2 రాజులు 20

20 ¹ఆ దినములలో హిజ్కియా రోగియై మరణమునకు సమీపమాయెను. ఆమోజు కుమారుడైన యెషయా ప్రవక్త వచ్చి, "మన తండ్రి చెప్పునదేమనగా: నీ యింటి విషయమై ఏర్పాటు చేసికొనుము; నీవు బ్రదుకవు, మరణమవుదువు" అని చెప్పెను.

²అప్పుడు హిజ్కియా తన ముఖమును గోడవైపు త్రిప్పి, మన తండ్రికి ఈలాగు ప్రార్థన చేసెను: ³"తండ్రీ, నేను యథార్థముగా, పూర్ణహృదయముతో నీ సన్నిధిని నడుచుకొని, నీ దృష్టికి అనుకూలమైనది చేసిన సంగతి జ్ఞాపకము చేసికొనుము." అప్పుడు హిజ్కియా బహుగా ఏడ్చెను.

⁴యెషయా మధ్య ఆవరణమునుండి బయటికి వెళ్లకమునుపే, మన తండ్రి వాక్కు అతనికి ప్రత్యక్షమాయెను:

⁵"నీవు తిరిగి వెళ్లి నా ప్రజలకు నాయకుడైన హిజ్కియాతో ఇట్లనుము: నీ తండ్రి, నీ పితరుడైన దావీదుయొక్క దేవుడు సెలవిచ్చునదేమనగా: నీ ప్రార్థన నేను వింటిని, నీ కన్నీళ్లు చూచితిని. నేను నిన్ను స్వస్థపరచెదను. మూడవ దినమున నీవు నా మందిరమునకు ఎక్కిపోవుదువు. ⁶నీ ఆయుష్షునకు పదునైదు సంవత్సరములు చేర్చెదను; అష్షూరు రాజు చేతిలోనుండి నిన్నును ఈ పట్టణమును విడిపించి, నా నిమిత్తమును నా సేవకుడైన దావీదు నిమిత్తమును ఈ పట్టణమును కాపాడెదను."

⁷యెషయా, "అంజూరపు పండ్ల ముద్ద తెండి" అనెను. వారు దానిని తెచ్చి కురుపుమీద వేయగా అతడు స్వస్థత పొందెను.

⁸హిజ్కియా యెషయాను, "మన తండ్రి నన్ను స్వస్థపరచుననుటకును, మూడవ దినమున నేను మన తండ్రి మందిరమునకు ఎక్కిపోవుదుననుటకును సూచన ఏది?" అని అడిగెను.

⁹యెషయా, "మన తండ్రి తన వాగ్దానమును నెరవేర్చుననుటకు మన తండ్రియొద్దనుండి నీకు కలుగు సూచన ఇదే: నీడ పది మెట్లు ముందుకు సాగవలెనా, లేక పది మెట్లు వెనుకకు మరలవలెనా?" అనెను.

¹⁰అందుకు హిజ్కియా, "నీడ పది మెట్లు పొడవగుట సులభమే; వద్దు, అది పది మెట్లు వెనుకకు మరలునుగాక" అని జవాబిచ్చెను.

¹¹అప్పుడు యెషయా ప్రవక్త మన తండ్రికి మొఱ్ఱపెట్టగా, ఆహాజు మెట్లమీద దిగియున్న నీడను ఆయన పది మెట్లు వెనుకకు మరల్చెను.

హిజ్కియా బబులోను రాయబారులను స్వాగతించుట

¹²ఆ కాలమున బలదాను కుమారుడైన బేరోదక్బలదాను అను బబులోను రాజు, హిజ్కియా రోగియై యుండెనని విని, అతనికి ఉత్తరములను ఒక కానుకను పంపెను. ¹³హిజ్కియా వారిని స్వాగతించి, తన నిధిగృహమంతటిని—వెండి, బంగారము, సుగంధద్రవ్యములు, శ్రేష్ఠమైన తైలము, తన ఆయుధశాల అంతయు, తన బొక్కసములలోనున్న సమస్తమును వారికి చూపించెను. తన నగరిలోనైనను తన రాజ్యమంతటిలోనైనను హిజ్కియా వారికి చూపింపనిది ఏదియు లేకపోయెను.

¹⁴యెషయా ప్రవక్త హిజ్కియా రాజునొద్దకు వచ్చి, "ఈ మనుష్యులు ఏమి చెప్పిరి? వారు ఎక్కడనుండి వచ్చిరి?" అని అడిగెను. అందుకు హిజ్కియా, "దూరదేశమైన బబులోనునుండి వచ్చిరి" అనెను.

¹⁵"నీ నగరిలో వారు ఏమి చూచిరి?" అని యెషయా అడిగెను. "నా నగరిలోనున్న సమస్తమును చూచిరి" అని హిజ్కియా జవాబిచ్చెను. "నా నిధులలో నేను వారికి చూపనిది ఏదియు లేదు."

¹⁶అప్పుడు యెషయా హిజ్కియాతో ఇట్లనెను, "మన తండ్రి వాక్కు వినుము:

¹⁷నీ నగరిలోనున్న సమస్తమును, నేటివరకు నీ పితరులు సమకూర్చినదంతయు బబులోనునకు కొనిపోబడు దినములు వచ్చుచున్నవి. ఏదియు మిగులదని మన తండ్రి సెలవిచ్చుచున్నాడు. ¹⁸నీ స్వంత కుమారులలో, నీ సంతానములో కొందరు కొనిపోబడి, బబులోను రాజు నగరిలో నపుంసకులుగా సేవచేయుదురు."

¹⁹అందుకు హిజ్కియా, "నీవు చెప్పిన మన తండ్రి వాక్కు మంచిదే" అనెను; "నా దినములలో సమాధానమును భద్రతయు ఉండునుగదా" అని అతడు అనుకొనెను.

²⁰హిజ్కియా చేసిన మిగిలిన కార్యములు, అతని పరాక్రమమంతయు, అతడు కొలనును కాలువను చేసి పట్టణములోనికి నీళ్లను తెచ్చిన విధమును—యూదా రాజుల వృత్తాంతముల గ్రంథములో వ్రాయబడలేదా? ²¹తరువాత హిజ్కియా తన పితరులతో కూడ నిద్రించెను; అతని కుమారుడైన మనష్షే అతనికి బదులుగా రాజాయెను.