2ይ ነገስት 22 FHB Father's Heart Bible™

22 ¹ኢዮስያስ ንጉስ ምስ ኮነ ወዲ ሸሞንተ ዓመት ነበረ፤ ኣብ ኢየሩሳሌም ድማ ሰላሳን ሓደን ዓመት ነገሰ። እኖኡ ኸዓ ካብ ቦፅቃት ዝኾነት የዲዳ ጓል ዓዳያ እያ። ²ኣብ ቅድሚ ኣቦና ድማ ቅኑዕ ገበረ፤ ብዅሉ መንገዲ ዳዊት ኣቦኡ እናኸደ፥ ንየማን ኮነ ንፀጋም ኣየግለሰን።

³ኣብ መበል ዓሰርተ ሸሞንተ ዓመቱ ድማ፥ ንጉስ ኢዮስያስ ነቲ ፀሓፊ ሻፋን ወዲ ኣፃልያ ወዲ መሹላም ናብ ቤት ኣቦና ልኢኹ ከምዙይ በሎ፦ ⁴ናብ ሊቀ ካህናት ሒልቅያስ ደይብ፤ ነቲ ኣብ ቤት ኣቦና ዝኣተወ ገንዘብ፥ ነቲ ሓለውቲ ኣፍደገ ካብ ህዝቢ ዝኣከብዎ ድማ ይቝፀሮ። ⁵ነቶም ኣብ ቤት ኣቦና ኣብ ልዕሊ እቲ ስራሕ ዝተመደቡ ሓለፍቲ ሃቦም፤ ንሳቶም ከዓ ነቶም ኣብ ቤት ኣቦና ዝተበላሸወ ዘዐርዩ ሰራሕተኛታት ይኽፈልዎም። ⁶ፀረብትን ነደቕትን ወቐርቲ እምንን፥ ነታ ቤት ንምዕራይ ዝኸውን ኣእዋምን ዝተፀርበ እምንን ንምግዛእ እዩ። ⁷ብእምነት ይሰርሑ ስለ ዝነበሩ፥ ካብቲ ኣብ ኢዶም ዝተውሃቦም ገንዘብ ሕሳብ ኣይሕተቱን ነበሩ።

መፅሓፍ ሕጊ ተረኽበ

⁸ሊቀ ካህናት ሒልቅያስ ድማ ነቲ ፀሓፊ ሻፋን “ኣብ ቤት ኣቦና መፅሓፍ ሕጊ ረኺበ ኣለኹ” በሎ። ነቲ መፅሓፍ ድማ ንሻፋን ሃቦ፤ ንሱ ኸዓ ኣንበቦ። ⁹ፀሓፊ ሻፋን ድማ ንንጉስ “ባሮትካ ነቲ ኣብ ቤተ መቕደስ ዝተረኽበ ገንዘብ ኣፍሲሶም፥ ነቶም ኣብ ቤት ኣቦና ዘለዉ ሰራሕተኛታትን ሓለፍትን ሃብዎም” ኢሉ ነገሮ። ¹⁰ፀሓፊ ሻፋን ድማ ንንጉስ “ካህን ሒልቅያስ መፅሓፍ ሃበኒ” ኢሉ ነገሮ፤ ኣብ ቅድሚኡ ኸዓ ኣንበቦ።

¹¹እቲ ንጉስ ድማ ቃላት መፅሓፍ ሕጊ ምስ ሰምዐ፥ ክዳውንቱ ቐደደ። ¹²እቲ ንጉስ ድማ ንካህን ሒልቅያስን፥ ንኣሒቃም ወዲ ሻፋንን፥ ንኣክቦር ወዲ ሚካያስን፥ ንፀሓፊ ሻፋንን፥ ንኣሳያስ ባርያ ንጉስን ከምዙይ ኢሉ ኣዘዞም፦ ¹³“ኪዱ፥ ብዛዕባ ቃላት እዝ ዝተረኽበ መፅሓፍ እዙይ፥ ንኣይን ንህዝብን ንብዘሎ ይሁዳን ኢልኩም ንኣቦና ጠይቑ። ኣቦታትና ነቲ ብዛዕባና ዝተፅሓፈ ዅሉ ብምግባር ንቃላት እዝ መፅሓፍ እዙይ ኣይተኣዘዝዎን እሞ፥ እቲ ኣብ ልዕሌና ዝነድድ ዘሎ ቍጥዓ ኣቦና ዓብዪ እዩ።”

¹⁴ካህን ሒልቅያስን ኣሒቃምን ኣክቦርን ሻፋንን ኣሳያስን ድማ ናብ እታ ነቢዪት ሑልዳ፥ ሰበይቲ ሻሉም ወዲ ቲቅዋ ወዲ ሃርሓስ ሓላዊ ክዳውንቲ፥ ኣብ መበል ካልኣይ ክፍሊ ኢየሩሳሌም እትነብር ዝነበረት ከዱ፤ ተዛረብዋ ኸዓ።

¹⁵ንሳ ድማ “ኣቦና ኣምላኽ እስራኤል ከምዙይ ይብል ኣሎ፦ ነቲ ናባይ ዝለኣኸኩም ሰብኣይ ንገርዎ፦ ¹⁶ኣቦና ከምዙይ ይብል ኣሎ፦ እንሆ፥ ኣነ ኣብዝ ቦታ እዙይን ኣብ ተቐማጦኡን፥ ነቲ ንጉስ ይሁዳ ኣብ መፅሓፍ ዘንበቦ ዅሉ ቓላት፥ መዓት ከምፅእ እየ። ¹⁷ንኣይ ሓዲጎም ንኻልኦት ኣማልኽቲ ዕጣን ስለ ዘዕጠኑ፥ ብዅሉ ግብሪ ኣእዳዎም ከዓ ስለ ዘቘጥዑኒ፥ ቍጥዓይ ኣብዝ ቦታ እዙይ ክነድድ እዩ፤ ኣይጠፍእን ከዓ።

¹⁸ነቲ ናብ ኣቦ ንምጥያቕ ዝለኣኸኩም ንጉስ ይሁዳ ድማ ከምዙይ በልዎ፦ ብዛዕባ እቲ ዝሰማዕኹምዎ ቃላት፥ ኣቦና ኣምላኽ እስራኤል ከምዙይ ይብል ኣሎ፦

¹⁹ነቲ ኣብ ልዕሊ እዝ ቦታ እዙይን ኣብ ልዕሊ ተቐማጦኡን ዝተዛረብክዎ—ዑናን መርገምን ክኾኑ ምዃኖም—ምስ ሰማዕኻ፥ ልብኻ ስለ ዝለሰለሰን ኣብ ቅድሚ ኣቦ ርእስኻ ስለ ዘትሓትካን፥ ክዳውንትኻ ስለ ዝቐደድካን ኣብ ቅድመይ ድማ ስለ ዝበኸኻን፥ ኣነ ኸዓ ሰሚዐካ ኣለኹ ይብል ኣቦ። ²⁰ስለዙይ ናብ ኣቦታትካ ክእክበካ እየ፤ ናብ መቓብርካ ድማ ብሰላም ክትእከብ ኢኻ፤ ነቲ ኣብዝ ቦታ እዙይ ዘምፅኦ ዅሉ መዓት ከዓ ኣዒንትኻ ኣይክርእይኦን እየን።” ሽዑ ነቲ መልሲ ናብ ንጉስ መለሱሉ።