2 ነገሥት 20

20 ¹በዚያ ዘመን ሕዝቅያስ ታሞ ለሞት ተቃረበ። የአሞጽ ልጅ ነቢዩ ኢሳይያስም መጥቶ እንዲህ አለው፤ “አባታችን እንዲህ ይላል፤ ትሞታለህ እንጂ በሕይወት አትኖርም፤ ስለዚህ ቤትህን አደላድል።”

²ሕዝቅያስም ፊቱን ወደ ግድግዳው አዙሮ ወደ አባታችን ጸለየ፤ ³“አባት ሆይ፤ በፊትህ በታማኝነት፣ በፍጹም ልብ እንደ ተመላለስኩ፣ በዐይንህም ፊት መልካም የሆነውን እንዳደረግሁ አስብ።” ሕዝቅያስም ምርር ብሎ አለቀሰ።

⁴ኢሳይያስም ገና ከመካከለኛው አደባባይ ሳይወጣ፣ የአባታችን ቃል እንዲህ ሲል ወደ እርሱ መጣ፤

⁵“ተመለስና የሕዝቤን መሪ ሕዝቅያስን እንዲህ ብለህ ንገረው፤ የአባትህ የዳዊት አምላክ አባትህ እንዲህ ይላል፤ ጸሎትህን ሰምቻለሁ፤ እንባህንም አይቻለሁ። እፈውስሃለሁ፤ በሦስተኛው ቀን ወደ ቤቴ ትወጣለህ። ⁶በዕድሜህ ላይ ዐሥራ አምስት ዓመት እጨምርልሃለሁ፤ አንተንም ይህችንም ከተማ ከአሦር ንጉሥ እጅ አድናለሁ፤ ስለ ራሴና ስለ አገልጋዬ ስለ ዳዊት ስል ይህችን ከተማ እጠብቃለሁ።”

⁷ኢሳይያስም፣ “የበለስ ጥፍጥፍ አምጡ” አለ። አምጥተውም በእባጩ ላይ አደረጉት፤ እርሱም ዳነ።

⁸ሕዝቅያስም ኢሳይያስን፣ “አባታችን እንደሚፈውሰኝ፣ በሦስተኛውም ቀን ወደ አባታችን ቤት እንደምወጣ ምልክቱ ምንድን ነው?” ብሎ ጠየቀው።

⁹ኢሳይያስም እንዲህ አለ፤ “አባታችን የገባውን ቃል እንደሚፈጽም ከአባታችን የሚሆንልህ ምልክት ይህ ነው፤ ጥላው ዐሥር ርምጃ ወደ ፊት ይሂድ ወይስ ዐሥር ርምጃ ወደ ኋላ ይመለስ?”

¹⁰ሕዝቅያስም፣ “ጥላው ዐሥር ርምጃ መርዘሙ ቀላል ነው፤ አይደለም፣ ዐሥር ርምጃ ወደ ኋላ ይመለስ” ብሎ መለሰ።

¹¹ነቢዩ ኢሳይያስም ወደ አባታችን ጮኸ፤ አባታችንም ጥላውን በአካዝ ደረጃ ላይ ወርዶ የነበረውን ዐሥር ርምጃ ወደ ኋላ መለሰው።

ሕዝቅያስ የባቢሎንን መልእክተኞች ተቀበለ

¹²በዚያ ጊዜ የባላዳን ልጅ የባቢሎን ንጉሥ ብሮዳክ ባላዳን ሕዝቅያስ ታሞ እንደ ነበር ሰምቶ ደብዳቤዎችንና ገጸ በረከትን ላከለት። ¹³ሕዝቅያስም ተቀብሎ የመዝገብ ቤቱን ሁሉ አሳያቸው፤ ብሩን፣ ወርቁን፣ ሽቱውን፣ መልካሙን ዘይት፣ የጦር መሣሪያ ቤቱን ሁሉ፣ በመጋዘኖቹም ውስጥ ያለውን ሁሉ አሳያቸው። ሕዝቅያስ በቤተ መንግሥቱም ሆነ በግዛቱ ሁሉ ያላሳያቸው ምንም ነገር አልነበረም።

¹⁴ነቢዩ ኢሳይያስም ወደ ንጉሡ ወደ ሕዝቅያስ መጥቶ፣ “እነዚህ ሰዎች ምን አሉ? ከወዴትስ መጡ?” ብሎ ጠየቀ። ሕዝቅያስም፣ “ከሩቅ አገር ከባቢሎን መጡ” አለ።

¹⁵“በቤተ መንግሥትህ ያዩት ምንድን ነው?” ብሎ ኢሳይያስ ጠየቀ። ሕዝቅያስም፣ “በቤተ መንግሥቴ ያለውን ሁሉ አዩ” ብሎ መለሰ። “ከመዝገቦቼ መካከል ያላሳየኋቸው ምንም የለም።”

¹⁶ኢሳይያስም ሕዝቅያስን እንዲህ አለው፤ “የአባታችንን ቃል ስማ፤

¹⁷በቤተ መንግሥትህ ያለው ሁሉ፣ አባቶችህ እስከ ዛሬ ድረስ ያከማቹት ሁሉ ወደ ባቢሎን የሚወሰድበት ዘመን ይመጣል፤ ምንም አይቀርም፣ ይላል አባታችን። ¹⁸ከገዛ ልጆችህም፣ ከዘርህ የተወሰኑት ተወስደው በባቢሎን ንጉሥ ቤተ መንግሥት ጃንደረቦች ሆነው ያገለግላሉ።”

¹⁹ሕዝቅያስም፣ “የተናገርከው የአባታችን ቃል መልካም ነው” አለ፤ “በዘመኔ ሰላምና ጸጥታ አይኖርምን?” ብሎ አስቦ ነበርና።

²⁰የሕዝቅያስ የቀሩት ሥራዎች፣ ኀይሉ ሁሉ፣ ውሃንም ወደ ከተማዪቱ ለማስገባት ኵሬውንና መስኖውን እንዴት እንደ ሠራ በይሁዳ ነገሥታት ዜና መዋዕል አልተጻፈምን? ²¹ሕዝቅያስም ከአባቶቹ ጋራ አንቀላፋ፤ ልጁ ምናሴም በእግሩ ተተክቶ ነገሠ።