Wazodi wa Bakyamvu 20 FHB Father's Heart Bible™

20 ¹Muna bilumbu bina, Ezekyasi wabela amana wábwesuka ku lufwa. Mbikudi Yesaya, mwana wa Amosi, wátula, wuzimbudini: «Tata wetu wuzimbudi bwabu: Yidika nzu yaku, mukuma ngeyi wukwisa fwa, wukwisaku zinga.»

²Amana Ezekyasi wábalula mbunzu yandi kwena kibaka amana wálombila kwena Tata wetu: ³«A Tata, yubuka bwosu buna yádyatila ku thwala yaku mu kwikama, mu mbundu yama yosu, mu kuhanga mana ma mboti ku mesu maku.» Amana Ezekyasi wádila phi lawu.

⁴Ku thwala Yesaya kálubuka muna kyanzala kya ha kati-kati, ndinga ya Tata wetu yátula kwena yandi:

⁵«Vutuka amana zimbula kwena Ezekyasi, mutwadisi wa kanda dyama: Tata waku, Nzambi wa tata waku Tavidi, wuzimbudi: Yiyukini lusambu lwaku amana yimweni matsanga maku. Yikwisa kubelula ngeyi. Muna kilumbu kya tatu, wukwisa tombuka ku nzu yama. ⁶Yikwisa leyisa mvula kumi yi tanu mu luzingu lwaku, amana yikwisa phulula ngeyi yi mbanza yayi mu luyalu lwa kyamvu kya Asiliya, amana yikwisa kengila mbanza yayi kikuma kya meni yi kikuma kya musadi wama Tavidi.»

⁷Yesaya wuzimbudi: «Natenu dipha dya fiki.» Bádinata, bádisya ha mputa, amana wábeluka.

⁸Ezekyasi wáhyula Yesaya: «Nati kidimbu kyasonga ni Tata wetu kakwisa kubelula meni amana yátombuka ku nzu ya Tata wetu muna kilumbu kya tatu?»

⁹Yesaya wuzimbudi: «Kiki kyenina kidimbu kyaku kyatuka kwena Tata wetu, kyasonga ni Tata wetu kakwisa lungisa lusilu lwandi: kininga kikwisa wenda ku thwala ha sikadiye kumi, ho kikwisa vutuka ku nima ha sikadiye kumi?»

¹⁰Ezekyasi wávutula: «Kwena kininga, weku phasi mu kulengidika ha sikadiye kumi; loni, yambula kyavutuka ku nima ha sikadiye kumi.»

¹¹Buna mbikudi Yesaya wábokila kwena Tata wetu, amana wávutula kininga ku nima ha sikadiye kumi kina kyakulumuka ha sikadiye ya Akhazi.

Ezekyasi Wuyambi Bambambala ba Babiloni

¹²Muna tangwa dina, Belodaki-Baladani, mwana wa Baladani, kyamvu kya Babiloni, wáthuma mikanda yi kabu kwena Ezekyasi, bwosu káyuka ni wabela. ¹³Ezekyasi wábayamba amana wábasongila nzu yandi yosu ya kimvwama: phalata, wolu, mananasi, masi ma kitoku, binwaninu byandi byosu, byosu bina byákala muna bilundilu byandi. Kwákalaku kima muna nzu yandi ya kipfumu holoni muna kinzunga kyandi kyosu kina Ezekyasi kabasongaku.

¹⁴Mbikudi Yesaya wátula kwena kyamvu Ezekyasi amana wáhyula: «Biki bazimbudi batu baba, amana kweti bátuka?» Ezekyasi wávutula: «Bátuka ku tsi ya kyana, ku Babiloni.»

¹⁵Yesaya wáhyula: «Biki bámona muna nzu yaku ya kipfumu?» Ezekyasi wávutula: «Byosu bina byenina muna nzu yama ya kipfumu. Kwákalaku kima muna kimvwama kyama kina yábasongaku.»

¹⁶Amana Yesaya wuzimbudi kwena Ezekyasi: «Yuka ndinga ya Tata wetu:

¹⁷Bilumbu bikwisa bina byosu bina byenina muna nzu yaku ya kipfumu, byosu bina batata baku bálundika tee lelu, bikwisa natwa ku Babiloni. Ka kima kimosi kikwisa sala ku, wuzimbudi Tata wetu. ¹⁸Ndambu ya bana baku ngeyi-meni, butuka dyaku, bikwisa bongwa mu kusala hanga bayakala bafwaniku kukwela muna nzu ya kipfumu ya kyamvu kya Babiloni.»

¹⁹Ezekyasi wuzimbudi: «Ndinga ya Tata wetu yina wázimbula yenina ya mboti.» Yandi wabánza: «Ngemba yi talala byakala muna bilumbu byama, kabwaku?»

²⁰Mihangu mina myasala mya Ezekyasi, ngolu zandi zoosu, amana bwosu kahanga kiziba yi disimu ndangu kakotisa mamba muna mbanza, ka myenina muna mukanda wa bilumbu bya bakyamvu ba Yuteya ku? ²¹Amana Ezekyasi wálembwa ha kimosi yi batata bandi, amana Manase, mwana wandi, wákala kyamvu mu kifulu kyandi.