२ करिंथकरांस 1

1 ¹ आमच्या पित्याच्या इच्छेने ख्रिस्त येशूचा प्रेषित झालेला पौल, व आमचा बंधू तीमथ्य, ह्यांजकडून करिंथ येथील आमच्या पित्याच्या मंडळीला, तसेच सर्व अखया प्रांतातील सगळ्या पवित्र जनांना: ² आमचा पिता व प्रभु येशू ख्रिस्त ह्यांजकडून तुम्हांला कृपा व शांती असो.

सर्व सांत्वनाचा पिता

³ आमचा पिता, म्हणजे आपल्या प्रभु येशू ख्रिस्ताचा पिता, कळवळ्याचा पिता व सर्व सांत्वनाचा पिता, धन्यवादित असो, ⁴ जो आमच्या सर्व दुःखांत आमचे सांत्वन करतो, ह्यासाठी की, आमच्या पित्याकडून आम्हांला जे सांत्वन मिळते त्याच सांत्वनाने आम्हीही इतरांचे त्यांच्या सर्व दुःखांत सांत्वन करू शकावे. ⁵ कारण जसे ख्रिस्ताचे दुःख आमच्यामध्ये विपुल होते, तसे ख्रिस्ताद्वारे आमचे सांत्वनही विपुल होते. ⁶ आम्ही दुःख भोगतो, तर ते तुमच्या सांत्वनासाठी व तारणासाठी आहे; आमचे सांत्वन होते, तर ते तुमच्या सांत्वनासाठी आहे, आणि जे दुःख आम्ही भोगतो तेच दुःख तुम्ही सहन करत असता ते फलद्रूप होते. ⁷ तुमच्याविषयीची आमची आशा दृढ आहे, कारण आम्हांला माहीत आहे की, जसे तुम्ही दुःखांचे भागीदार आहात, तसेच सांत्वनाचेही भागीदार आहात.

⁸ बंधुभगिनींनो, आशिया प्रांतात आम्हांला जे दुःख सोसावे लागले ते तुम्हांला कळावे अशी आमची इच्छा आहे: आमच्या शक्तीपलीकडे आम्ही असे भारले गेलो की, आम्ही जगण्याचीही आशा सोडून दिली. ⁹ खरे पाहता, आम्हांला मरणाची शिक्षा झाल्यासारखे वाटले, ह्यासाठी की, आम्ही स्वतःवर नव्हे, तर मेलेल्यांना उठवणाऱ्या आमच्या पित्यावर भरवसा ठेवावा. ¹⁰ त्याने आम्हांला अशा मरणाच्या संकटातून सोडवले, आणि तो पुन्हा सोडवील; तो आम्हांला सोडवीतच राहील अशी आशा आम्ही त्याच्यावर ठेवली आहे. ¹¹ तुम्हीही आपल्या प्रार्थनांनी आम्हांला साहाय्य करत असता, ह्यासाठी की, पुष्कळांच्या प्रार्थनांद्वारे आम्हांला मिळालेल्या दानाबद्दल पुष्कळ जणांनी आमच्यासाठी उपकारस्तुती करावी.

पौलाच्या योजनेतील बदल

¹² आमचा अभिमान हा आहे: आमच्या सद्सद्विवेकबुद्धीची साक्ष आहे की, आम्ही जगात—विशेषेकरून तुमच्याशी—आमच्या पित्याच्या पवित्रतेने व सरळपणाने वागलो; जगिक ज्ञानाने नव्हे, तर आमच्या पित्याच्या कृपेने वागलो. ¹³ तुम्ही जे वाचू शकता व समजूही शकता त्यावाचून आम्ही तुम्हांला दुसरे काही लिहीत नाही, आणि तुम्ही पूर्णपणे समजून घ्याल अशी माझी आशा आहे, ¹⁴ जसे तुम्ही आम्हांला अंशतः समजून घेतले आहे: आपल्या प्रभु येशूच्या दिवशी, जसा आम्ही तुमचा अभिमान बाळगू, तसा तुम्हीही आमचा अभिमान बाळगाल.

¹⁵ ह्या भरवशाने, मी आधी तुमच्याकडे येण्याचे योजिले, ह्यासाठी की, तुम्हांला दुसऱ्यांदा कृपा मिळावी. ¹⁶ मासेदोनियास जाताना तुम्हांला भेटावे, आणि मासेदोनियाहून पुन्हा तुमच्याकडे यावे, व तुम्ही मला यहूदीयाकडे पाठवून द्यावे, असे मी योजिले होते. ¹⁷ असे योजताना मी चंचलपणा केला काय? किंवा “होय, होय” आणि “नाही, नाही” असे एकाच वेळी म्हणत, मी देहानुसार योजना करतो काय? ¹⁸ आमचा पिता विश्वासू आहे तितक्याच निश्चयाने, तुमच्याशी बोललेले आमचे वचन “होय” व “नाही” असे नव्हते. ¹⁹ कारण सिल्वान, तीमथ्य व मी ह्यांच्याद्वारे तुमच्यामध्ये गाजवलेला आमच्या पित्याचा पुत्र, येशू ख्रिस्त, “होय” व “नाही” असा नव्हता, तर त्याच्यामध्ये सदैव “होय” असाच होता. ²⁰ आमच्या पित्याने केलेली अभिवचने कितीही असोत, ती त्याच्यामध्ये “होय” अशीच आहेत; म्हणून त्याच्याद्वारे आम्हीही आमच्या पित्याच्या गौरवासाठी “आमेन” म्हणतो.

²¹ आता जो आम्हांला तुमच्यासह ख्रिस्तामध्ये स्थिर करतो व ज्याने आम्हांला अभिषिक्त केले, तो आमचा पिता आहे, ²² ज्याने आम्हांवर शिक्काही मारला व येणाऱ्या गोष्टींचा विसार म्हणून आमच्या अंतःकरणांत आपला पवित्र आत्मा दिला. ²³ मी माझ्या जिवावर आमच्या पित्याला साक्षी ठेवतो की, तुमची गय करावी म्हणून मी करिंथास परत आलो नाही. ²⁴ आम्ही तुमच्या विश्वासावर सत्ता चालवतो असे नाही, तर तुमच्या आनंदासाठी आम्ही तुमच्याबरोबर काम करतो, कारण तुम्ही विश्वासाने स्थिर आहात.