Me basika na mukanda
Dibuku

Yosiya Ke Yidika Dyaka Ngwisani na Mantwala ya Tata

Yosiya tangaka mambu ya ngwisani na ndinga ya ngolo, mpe na manima yandi salaka yawu: yandi yokaka Asela, katulaka banzo ya bisika ya lusambulu, defisaka Tofete, nikaka kiyokolo ya minkayulu ya Yelobowame tii yawu kumaka putulu, mpe salaka Pake ya kele mutindu mosi ve banda na bilumbu ya bazuzi. Ata ntinu mosi ve balukilaka Tata ya beto mutindu yandi, mpe nkele samu na Manase kele kaka. Neko kufwaka yandi.

Tata ya beto ke zonza na vese 27

Kapu 23.

Na yina, ntinu fidisaka nsangu, mpe bawu vukisaka na yandi bakuluntu nyonso ya Yuda mpe ya Yelusalemi. Ntinu kwendaka na Yinzo ya Tata ya beto na bantu nyonso ya Yuda mpe bantu nyonso yina vwandaka zinga na Yelusalemi: banganga-Nzambi, mimbikudi, mpe bantu nyonso, kubanda na bantu ya fyoti tii na bantu ya nene. Na makutu ya bawu, yandi tangaka mambu nyonso ya Dibuku ya Ngwisani yina ba monaka na Yinzo ya Tata ya beto. Ntinu telamaka pene-pene ya dikunzi mpe yandi salaka ngwisani na mantwala ya Tata ya beto: na kulanda yandi mpe na kusadila bantumunu ya yandi, malongi mpe bansalulu ya misiku ya yandi na ntima ya yandi ya mvimba mpe na mwela ya yandi ya mvimba, na kulungisa mambu ya ngwisani yina kele ya kusonama na dibuku yayi. Mpe bantu nyonso kotaka na ngwisani yina.

Ntinu pesaka lutumu na Hilekiya, mfumu ya banganga-Nzambi, na banganga-Nzambi yina vwandaka na manima ya yandi, mpe na bakengi ya bamwelo, samu na kukatula na Yinzo ya Tata ya beto bima nyonso yina ba yidikaka samu na Baale, Asela, mpe nkonga nyonso ya binwani ya mazulu. Yandi yokaka yawu na ngaanda ya Yelusalemi na bilanga ya Sedelone mpe yandi nataka bombi ya yawu na Betele. Yandi katulaka banganga-nzambi ya biteki yina bantinu ya Yuda tulaka samu na kuyoka minkayulu na bisika ya lusambulu ya zulu ya myongo na bambanza ya Yuda mpe na balweka ya Yelusalemi, mpe bayina vwandaka yoka minkayulu na Baale, na ntangu, ngonda, bambwetete, mpe nkonga nyonso ya binwani ya mazulu. Yandi basisaka dikunzi ya Asela na Yinzo ya Tata ya beto na muzumba ya Sedelone na ngaanda ya Yelusalemi, yandi yokaka yawu, yandi nikaka yawu tii yawu kumaka putulu, mpe yandi mwangaka putulu yango na bandyamu ya bantu ya mpamba. Yandi bwisaka bayinzo ya bantu yina vwandaka sala kindumba ya longo ya babakala na Yinzo ya Tata ya beto, kisika yina bakento vwandaka tunga balele samu na Asela. Yandi nataka banganga-Nzambi nyonso na bambanza ya Yuda mpe yandi kumisaka ya kuvedila ve bisika ya lusambulu ya zulu ya myongo, kisika yina banganga-nzambi vwandaka yoka minkayulu, kubanda na Ngeba tii na Bere-Sheba. Yandi bwisaka bisika ya lusambulu yina vwandaka na bamwelo, na nkotolo ya Mwelo ya Yeswa, mfumu ya mbanza, na lumoso ya mwelo ya mbanza. Kasi banganga-nzambi ya bisika ya lusambulu kwendaka ve na kiyokolo ya minkayulu ya Tata ya beto na Yelusalemi, ata bawu vwandaka dya mampa ya kukonda levule na kati ya banganga-nzambi bampangi ya bawu. Yandi kumisaka Tofete ya kuvedila ve, yina kele na mudimba ya Bene-Yinome, samu ti ata muntu mosi kulutisa ve mwana ya yandi ya bakala to mwana ya yandi ya kento na kati ya tiya mutindu munkayulu na Moloke. Yandi katulaka bampunda yina bantinu ya Yuda pesaka na ntangu, na nkotolo ya Yinzo ya Tata ya beto, pene-pene ya kivinga ya Natane-Meleke, muntu ya mfunu na kati ya kizunga. Yandi yokaka bapusu-pusu ya ntangu na tiya. Biyokolo ya minkayulu yina vwandaka na zulu ya muludi ya kivinga ya zulu ya Akaze, yina bantinu ya Yuda salaka, mpe biyokolo ya minkayulu yina Manase salaka na mapangu zole ya Yinzo ya Tata ya beto, ntinu bwisaka yawu; yandi mwangaka yawu kuna mpe yandi losaka putulu ya yawu na muzumba ya Sedelone. Ntinu kumisaka ya kuvedila ve bisika ya lusambulu yina kele na esete ya Yelusalemi, na sude ya Mongo ya Mbebisa, yina Salomoni, ntinu ya Isayeli, tungaka samu na Asetalete, nzambi ya busafu ya ba-Sidone, samu na Kemose yina kele nzambi ya busafu ya ba-Mowabe, mpe samu na Milekome yina kele nzambi ya busafu ya ba-Amone. a a v13 Mongo ya Mbebisa vwandaka nsongi ya sude ya Mongo ya Olive, bawu pesaka yawu nkumbu yayi ya mbi samu ti Salomoni tungaka kuna bayinzo ya lusambulu samu na banzambi ya nkaka. Yandi mwangaka matadi yina ba telemisaka mutindu bidimbu, yandi zengaka makunzi ya Asela, mpe yandi fulusaka bisika ya yawu na mikwa ya bantu.

