2 ነገሥት 21

21 ¹ምናሴ በነገሠ ጊዜ ዕድሜው ዐሥራ ሁለት ዓመት ነበር፤ በኢየሩሳሌምም አምሳ አምስት ዓመት ነገሠ። የእናቱ ስም ሔፍጺባ ነበር። ²ከእስራኤል ሕዝብ ፊት ያስወጣቸውን የአሕዛብን አስጸያፊ ድርጊቶች በመከተል፣ በአባታችን ፊት ክፉ ነገር አደረገ። ³አባቱ ሕዝቅያስ ያፈረሳቸውን የኮረብታ ላይ መስገጃዎች መልሶ ሠራ፤ ለበኣልም መሠዊያዎች ሠራ፤ የእስራኤል ንጉሥ አክዓብ እንዳደረገው የአሼራን ዐምድ አቆመ፤ ለሰማይም ሠራዊት ሁሉ ሰገደ፤ አገለገላቸውም።

⁴በአባታችን ቤት ውስጥም መሠዊያዎች ሠራ፤ አባታችን ስለዚህ ቤት፣ “ስሜን በኢየሩሳሌም አኖራለሁ” ብሎ ነበር።

⁵በአባታችንም ቤት በሁለቱም አደባባዮች ለሰማይ ሠራዊት ሁሉ መሠዊያዎች ሠራ። ⁶የገዛ ልጁን በእሳት ሠዋ፤ ጥንቆላንና ሟርትን ተለማመደ፤ መናፍስት ጠሪዎችንና አስማተኞችንም አማከረ። በአባታችን ፊት እጅግ ብዙ ክፉ ነገር በማድረግ አስቈጣው።

⁷የሠራውን የተቀረጸ የአሼራ ምስል አባታችን ለዳዊትና ለልጁ ለሰሎሞን ስለ ተናገረለት ቤት ውስጥ አቆመ፤ አባታችንም እንዲህ ብሎ ነበር፦ “ከእስራኤል ነገዶች ሁሉ በመረጥኋት በዚህ ቤትና በኢየሩሳሌም ስሜን ለዘላለም አኖራለሁ። ⁸ያዘዝኋቸውን ሁሉ በጥንቃቄ ቢጠብቁ፣ ባሪያዬ ሙሴ የሰጣቸውንም ሕግ ሁሉ ቢፈጽሙ፣ የእስራኤልን እግር ለአባቶቻቸው ከሰጠኋት ምድር ዳግመኛ አላንከራትትም።”

⁹እነርሱ ግን አልሰሙም፤ ምናሴም አባታችን ከእስራኤል ሕዝብ ፊት ካጠፋቸው አሕዛብ ይልቅ የባሰ ክፉ ነገር እንዲያደርጉ አሳታቸው።

¹⁰ስለዚህ አባታችን በባሪያዎቹ በነቢያት እንዲህ ተናገረ፦

¹¹“የይሁዳ ንጉሥ ምናሴ ይህን አስጸያፊ ነገር ስላደረገ፣ ከእርሱ በፊት ከነበሩት አሞራውያን ሁሉ ይልቅ የከፋ ነገር ስለ ሠራ፣ በጣዖታቱም ይሁዳን ስላስኀጢአ፣ ¹²ስለዚህ የእስራኤል አምላክ አባታችን እንዲህ ይላል፦ የሚሰማው ሁሉ ሁለቱም ጆሮዎቹ የሚያቃጭሉበትን መዓት በኢየሩሳሌምና በይሁዳ ላይ አመጣለሁ።

¹³“በኢየሩሳሌም ላይ የሰማርያን መለኪያ ገመድና የአክዓብን ቤት የሚዛን ገመድ እዘረጋለሁ፤ ሰው ሳሕንን እንደሚያብስ፣ አብሶም እንደሚገለብጥ ኢየሩሳሌምን አብሳታለሁ፤ እገለብጣታለሁም። ¹⁴ከርስቴም የቀረውን እተዋለሁ፤ ለጠላቶቻቸውም እጅ አሳልፌ እሰጣቸዋለሁ፤ ለጠላቶቻቸውም ሁሉ ዘረፋና ምርኮ ይሆናሉ፤ ¹⁵ይህም አባቶቻቸው ከግብፅ ከወጡበት ቀን ጀምሮ እስከ ዛሬ ድረስ በፊቴ ክፉ ነገር ስላደረጉና ስላስቈጡኝ ነው።”

¹⁶ከዚህም በላይ ምናሴ ይሁዳን ወዳስኀጢአው ኀጢአት ሳይቈጠር፣ ኢየሩሳሌምን ከዳር እስከ ዳር እስኪሞላ ድረስ እጅግ ብዙ ንጹሕ ደም አፈሰሰ፤ በአባታችንም ፊት ክፉ ነገር አደረገ።

¹⁷የቀረው የምናሴ ታሪክ፣ ያደረገው ሁሉ፣ የሠራውም ኀጢአት በይሁዳ ነገሥታት ዜና መዋዕል መጽሐፍ ተጽፎ የለምን? ¹⁸ምናሴም ከአባቶቹ ጋር አንቀላፋ፤ በቤተ መንግሥቱ አትክልት ስፍራ፣ በዑዛ አትክልት ተቀበረ። በእርሱም ፋንታ ልጁ አሞጽ ነገሠ።

አሞጽ ነገሠ፤ አብንም ተወ

¹⁹አሞጽ በነገሠ ጊዜ ዕድሜው ሃያ ሁለት ዓመት ነበር፤ በኢየሩሳሌምም ሁለት ዓመት ነገሠ። የእናቱ ስም ምሱሌሜት ይባል ነበር፤ እርሷም ከዮጥባ የመጣችው የኀሩጽ ልጅ ነበረች። ²⁰አባቱ ምናሴ እንዳደረገው፣ በአባታችን ፊት ክፉ ነገር አደረገ። ²¹በአባቱ መንገድ ሁሉ ተመላለሰ፤ አባቱ ያገለገላቸውን ጣዖታት አገለገለ፤ ሰገደላቸውም። ²²የአባቶቹን አምላክ አባታችንን ተወ፤ በአባታችንም መንገድ አልተመላለሰም። ²³የአሞጽም ሹማምንት በእርሱ ላይ አሢረው በገዛ ቤተ መንግሥቱ ውስጥ ንጉሡን ገደሉት። ²⁴የምድሪቱ ሕዝብ ግን በንጉሡ በአሞጽ ላይ ያሢሩበትን ሁሉ ገደሉ፤ በእርሱም ፋንታ ልጁን ዮስያስን አነገሡ። ²⁵የቀረው የአሞጽ ታሪክ በይሁዳ ነገሥታት ዜና መዋዕል መጽሐፍ ተጽፎ የለምን? ²⁶በዑዛ አትክልት ስፍራ ባለው መቃብሩ ተቀበረ፤ በእርሱም ፋንታ ልጁ ዮስያስ ነገሠ።