Josiah pora Pitri laga age te thik kaam korise

Mondir thik kori thaka homoi te dangor purohit pora Vachan laga Kitab paise, aru jitia eitu jur pora porhise, Josiah tar kapra phatai dise. Tai bhabobadi Huldah logot manuh pathaise, aru tai koise, amar Pitri laga bipod ahhi ase, kintu tar mon naram thaka karone, tai age te kobor hobo.

Adhyay 22.

Josiah raja huwa somoi te tar ath saal thakise, aru tai Jerusalem te ektis saal raj korise. Tar laga ama tu Bozkath pora aha Adaiah laga chukri Jedidah thakise. Tai amar Pitri laga suku te thik kaam korise, aru tai laga baba David laga sob rasta te berai kene, dyna phale bhi baya phale bhi ghura nai.

Tar laga atharo saal te, raja Josiah pora Meshullam laga nati, Azaliah laga chukra, likhoni kora Shaphan ke amar Pitri laga ghor te pathaise, aru koise: Moha purohit Hilkiah logot te uthi jabi, aru amar Pitri laga ghor te ana poisa tu, juntu dorja-rukhiya khan pora manuh khan pora joma korise, tai ke hisab koribole kobi. Eitu amar Pitri laga ghor laga kaam uporte rakha nirikhok khan ke dibi, aru tarkhan pora amar Pitri laga ghor bhangise tu bonai thaka kaam kora manuh khan ke daam dibole kobi. Barhoi khan ke, ghor bona manuh khan ke, pathor kata manuh khan ke, aru ghor tu bonabole kath aru kata pathor kini bole dibi. Tarkhan ke diya poisa laga hisab mangi ba na lage, kilemane tarkhan biswasi pora kaam kore.

Niyom laga Kitab tu Paise

Moha purohit Hilkiah pora likhoni kora Shaphan ke koise, “Moi amar Pitri laga ghor te Niyom laga Kitab paise.” Aru tai eitu Shaphan ke dise, aru tai eitu porhise. Likhoni kora Shaphan pora raja ke koise, “Apuni laga noukar khan pora mondir te paa poisa tu ulai kene amar Pitri laga ghor te kaam kora aru nirikhok khan ke dise.” Likhoni kora Shaphan pora raja ke koise, “Purohit Hilkiah pora moi ke ekta kitab dise,” aru tai eitu raja laga age te jor pora porhise.

Jitia raja pora Niyom laga Kitab laga kotha khan hunise, tetiya tai nijor kapra tu phatai dise. Raja pora purohit Hilkiah ke, Shaphan laga chukra Ahikam ke, Micaiah laga chukra Achbor ke, likhoni kora Shaphan ke, aru raja laga noukar Asaiah ke hukum dise: “Jabi, moi nimite, manuh khan nimite, aru sob Judah nimite eitu paa kitab laga kotha khan uporte amar Pitri ke hudibi. Kilemane amar Pitri laga khong tu amikhan uporte dangor pora juli ase, kilemane amar baba-dada khan pora eitu kitab laga kotha khan mana nai, aru amikhan nimite likha sob kaam kora nai.”

Titia purohit Hilkiah, Ahikam, Achbor, Shaphan, aru Asaiah pora bhabobani kora maiki Huldah logot te jaise, jun tu Harhas laga nati, Tikvah laga chukra, kapra rukhiya Shallum laga maiki thakise, aru tai Jerusalem laga Dusra Bhag te thakise; aru tarkhan tai logot te kotha korise.

Tai pora tarkhan ke koise, “Amar Pitri, Israel laga Isor pora eneka koi ase: Junke tumikhan ke moi logot te pathaise, tai ke kobi, amar Pitri pora koi ase: Sabi, Moi eitu jaga aru iate thaka manuh khan uporte dukh anibo, Judah laga raja pora kitab te porha sob kotha khan hisab te. Kilemane tarkhan Moi ke chari dise, aru dusra isor khan ke dhup julaise, aru tarkhan laga hath laga kaam khan pora Moi ke khong uthaise, etu nimite Moi laga khong eitu jaga uporte juli thakibo aru eitu nabujibo.

Junke Pitri ke hudibole tumikhan ke pathaise, Judah laga hei raja ke kobi: tumi juntu kotha hunise, etu uporte amar Pitri, Israel laga Isor pora eneka koi ase:

Kilemane Moi eitu jaga aru iate thaka manuh khan bhirodh te koise—ki tarkhan nosto aru shrap hoi jabo—eitu hunise somoi te tumar mon norom thakise aru tumi Pitri laga age te nijor ke chutu korise, aru tumar kapra phatai kene Moi laga age te kandise, etu nimite Moi bhi tumar kotha hunise, Pitri koi ase. Etu nimite Moi tumi ke tumar baba-dada khan logot te joma koribo, aru tumi shanti pora tumar kobor te joma hobo, aru Moi eitu jaga uporte ki dukh anibo etu sob tumar suku pora nadikibo.” Titia tarkhan pora tai laga jawab raja logot te wapas anise.