2 Mga Hari 21

21 ¹Nahimong hari si Manases sa edad nga napulog duha ug naghari sulod sa kalim-ag lima ka tuig sa Jerusalem. Ang iyang inahan mao si Hepziba. ²Nagbuhat siyag daotan sa panan-aw sa atong Amahan, nga nagsunod sa mangil-ad nga mga buhat sa mga nasod nga iyang gipapahawa sa atubangan sa katawhan sa Israel. ³Gitukod niya pag-usab ang hatag-as nga mga dapit nga gilumpag sa iyang amahan nga si Ezekias, nagtukod siyag mga halaran alang kang Baal, ug nagbuhat ug poste ni Ashera sama sa gibuhat ni Ahab nga hari sa Israel, miyukbo siya sa tanang panon sa langit ug nag-alagad kanila.

⁴Nagtukod siyag mga halaran sulod sa balay sa atong Amahan, nga mahitungod niini miingon siya, “Sa Jerusalem ibutang ko ang akong ngalan.”

⁵Sa duha ka hawanan sa balay sa atong Amahan nagtukod siyag mga halaran alang sa tanang panon sa langit. ⁶Gihalad niya ang iyang kaugalingong anak sa kalayo, nagbuhat ug pangsalamangka ug pagpanagna, ug nangayog tambag sa mga espiritista ug sa mga tigpakigsulti sa mga espiritu. Daghan ang daotang gibuhat niya sa mga mata sa atong Amahan, nga nagpasuko kaniya.

⁷Ang kinulit nga larawan ni Ashera nga iyang gibuhat gipahimutang niya sa balay nga gihisgotan sa atong Amahan ngadto kang David ug sa iyang anak nga si Solomon, “Niini nga balay ug sa Jerusalem, nga akong gipili gikan sa tanang tribo sa Israel, ibutang ko ang akong ngalan hangtod sa kahangtoran. ⁸Dili ko na palatagawon pag-usab ang mga tiil sa Israel gikan sa yuta nga akong gihatag sa ilang mga katigulangan, kon ilang tumanon pag-ayo ang tanan nga akong gisugo kanila, nga magbantay sa tibuok Balaod nga gihatag kanila sa akong alagad nga si Moises.”

⁹Apan wala sila mamati; gipasalaag sila ni Manases aron magbuhat ug labaw pang daotan kay sa mga nasod nga gilaglag sa atong Amahan sa atubangan sa katawhan sa Israel.

¹⁰Busa misulti ang atong Amahan pinaagi sa iyang mga alagad nga mga propeta,

¹¹“Tungod kay si Manases nga hari sa Juda nagbuhat niining mangil-ad nga mga butang—labaw pa kay sa tanang mga Amorihanon nga nauna kaniya—ug nag-giya sa Juda sa pagpakasala pinaagi sa iyang mga dios-dios, ¹²busa mao kini ang giingon sa atong Amahan, ang Dios sa Israel: Magdala akog katalagman sa Jerusalem ug sa Juda nga ang matag usa nga makadungog niini mobagting ang iyang duha ka dalunggan.

¹³“Ituy-od ko sa ibabaw sa Jerusalem ang igsusukod nga pisi sa Samaria ug ang tunton sa balay ni Ahab; pagapahiran ko ang Jerusalem sama sa paghapyod sa usa ka pinggan, nga pahiran ug balihon kini. ¹⁴Isalikway ko ang nahibilin sa akong panulondon, nga itugyan sila ngadto sa ilang mga kaaway—mahimong tukbonon ug inagaw alang sa tanan nilang mga kaaway, ¹⁵tungod kay nagbuhat sila ug daotan sa akong panan-aw ug nagpasuko kanako sukad sa adlaw nga mibiya sa Ehipto ang ilang mga katigulangan hangtod karong adlawa.”

¹⁶Daghan kaayong dugo nga inosente ang giula ni Manases nga napuno niini ang Jerusalem gikan sa usa ka tumoy ngadto sa pikas, gawas pa sa sala nga iyang gipabuhat sa Juda, nga nagbuhat ug daotan sa panan-aw sa atong Amahan.

¹⁷Ang uban pang mga buhat ni Manases, ang tanan nga iyang gihimo, ug ang sala nga iyang nabuhat—dili ba nahisulat kini sa Libro sa mga Kaagi sa mga Hari sa Juda? ¹⁸Mipahulay si Manases uban sa iyang mga katigulangan, gilubong sa tanaman sa iyang palasyo, ang tanaman ni Uza. Ang iyang anak nga si Amon nahimong hari puli kaniya.

Naghari si Amon ug Gitalikdan ang Amahan

¹⁹Nahimong hari si Amon sa edad nga kawhaag duha ug naghari sulod sa duha ka tuig sa Jerusalem. Ang iyang inahan mao si Mesulemet nga anak ni Haruz, nga taga-Jotba. ²⁰Nagbuhat siya ug daotan sa panan-aw sa atong Amahan, sama sa gibuhat sa iyang amahan nga si Manases. ²¹Gisunod niya ang tanang paagi sa iyang amahan, nga nag-alagad ug miyukbo sa mga dios-dios nga gialagaran sa iyang amahan. ²²Gitalikdan niya ang atong Amahan, ang Dios sa iyang mga katigulangan, ug wala siya maglakaw sa dalan sa atong Amahan. ²³Ang mga opisyal ni Amon naglaraw batok kaniya ug gipatay ang hari sa iyang kaugalingong palasyo. ²⁴Apan gipatay sa katawhan sa yuta ang tanan nga naglaraw batok kang Haring Amon, ug gihimo nila nga hari ang iyang anak nga si Josias puli kaniya. ²⁵Ang uban pang mga buhat ni Amon—dili ba nahisulat kini sa Libro sa mga Kaagi sa mga Hari sa Juda? ²⁶Gilubong siya sa iyang lubnganan sa tanaman ni Uza, ug ang iyang anak nga si Josias naghari puli kaniya.