2 Wungnaobing 21

21 ¹Manassehna mungkaphok tharan a zingkum tharāda khani kāshunghairasai, kala Jerusalemli zingkum hangphangāda phangā munga. Ava̱va̱ chi Hephzibahna. ²Israelwui mibingwui miktāli ana kashamshokhai yurbingwui ningkakachai otsak chi zathaoda, Manassehna ithumwui Avāwui mangāli makhayā otmāng sai. ³Awui avā Hezekiahna sākhaimihaira kajujuiwui apambing chi ana sakāluishita, Baalli hanphut sakai, kala Israelwui awunga Ahabna sāhai athishurda Asherah akha sākhui, kala kazingramwui ashangva̱ saikorali khorumda otram ngatha̱ya.

⁴Ana ithumwui Avā shimli hanphut sakai, chi shimwui pongli ana hānga, "Jerusalemli iwui ming haira."

⁵Ithumwui Avā shimwui yāngkhup khanili kazingramwui ashangva̱ saikorawui vang hanphut sakai. ⁶Ana awui naomayarali meili chigata, khanongla sai, laivāla sai, kala kazei kazang sākatheibing kala manglā sākatheibingli ngasana. Ithumwui Avāwui mikyanli makhayā ot kachungkha sāda ali malungvāt ngasaka.

⁷Ana sākhui rukkakhui Asherah ama̱ chi, ithumwui Avāna David kala awui naomayara Solomonli hānghai shimli sakai: "Hi shimli kala Israelwui shang saikorawui eina ina kapangkhui Jerusalemli, katang makhavai iwui ming haira. ⁸Ina athumli kaso kahai saikora chi ning ngasharda nganāda, iwui rao Mosesna athumli khamihai ain saikora chi mayonakha, Israelwui phei chi avā ngarāli ina khamihai ngalei chiwui eina latluida zat khangasak masāluimara."

⁹Kha athumna manganāmana; Manassehna athumli ma̱zat ngasakta, ithumwui Avāna Israelwui mibingwui miktāli sāshimānhaira yurbingna sākahai chili mataimeikharda makhayā ot sāngasaka.

¹⁰Chieina ithumwui Avāna awui rao marānbing eina hānga:

¹¹"Judahwui awunga Manassehna hi ningkakachai otbing sāda, awui mangāli leikasā Amorbing saikorali zakshimeikharda, kala awui meoma̱ eina Judahli morei sākhangasakwui vang, ¹²chieina ithumwui Avā, Israelwui Varena hithāda hānga: Yanglu, ina Jerusalem kala Judahwuitungli kalākashi khuihaora, chi kashā mi kachiva̱na awui khanā khanili khonkazar shāra.

¹³"Jerusalemwuitungli ina Samariawui khara̱ kala Ahabwui shimkhurwui urum khānmira; mi akhana khok mithailaga akui ngareiung athishurda ina Jerusalemli mithara. ¹⁴Iwui shimluiwui akhamor kateibing chi ina horhaora, athumli athumwui yangkashebingwui pāngli horsangmira, kala athum athumwui yangkashe saikorawui vang sāshai kala ngapon ngasāra, ¹⁵khikhalajila athumwui avā ngarāna Egyptwui eina shokkahai thang eina aja zimiksho eina tangda, athumna iwui mangāli makhayā ot sāda ili malungvāt ngasaka."

¹⁶Manassehna Judahli ithumwui Avāwui mangāli makhayā ot sāda morei sākhangasakwui morei chi hailaga, ana khayon makhalei ashee kachungkha tākhangasaka Jerusalem chi khare eina akhamorli pemngasaka.

¹⁷Manassehwui otsak sākahai kateibing, ana khangatateila, kala ana sākahai morei chi, hi saikora Judah Awungabingwui Thotrinchān Lairik chili makapiserhaimala? ¹⁸Manasseh thikahai eina avāva̱ ngarāli ngasoda awui shimwui yāmgui, Uzzawui yāmguili chifahaowa. Kala anaomayara Amonna awui mahut thuishina.

Amonna Munga kala Avāli Horhaowa

¹⁹Amonna mungkaphok tharan a zingkum maga̱da khani kāshunghairasai, kala Jerusalemli zingkum khani munga. Ava̱va̱li Meshullemeth hoi, Jotbahwui eina khalei Haruzwui naongalāva̱na. ²⁰Avāva̱ Manassehna kasā thāda anala ithumwui Avāwui mikyanli makaphā otmāng sai. ²¹Ana avāva̱wui shongfa saikorali zata, kala avāva̱na otram ngatha̱ meoma̱bingli otram ngatha̱da khoruma. ²²Ana ithumwui Avā, avāva̱ ngarāwui Vareli horhaida, ithumwui Avāwui shongfali mazatmana. ²³Amonwui raobingna ali ngathumda makhayā otwui mithit khalen sanglaga awunga chi awui shim khalattali sāthathaowa. ²⁴Kha ngalei chiwui mibingna awunga Amonli mithit khalen kasangbing saikorali sāthathaowa; kala anaomayara Josiahli awui mahut awunga sanghaowa. ²⁵Amonwui kasāsā saikora Judah Awungabingwui Thotrinchān Lairikli makapiserhaimala? ²⁶Ali Uzzawui yāmguili khalei awui chikhurli chifahaowa; kala anaomayara Josiahna awui mahut thuishina.