Korint shanga Onou hoba Sangmai
Paulei aeibou maangpona dobü le, khonku danko haoeibü khangenbü kümsilei phoko hoba hau akibüa ongkei naangmaibü, khünei Mühghaü seisihau penan kümda.
1 1Paul, seneibü Bou maangangbü danko Jisu Khristaeibü youkoikjai che, hoba seneibü na Timoti, Korinta kibü seneibü Bou lashong to, hoba Akhaia pendoua kibü saopobü shuong pendou yoa: 2Seneibü Bou hoba Bunyubou Jisu Khrista ka onou hoba sangmai kan la kishi.
Hakso Pendoueibü Bou
3Seneibü Bou, seneibü Bunyubou Jisu Khrista Bou, onou hoba hakso pendou Bou haübou kishi, 4haoei seneibü khonku pendoua sen haksotida, aishanga senei lolo seneibü Bou ka sungletbü hakso danko, aoyou haoeneibü khonku pendoua kibü shuong to senei haksotila thüklabü. 5Khrista khonku sen la sopbojaikei tegü, kho tegü seneibü hakso kei Khrista danko sopbojaida. 6Senei khonkulonga, kho kaneibü hakso hoba khümenbü shanga ki; senei haksotilonga, kho kaneibü hakso shanga ki, aishanga senei khonkubü jetei khonku kanei lounyu natenko loenda. 7Kan shanga seneibü maanglem sekkotham ki, kanei khonkua yobü tegü, kho tegü hakso kei kanei yolabü dogo senei ngeakei.
8Jaisinasi shuong, Asiaa senei kühshuokbü khonku shangabü ngei kan la ngetimangsühda: senei seneibü hau khütoje yongko onatkulangbü ka, khei senei langkei kibü shanga tokei maanglem apbei. 9Senei haibü matjem sungleta dogo dambei, khei senei lolo la apüetla, lausikei lai haibü langngaitibou Bou to ong püetlabü. 10Haoei kho tegü haibü khonku ka sen khümenkei, hoba nyibou sen khümenlabü; haoei sen ponpendou khümenlabü dogo senei hao to maanglema, 11kanei kaneibü welaua sen thuibü tegü, welau juong danko sen la kubü onou jongsak shanga müt juongei sen shanga nyensang kulabü.
Pauleibü Lamthen Sepeibü
12Aishanga ho seneibü sungenbü ki: senei kaodak ka, laubou kan to, seneibü Bou saopobü hoba ngühmaibü danko, kaodakeibü songsihon danko aying lausikei seneibü Bou onou danko langkei kikei dogo seneibü jembü maangponei aukabü kuda. 13Kanei wela hoba ditenla thükbü peisilei ong senei kan la doda, hoba kanei khümbomeiko ditenlabü dogo ngei maanglemda, 14kanei sen shangabü jamde ong ditenbü tegü: seneibü Bunyubou Jisu chaloua, senei kan shangabü sungenlabü tegü kanei sen shangabü sungenlabü.
15Ho püetbü danko, kanei nyiboubü onou haplabü shanga, ngo kan jungto shaang loula lambei. 16Ngo Makedonia to haujinei kan jungto haula, hoba Makedonia ka kan jungto sepeijung loula, hoba kanei ngo Jihuda to hautila ngo lambei. 17Ngei ho lamjinei maangpon sepeibü kümbei lo? Ayingsi ngei phe tegü lamda, khei ngei tangshaitham “Hoat, hoat” hoba “Aying, aying” lauda lo? 18Seneibü Bou ikjai phokua dogo maimaitham ki, khei senei kan to laubü ngüh “Hoat” hoba “Aying” aying. 19Aishanga seneibü Bou Shou, Jisu Khrista, Silvanus, Timoti hoba ngei kan yoa phinthonbü, hao “Hoat” hoba “Aying” aying, lausikei hao to ponpendou “Hoat” ong kikei. 20Seneibü Bouei thekubü ajanjan pendou, hao to khübü “Hoat” ki; kheijinei hao danko kei, haoeibü soneikangbü shanga, senei seneibü Bou to “Amen” lauda.
21Touje seneibü Bouei Khrista to kan yoa sen kaangkhühtham kitida hoba sen la onang naangkukei, 22haoei kei sen maisho khinan, loulabü shanga shieikoebü tegü, haoeibü Soushou Saopobü seneibü maangpona kukei. a a v22 Shieikoebü shanga Grik ngüh kho ku lontibü danko lenbü ngüh che ki — shaangto kulubü nam che ki. Seneibü Bouei Soushou Saopobü kho haibü ka loulabü ajanjan pendoueibü shaangbou phet tegü kuda, hao jaüenbü kho wantilabü dogo haoeibü thekubü ki. 23Ngo kan senetla shanga Korinta to alouenko dogo, ngeibü langkei thüka seneibü Bou aukabü ngakei. 24Senei kaneibü mailem lomda dogokei aying, lausikei kaneibü olin shanga senei kan yoa liko khangenda, aishanga kanei mailemei atopeiko kida.
