2 Wakorintho 1

1 ¹Paulo, mtume wa Kristo Yesu kwa mapenzi ya Baba yetu, na Timotheo ndugu yetu, kwa kanisa la Baba yetu lililoko Korintho, pamoja na watakatifu wote walioko Akaya nzima: ²Neema na amani zisitokazo kwa Baba yetu na Bwana Yesu Kristo zikae nanyi.

Baba wa Faraja Yote

³Ahimidiwe Baba yetu, Baba wa Bwana wetu Yesu Kristo, Baba wa huruma na faraja yote, ⁴atufarijiye katika mateso yetu yote, ili nasi tuweze kuwafariji wengine katika mateso yao yote kwa faraja ile ambayo sisi wenyewe tunaipokea kutoka kwa Baba yetu. ⁵Kama vile mateso ya Kristo yanavyofurika ndani yetu, ndivyo faraja yetu nayo inavyofurika kwa njia ya Kristo. ⁶Kama tukiteseka, ni kwa ajili ya faraja yenu na wokovu wenu; kama tukifarijiwa, ni kwa ajili ya faraja yenu, itendayo kazi mnapoyavumilia kwa saburi mateso yale yale tunayoyateseka sisi. ⁷Tumaini letu kwenu ni thabiti, tukijua kwamba kama vile mnavyoshiriki katika mateso, ndivyo nanyi mnavyoshiriki katika faraja.

⁸Twataka mjue, ndugu zangu, habari ya mateso tuliyoyapata huko Asia: tulilemewa kupita kiasi, zaidi ya nguvu zetu, hata tukakata tamaa ya kuishi. ⁹Sisi wenyewe tulihisi tumepokea hukumu ya kifo, ili tusijitegemee sisi wenyewe, bali tumtegemee Baba yetu, awafufuaye wafu. ¹⁰Yeye alituokoa katika hatari kubwa ya kifo, naye ataokoa tena; kwake tumeweka tumaini letu kwamba ataendelea kutuokoa, ¹¹kama nanyi mnavyotusaidia kwa maombi yenu, ili wengi watoe shukrani kwa niaba yetu kwa ajili ya kipawa cha neema tulichopewa kwa njia ya maombi ya wengi.

Paulo Abadilisha Mipango Yake

¹²Kwa maana huku ndiko kujisifu kwetu: dhamiri yetu inashuhudia kwamba tuliishi ulimwenguni—hasa kwenu ninyi—kwa utakatifu na unyofu wa Baba yetu, si kwa hekima ya kilimwengu, bali kwa neema ya Baba yetu. ¹³Hatuwaandikii mambo mengine ila yale mwezayo kuyasoma na hata kuyaelewa, nami natumaini kwamba mtayaelewa kabisa, ¹⁴kama vile mlivyotuelewa kwa sehemu: katika siku ya Bwana wetu Yesu, mtajisifu kwa ajili yetu kama nasi tutakavyojisifu kwa ajili yenu.

¹⁵Kwa ujasiri huu, nilikusudia kuja kwenu kwanza, ili mpate neema ya pili. ¹⁶Nilikusudia kupitia kwenu nikienda Makedonia, na kurudi kwenu kutoka Makedonia, ili mnisindikize niende Uyahudi. ¹⁷Je, nilikuwa mwepesi wa kubadilika nilipokusudia jambo hili? Au je, nakusudia kwa kufuata mwili, hata niseme Ndiyo, ndiyo na La, la kwa wakati mmoja? ¹⁸Kama vile Baba yetu alivyo mwaminifu, neno letu kwenu halikuwa "Ndiyo" na "La." ¹⁹Kwa maana Mwana wa Baba yetu, Yesu Kristo, aliyehubiriwa kwenu kwa njia yetu, mimi na Silvano na Timotheo, hakuwa "Ndiyo" na "La," bali sikuzote alikuwa "Ndiyo" ndani yake. ²⁰Maana ahadi zote za Baba yetu, kadiri zilivyo nyingi, katika yeye huwa "Ndiyo"; kwa hiyo kwa njia yake, nasi twasema "Amina" kwa Baba yetu, kwa utukufu wake.

²¹Basi ni Baba yetu atuthibitishaye pamoja nanyi ndani ya Kristo, naye alitutia mafuta, ²²ambaye pia alitutia muhuri, na kutupa Roho wake Mtakatifu mioyoni mwetu kuwa dhamana ya yale yajayo. ^a a v22 Neno la Kiyunani la dhamana ni istilahi ya kibiashara — malipo ya awali. Baba yetu hutoa Roho Mtakatifu kuwa sehemu ya kwanza ya yote yanayokuja bado, ahadi yake kwamba atakamilisha aliyoyaanza. ²³Namwita Baba yetu awe shahidi, kwa uhai wangu, kwamba sikurudi Korintho ili kuwahurumia. ²⁴Si kwamba tunaitawala imani yenu, bali twatenda kazi pamoja nanyi kwa ajili ya furaha yenu, kwa kuwa mnasimama imara kwa imani.