2 Corinthnao 1

1 ¹Ithumwui Avāwui kaphaning athishurda Khrista Jishuwui paokazata Paul, kala ithumwui ichinā khalei Timothy inina, Corinthli khalei ithumwui Avāwui church, kala Achaia peichaoda khalei katharabing saikorali kagapina. ²Ithumwui Avā kala Proho Jishu Khristawui eina lukhamashan kala chingri kahai chi nathumli ngasomiranu.

Ringphā Saikorawui Avā

³Ithumwui Avā, ithumwui Proho Jishu Khristawui Avā, lukhamashan pemting kala ringphā saikorawui Avāli soranu. ⁴Ithumwui Avāwui eina ithumna samkaphang ringphā chi eina kateibingli athumwui kachotkachāng saikorali ithumna ringphā ngasakpai khavai, ana ithumwui kachotkachāng saikorali ithumli ringphā ngasaka. ⁵Khristawui kachotkachāng ithumli pemtai thāda, ithumwui ringphāla Khristawui mangā eina pemtaiya. ⁶Ithumna kachotkachāng phungakha, chi nathumwui ringphā kala huikhamiwui vangna; ithumli ringphā ngasakakha, chi nathumwui ringkaphāwui vangna, chi ithumna phunga kachotkachāng tākam nathumna khāngda eina phung tharan ot ungshunga. ⁷Nathumna kachotkachāngli zangrum thāda ringkaphālila nathumna zangrumra kaji theilaga, nathumwui vang ithumwui kachihān chi nganingtitta lei.

⁸Ivānaobing, Asiali ithumna phunga kachotkachāng chi nathumna theingailaka: ithum ithumwui yāng eina tangda teonalaklak eina khalaphaida, ringkhalui kaji hilila ithumna kachihān suitāhaowa. ⁹Ithum kachichā khalatta machihamla, kathili ringngasaka ithumwui Avāli chihama khavai, ithumna kathiwui tandi samphanga da ningli phaninga. ¹⁰Chikathā kathiwui azakwui eina ana ithumli kanmi, kala latluida kanmira; ana ithumli kanmichingra kaji ithumna ali kachihān thāhaira, ¹¹nathumnala nathumwui seihā kasā eina ithumli ngachonmi thāda, seihā kasā kachungkhawui mangā eina ithumli mi kahai lukhamashanwui lemmetwui vang, mi kachungkhana ithumwui vang ningkashi mira.

Paulwui Khangarān Ngachei

¹²Kaja hi ithumwui lāngso: ithumna okathuili, mataimeikapta nathum eina, ithumwui Avāwui kathar kala ningkathar eina, okathuiwui thangkhamei eina maningla ithumwui Avāwui lukhamashan eina ringrum kaji hi ithumwui mashun-makhuina shākhi mi. ¹³Nathumna pālaga bhap tākhui khangai chi lāngda ithumna nathumli khikha makapikmana, kala nathumna theishingkhuira da ina kachihān lei, ¹⁴nathumna ithumli kaikha bhap tākhui thāda, ithumwui Proho Jishuwui thangli, ithumna nathumwui vang lāngsora thāda nathumnala ithumwui vang lāngsora.

¹⁵Hi kachihān eina, nathumna lukhamashan kakhane samphangpai khavai, ina rimeikapta nathumwuili rānaora da khangarān sai. ¹⁶Macedoniashong vāki tharan nathumwuili vāyang khavai, kala Macedoniawui eina nathumwuili latung khavai, kala Judeali ili nathumna chihovā khavai ina khangarān sai. ¹⁷Hi khangarān tharan ina ning khani sāda leihairala? Lah ina okathuiwui apong eina khangarān sāda, chichangli "Mha, mha" kala "Maningmana, maningmana" da ina hāngla? ¹⁸Ithumwui Avā shitsangkapaiyana thada, nathumli ithumwui tui chi "Mha" kala "Maa" maningmana. ¹⁹Kaja ithumwui Avāwui Naomayara Jishu Khrista, Silvanus, Timothy kala iwui eina nathumwui alungli hāshok kahaia, "Mha" kala "Maa" maningmana, kha awuili atam kachida "Mha" da leichinga. ²⁰Ithumwui Avāna ngashitmi kahai saikora awuili "Mha" da leiching; chiwui vang eina awui tekhamateiwui vang awui mangā einala ithumna ithumwui Avāli "Amen" da hāngna.

²¹Ara nathumla ngasoda Khristali ithumli reisang ngasak kala ithumli neomikhame chiya ithumwui Avā china. ²²Ana ithumlila mahor namda, rārāda kajiwui ngashitmi kahaina awui Manglā Kathara chi ithumwui wuklungli mihaira. ^a a v22 Ngashitmi kahai da khami Greekwui tui hi lan sākasāwui pao akhana — rimeikapta khami aman akhana. Ithumwui Avāna rārāki ot saikorawui rimeikapta khami aman thada Manglā Kathara chi mihaira, ana haokaphok sākahai ot chi ungshung ngasakra da awui ngashitmi kahaina. ²³Ina iwui manglāwui lāngda ithumwui Avāli iwui shākhina da khokhaina, nathumli shivām khavaiwui vang ina Corinthli marātamluimana. ²⁴Nathumwui shitkasang chi ithumna khamung sāli da maningmana, kha nathumwui khamathānwui vang nathumla otsakruma lei, khikhalajila nathumna shitkasang eina nganingtitta lei.