei Hilkiahli vālaga, ithumwui Avāwui shimli khuiung kahai, khāmong khamayonbingna miwui eina khuirā kahai pheisā chi ana shānkhuiranu. ⁵Chi ithumwui Avāwui shimli ot chiwuitungli akhavā kapangkahaibingli mihaolu, kala athumna ithumwui Avāwui shim chipho kasā ot kasābingli miranu, ⁶thing mistribing, shim kasābing kala ngalung mistribingli miranu; kala shim chipho khavai thing kala ngalung kashao lokhavai pheisāla miranu. ⁷Athumli horsangmi kahai pheisāwui pongli khipānakha makazikazāmana, kaja athumna ningtonglak eina sai.

Ain Lairik Chi Theihaira

⁸Pāngmon kharei Hilkiahna kapime Shaphanli hānga, "Ina ithumwui Avāwui shimli ain lairik chi samphanga." Kala ana chi Shaphanli mihaida Shaphanna pā. ⁹Kapime Shaphanna awungali hānga, "Nawui raobingna khorumshimli samphang kahai pheisā chi heishokta, ithumwui Avāwui shimli ot kasābing kala akhavā kapangkahaibingli mihaira." ¹⁰Kapime Shaphanna awungali hānga, "Pāngmon Hilkiahna ili lairik akhalui akha mi," kala ana chi awungawui mangāli pāchithei.

¹¹Awungana ain lairikwui tui chi kashā tharan, ana awui kachon serkhāka. ¹²Awungana pāngmon Hilkiah, Shaphanwui naomayara Ahikam, Micaiahwui naomayara Achbor, Shaphan kapime, kala awungawui rao Asaiah china, athumli kasoi, ¹³"Vāda, iwui vang, mibingwui vang, kala Judah saikorawui vang, hi samphang kahai lairikwui tuiwui pongli ithumwui Avāli ngahānlu. Kaja ithumwuitungli ithumwui Avāwui malungkhavāt hakmeida leihaira, khikhalajila ithumwui avāngarāna lairik hiwui tui chi kahāng manganāla, ithumwui pongli kapihaida lei saikora masāmana."

¹⁴Chiwui vang pāngmon kharei Hilkiah, Ahikam, Achbor, Shaphan, kala Asaiah china Harhaswui nao Tikvahwui nao kashankachon kasinga Shallumwui preiva̱ marānpava̱ Huldahwuili vai (ana Jerusalemwui shim kakhane chili pamsai); kala ali tui saikora ahāngsera.

¹⁵Ana athumli hānga, "Ithumwui Avā, Israelwui Varena hithāda hānga: Nathumli iwuili chihovā kahai mipāli hānglu, ¹⁶ithumwui Avāna hithāda hānga: Yanglu, Judahwui awungana lairikli pā kahai tui saikora athishurda ina hi pam kala chiwuili khalei mibingtungli kalākashi khuivāra. ¹⁷Khikhalajila athumna ili horhailaga, vare khangateibingli nganamkaphā riktāda, athumwui pāngsak saikora eina ili malungvāt ngasakhaira, iwui malungkhavāt hi pamli chuira, kala mangalanmara.

¹⁸Avāli ngahān khavai nathumli kachiho Judahwui awungali unghānglu, ithumwui Avā, Israelwui Varena hithāda hānga: hi tuibing nana shākahaiwui pongli,

¹⁹khikhalajila nawui ningkhangateiwui vang, kala ina ngalei hili kala hiwui mibingli athum shimānchao kala khonkashi ngasāra da makhamayā hāngkahai chi kashā eina Avāwui mangāli nana hamkasang, kala kachon serkhaklaga iwui mangāli kachapwui vang, inala shāmihaira da Avāna hānga. ²⁰Chiwui vang eina, ina nali navā ngarāli kazipkhuira; nana chingrili nawui chikhurli zangra, kala hi pamli ina khuirā kalākashi saikora chi namik eina matheimara." Chieina athumna awui ngahānkā tui chi awungali unghānga.