Ata kiyokolo ya minkayulu ya Betele, kisika ya lusambulu yina Yelobowame, mwana ya Nebate, salaka, yina nataka Isayeli na masumu, yandi bwisaka kiyokolo yina mpe kisika yina ya lusambulu, yandi yokaka kisika ya lusambulu, yandi nikaka yawu tii yawu kumaka putulu, mpe yandi yokaka dikunzi ya Asela. Ntangu Yosiya balukaka mpe yandi monaka bandyamu na lweka ya mongo, yandi fidisaka bantu samu na kukatula mikwa mpe kuyoka yawu na zulu ya kiyokolo ya minkayulu, na kusafula yawu, na kulungisa mambu ya Tata ya beto yina muntu ya Nzambi tubaka ntangu yandi tubaka mambu yayi na ntwala. Yandi yufulaka: «Kidimbu yinki mu ke mona?» Bantu ya mbanza tubaka: «Ndyamu ya muntu ya Nzambi yina katukaka na Yuda mpe yandi zonzaka mambu yina me tadila kiyokolo ya minkayulu ya Betele, mambu kaka yina nge salaka.»

Yandi tubaka: «Beno bika yawu. Ata muntu mosi kunanguna ve mikwa ya yandi.» Na yina, bawu bikaka mikwa ya yandi, kumi na mikwa ya mumbikudi yina katukaka na Samaliya. Yosiya katulaka mpe bayinzo nyonso ya lusambulu yina vwandaka na bisika ya lusambulu na bambanza ya Samaliya, yina bantinu ya Isayeli tungaka samu na kunyongisa Tata ya beto; yandi salaka yawu mutindu yandi salaka na Betele. Yandi fwaka banganga-nzambi nyonso ya bisika yina ya lusambulu na zulu ya biyokolo ya minkayulu, yandi yokaka mikwa ya bantu na zulu ya yawu, mpe yandi vutukaka na Yelusalemi.

Yosiya Ke Yidika Dyaka Mukembo ya Paki

Na yina, ntinu pesaka lutumu na bantu nyonso: «Beno sala Mukembo ya Paki samu na Tata ya beno, mutindu ya kele ya kusonama na Dibuku yayi ya Ngwisani.» Mukembo ya Paki ya mutindu yina salamaka ntete ve banda na bilumbu ya banzonzi yina vwandaka twadisa Isayeli, mpe na bilumbu nyonso ya bantinu ya Isayeli mpe ya Yuda. Kasi na mvula ya kumi na nana yina ntinu Yosiya vwandaka yala, bawu salaka Mukembo yayi ya Paki samu na Tata ya beto na Yelusalemi.

