2ይ ነገስት 20 FHB Father's Heart Bible™

20 ¹በቲ ዘመን እቱይ ሕዝቅያስ ሓሚሙ ክመውት ተቓረበ። ነቢይ ኢሳይያስ ወዲ ኣሞፅ ድማ መፂኡ፥ “ኣቦና ከምዙይ ይብል፦ ቤትካ ኣዳሉ፤ ክትመውት ኢኻ እምበር ኣይትነብርን ኢኻ” በሎ።

²ሽዑ ሕዝቅያስ ገፁ ናብ መንደቕ መሊሱ ናብ ኣቦና ፀለየ፦ ³“ኦ ኣቦ! ብምሉእ ልቢ ብሓቂ ኣብ ቅድሜኻ ኸም ዝተመላለስኩ፥ ኣብ ቅድሚ ኣዒንትኻ ፅቡቕ ዝኾነ ኸም ዝገበርኩ ዘክር።” ሕዝቅያስ ድማ መሪር ብኽያት በኸየ።

⁴ኢሳይያስ ካብ ማእኸላይ ኣፀድ ከይወፀ እንተሎ፥ ቃል ኣቦና ናብኡ መፀ፦

⁵“ተመሊስካ ንሕዝቅያስ ንሹም ህዝበይ ከምዙይ ኢልካ ንገሮ፦ ኣቦኻ፥ ኣምላኽ ኣቦኻ ዳዊት፥ ከምዙይ ይብል፦ ፀሎትካ ሰሚዐ፥ ንብዓትካ ድማ ሪአ ኣለኹ። ኣነ ኸሕውየካ እየ። ብሳልሰይቲ መዓልቲ ናብ ቤተይ ክትድይብ ኢኻ። ⁶ኣብ ዕድሜኻ ዓሰርተ ሓሙሽተ ዓመት ክውስኸልካ እየ፤ ንኣኻን ነዛ ኸተማ እዚኣን ካብ ኢድ ንጉስ ኣሶር ከድሕን እየ፤ ምእንታይ፥ ከምኡውን ምእንቲ ባርያይ ዳዊት ኢለ ድማ ነዛ ኸተማ እዚኣ ክከላኸለላ እየ።”

⁷ኢሳይያስ ከዓ “ጎጎ በለስ ኣምፅኡ” በለ። ኣምፂኦም ድማ ኣብ ልዕሊ እቲ ቝስሊ ገበርዎ፤ ንሱውን ሓወየ።

⁸ሕዝቅያስ ከዓ ንኢሳይያስ “ኣቦና ኸም ዘሕውየንን ብሳልሰይቲ መዓልቲ ናብ ቤት ኣቦና ኸም ዝድይብን እንታይ ምልክት ኣሎ?” ኢሉ ጠየቖ።

⁹ኢሳይያስ ድማ “ኣቦና ነቲ ቃሉ ኸም ዝፍፅሞ፥ እዝ ካብ ኣቦና ዝኾነ ምልክትካ እዩ፦ እቲ ፅላሎት ዓሰርተ መደያይቦ ንቕድሚት ይኺድ ዶ ወይ ዓሰርተ መደያይቦ ንድሕሪት ይመለስ?” በለ።

¹⁰ሕዝቅያስ ድማ “እቲ ፅላሎት ዓሰርተ መደያይቦ ክነውሕ ቀሊል እዩ፤ ኣይፋሉን፥ ዓሰርተ መደያይቦ ንድሕሪት ይመለስ ደኣ” ኢሉ መለሰ።

¹¹እቲ ነቢይ ኢሳይያስ ድማ ናብ ኣቦና ፀውዐ፤ ነቲ ፅላሎት ከዓ በቲ መደያይቦ ኣካዝ ዝወረደ ዓሰርተ መደያይቦ ንድሕሪት መለሶ።

ሕዝቅያስ ንልኡኻት ባቢሎን ይቕበሎም

¹²በቲ ጊዜ እቱይ ብሮዳክ ባለዳን ወዲ ባለዳን፥ ንጉስ ባቢሎን፥ ሕዝቅያስ ሓሚሙ ኸም ዝነበረ ሰሚዑ፥ ናብ ሕዝቅያስ መልእኽትን ገፀ በረከትን ሰደደ። ¹³ሕዝቅያስ ድማ ተቐቢሉ ነቲ ዅሉ ቤት መዝገቡ፥ ብሩርን ወርቅን ቀመማትን ፅቡቕ ዘይትን ኵሉ ቤት ኣፅዋሩ፥ ኣብ መዛግቡ ዘሎ ዅሉን ኣርኣዮም። ኣብ ቤቱን ኣብ ኵሉ ግዝኣቱን ዘሎ፥ ሕዝቅያስ ዘየርኣዮም ገለ ነገር የለን ነበረ።

¹⁴ነቢይ ኢሳይያስ ድማ ናብ ንጉስ ሕዝቅያስ መፂኡ “እዞም ሰባት እዚኣቶም እንታይ በሉ? ካበይ ከ መፁ?” ኢሉ ጠየቖ። ሕዝቅያስ ከዓ “ካብ ርሑቕ ሃገር፥ ካብ ባቢሎን መፁ” በለ።

¹⁵ኢሳይያስ ድማ “ኣብ ቤትካ እንታይ ረኣዩ?” ኢሉ ጠየቖ። ሕዝቅያስ ከዓ “ኣብ ቤተይ ዘሎ ዅሉ ረኣዩ፤ ካብ መዛግበይ ዘየርኣእክዎም ገለ የለን” ኢሉ መለሰ።

¹⁶ሽዑ ኢሳይያስ ንሕዝቅያስ “ቃል ኣቦና ስማዕ፦” በሎ።

¹⁷ኣብ ቤትካ ዘሎ ዅሉን ኣቦታትካ ኽሳዕ ሕዚ ዘዋህለልዎን ናብ ባቢሎን ዝውሰደሉ መዓልቲ ክመፅእ እዩ። ገለ እኳ ኣይተርፍን፥ ይብል ኣቦና። ¹⁸ካብ ደቅኻ፥ ካብ ዝውለዱ ዘርእኻ ድማ ገሊኦም ተወሲዶም ኣብ ቤተ መንግስቲ ንጉስ ባቢሎን ስሉባት ክኾኑ እዮም።

¹⁹ሕዝቅያስ ከዓ “ብዘመነይ ሰላምን ድሕንነትን ኣይኸውንን ዶ?” ኢሉ ሓሲቡ፥ “እቲ ዝተዛረብካዮ ቃል ኣቦና ፅቡቕ እዩ” በለ።

²⁰እቲ ዝተረፈ ናይ ሕዝቅያስ ነገርን ኵሉ ጅግንነቱን፥ ከመይ ገይሩ እቲ ቓላይን ቦዒን ሰሪሑ ናብታ ኸተማ ማይ ከም ዘእተወን፥ ኣብ መፅሓፍ ታሪኽ ነገስታት ይሁዳ ዝተፅሓፈዶ ኣይኮነን? ²¹ሕዝቅያስ ድማ ምስ ኣቦታቱ ደቀሰ፤ ወዱ ምናሴ ኸዓ ኣብ ክንድኡ ነገሰ።