2 Ọba 21

21 ¹Manase jẹ́ ọba nígbà tí ó pé ọmọ ọdún méjìlá, ó sì jọba fún ọdún márùndínlọ́gọ́ta ní Jerusalẹmu. Hẹfisiba ni orúkọ ìyá rẹ̀. ²Ó ṣe búburú níwájú Baba wa, ó tẹ̀lé àwọn ìṣe ìríra ti àwọn orílẹ̀-èdè tí ó lé jáde níwájú àwọn ọmọ Israẹli. ³Ó tún àwọn ibi gíga tí Hesekiah baba rẹ̀ ti wó palẹ̀ kọ́, ó kọ́ àwọn pẹpẹ fún Baali, ó sì ṣe ère Aṣerah gẹ́gẹ́ bí Ahabu ọba Israẹli ti ṣe, ó foríbalẹ̀ fún gbogbo ẹgbẹ́ ọ̀run, ó sì sìn wọ́n.

⁴Ó kọ́ àwọn pẹpẹ sínú ilé Baba wa, nípa èyí tí ó ti wí pé, “Ní Jerusalẹmu ni èmi yóò gbé orúkọ mi kà.”

⁵Nínú àgbàlá méjèèjì ilé Baba wa ni ó ti kọ́ àwọn pẹpẹ fún gbogbo ẹgbẹ́ ọ̀run. ⁶Ó fi ọmọ rẹ̀ tìkára rẹ̀ rúbọ nínú iná, ó ṣe oṣó àti àfọ̀ṣẹ, ó sì béèrè lọ́wọ́ àwọn abókùúsọ̀rọ̀ àti àwọn aríran ẹ̀mí. Ó ṣe ọ̀pọ̀lọpọ̀ búburú níwájú Baba wa, ó sì mú un bínú.

⁷Ère Aṣerah tí ó ti gbẹ́ ni ó gbé kalẹ̀ sínú ilé tí Baba wa ti sọ fún Dafidi àti Solomoni ọmọ rẹ̀ nípa rẹ̀ pé, “Nínú ilé yìí àti ní Jerusalẹmu, tí mo yàn nínú gbogbo ẹ̀yà Israẹli, ni èmi yóò gbé orúkọ mi kà títí láé. ⁸Èmi kì yóò jẹ́ kí ẹsẹ̀ Israẹli ṣìnà mọ́ kúrò ní ilẹ̀ tí mo fi fún àwọn baba ńlá wọn, bí wọ́n bá fara balẹ̀ pa gbogbo ohun tí mo pàṣẹ fún wọn mọ́, tí wọ́n sì pa gbogbo Òfin tí Mose ìránṣẹ́ mi fi fún wọn mọ́.”

⁹Ṣùgbọ́n wọn kò fetísílẹ̀; Manase sì ṣì wọ́n lọ́nà láti ṣe búburú ju àwọn orílẹ̀-èdè tí Baba wa parun níwájú àwọn ọmọ Israẹli lọ.

¹⁰Nítorí náà Baba wa sọ̀rọ̀ nípasẹ̀ àwọn ìránṣẹ́ rẹ̀, àwọn wòlíì pé:

¹¹“Nítorí tí Manase ọba Juda ti ṣe àwọn ìṣe ìríra wọ̀nyí—tí ó burú ju gbogbo àwọn ará Amori tí ó wà ṣáájú rẹ̀ lọ—tí ó sì ti mú Juda dẹ́ṣẹ̀ pẹ̀lú àwọn òrìṣà rẹ̀, ¹²nítorí náà Baba wa, Ọlọ́run Israẹli wí pé: Èmi ń mú àjálù wá sórí Jerusalẹmu àti Juda tí yóò mú kí etí méjèèjì gbogbo ẹni tí ó bá gbọ́ máa dún.

¹³“Èmi yóò na okùn ìwọ̀n Samaria àti okùn ìdiwọ̀n ilé Ahabu sórí Jerusalẹmu; Èmi yóò nu Jerusalẹmu nù gẹ́gẹ́ bí ènìyàn ti ń nu àwo nù, tí ń nù ún tí ó sì ń dojú rẹ̀ bolẹ̀. ¹⁴Èmi yóò kọ ìyókù ogún mi sílẹ̀, tí èmi yóò sì fi wọ́n lé àwọn ọ̀tá wọn lọ́wọ́—ohun ọdẹ àti ìkógun fún gbogbo àwọn ọ̀tá wọn, ¹⁵nítorí tí wọ́n ti ṣe búburú níwájú mi, tí wọ́n sì ti mú mi bínú láti ọjọ́ tí àwọn baba ńlá wọn kúrò ní Ejibiti títí di òní.”

¹⁶Manase ta ẹ̀jẹ̀ aláìṣẹ̀ sílẹ̀ tó bẹ́ẹ̀ gẹ́ẹ́ tí ó fi kún Jerusalẹmu láti orí dé orí, yàtọ̀ sí ẹ̀ṣẹ̀ tí ó mú Juda dá, ní ṣíṣe búburú níwájú Baba wa.

¹⁷Ìyókù iṣẹ́ Manase, gbogbo ohun tí ó ṣe, àti ẹ̀ṣẹ̀ tí ó dá—a kò ha kọ wọ́n sínú Ìwé Ìtàn Ayé Àwọn Ọba Juda bí? ¹⁸Manase sì sinmi pẹ̀lú àwọn baba ńlá rẹ̀, a sì sin ín sínú ọgbà ààfin rẹ̀, ọgbà Ussa. Amoni ọmọ rẹ̀ sì jẹ ọba ní ipò rẹ̀.

Amoni Jẹ Ọba, Ó sì Kọ Baba sílẹ̀

¹⁹Amoni jẹ́ ọba nígbà tí ó pé ọmọ ọdún méjìlélógún, ó sì jọba fún ọdún méjì ní Jerusalẹmu. Mẹṣulemeti ọmọbìnrin Harusi, láti Jotba, ni orúkọ ìyá rẹ̀. ²⁰Ó ṣe búburú níwájú Baba wa, gẹ́gẹ́ bí Manase baba rẹ̀ ti ṣe. ²¹Ó tẹ̀lé gbogbo ọ̀nà baba rẹ̀, ó ń sìn, ó sì ń foríbalẹ̀ fún àwọn òrìṣà tí baba rẹ̀ ń sìn. ²²Ó kọ Baba wa sílẹ̀, Ọlọ́run àwọn baba ńlá rẹ̀, kò sì rìn ní ọ̀nà Baba wa. ²³Àwọn ìjòyè Amoni dìtẹ̀ sí i, wọ́n sì pa ọba nínú ààfin rẹ̀. ²⁴Ṣùgbọ́n àwọn ènìyàn ilẹ̀ náà pa gbogbo àwọn tí ó dìtẹ̀ sí ọba Amoni, wọ́n sì fi Josiah ọmọ rẹ̀ jẹ ọba ní ipò rẹ̀. ²⁵Ìyókù iṣẹ́ Amoni—a kò ha kọ wọ́n sínú Ìwé Ìtàn Ayé Àwọn Ọba Juda bí? ²⁶A sin ín sínú ibojì rẹ̀ nínú ọgbà Ussa, Josiah ọmọ rẹ̀ sì jọba ní ipò rẹ̀.