Yosiya katulaka mpe bantu yina ke sololaka na bamvumbi, bayina ke talaka mambu, banzambi ya dikanda, biteki, mpe bima nyonso ya busafu yina ba monaka na Yuda mpe na Yelusalemi, na kulungisa mambu ya Musiku yina kele ya kusonama na dibuku yina nganga-Nzambi Hilekiya monaka na Yinzo ya Tata ya beto. Ata ntinu mosi ve, na ntwala to na manima ya Yosiya, balukilaka Tata ya beto mutindu yandi, na ntima ya yandi ya mvimba, na mwela ya yandi ya mvimba, na ngolo ya yandi ya mvimba, na kulanda Musiku nyonso ya Moyize. Ata mpidina, Tata ya beto katukaka ve na makasi ya yandi ya nene, ya ngolo mpe yina ke lema, yina vwandaka na Yuda, samu na mambu nyonso yina Manase salaka na kunyongisa yandi.

Samu ti Tata ya beto tubaka: «Mu ke katula mpe Yuda na mantwala ya munu, mutindu mu katulaka Isayeli, mpe mu ke manga mbanza yayi yina mu soolaka, Yelusalemi, mpe Yinzo yina mu tubaka: Nkumbu ya munu ke vwanda kuna.»

Mavanga ya nkaka ya Yosiya, ti mambu nyonso yina yandi salaka, keti yawu me sonama ve na dibuku ya kinkulu ya bantinu ya Yuda? Na bilumbu ya yandi, Falawo Neko ya Ngipiti kwendaka samu na kusadisa ntinu ya Asili na nzadi ya Efalate. Ntinu Yosiya kwendaka kudisanana na yandi, kasi Neko fwaka yandi na Mengido ntangu yandi monaka yandi. Bisadi ya yandi nataka mvumbi ya yandi na pusu-pusu, kubanda na Mengido tii na Yelusalemi, mpe bawu tulaka yandi na ndyamu ya yandi mosi. Na manima, bantu ya yinsi bakaka Yoakaze, mwana ya Yosiya, bawu pakulaka yandi mafuta, mpe bawu tulaka yandi ntinu na kisika ya tata ya yandi.

Yoakaze Ke Yala mpe Ba Ke Nata Yandi

Yoakaze vwandaka na bamvula makumi zole na tatu ntangu yandi kumaka ntinu, mpe yandi yalaka bangonda tatu na Yelusalemi. Mama ya yandi vwandaka Amutale, mwana ya Yelemi, muntu ya Libena. Yandi salaka mambu ya mbi na meso ya Tata ya beto, kaka mutindu batata ya yandi salaka. Falawo Neko kangaka yandi na minyololo na Libela na yinsi ya Amate, samu ti yandi lenda yala ve na Yelusalemi. Mpe yandi futisaka yinsi kikodi ya palata ya pene-pene ya batalente iya mpe wolo ya pene-pene ya balivre makumi nsambwadi na tanu. Falawo Neko tulaka Elyakime, mwana ya Yosiya, ntinu na kisika ya tata ya yandi, mpe yandi sobaka nkumbu ya yandi, yandi pesaka yandi nkumbu Yoyakime. Yandi nataka Yowakaze na yinsi ya Ngipiti, mpe yandi fwaka kuna. Yoyakime futaka palata mpe wolo na Falawo, kasi yandi futisaka yinsi mpaku samu na kulungisa mambu yina Falawo lombaka. Yandi futisaka bantu ya yinsi palata mpe wolo, konso muntu na kitezo ya yandi, samu na kupesa yawu na Falawo Neko.

Yoyakime Ke Yala na Yuda

Yoyakime vwandaka na bamvula makumi zole na tanu ntangu yandi kumaka ntinu, mpe yandi yalaka bamvula kumi na mosi na Yelusalemi. Mama ya yandi vwandaka Zebida, mwana ya Pedayele, muntu ya mbanza Luma. Yandi salaka mambu ya mbi na meso ya Tata ya beto, kaka mutindu batata ya yandi salaka.