Myeeindo ak Kaalyeet eng' Korinto
Parweet ne po ineegei kosiir ne po Paulo, ne baoryei minikyik eng' nyalilda ak koitoi ineegei kityo eng' nyalulet, ole igesunotkei kimnateetap Kamuktaindet.
1 1Paulo, kayooktoindetap Kristo Jeso eng' mageet ne po Kwandanyo, ak Timoteo ne tupchennyo, asire kaniset ne po Kwandanyo ne mi Korinto, kobooto piik tugul che tiliil che mi Akaia komugul: 2Myeeindo ak kaalyeet ne punu Kwandanyo ak Kiptaiyat Jeso Kristo ingobiit kobooto okweek.
Kwandap Kaigainet Tugul
3Iberuurot Kwandanyo, Kwandap Kiptaiyandennyo Jeso Kristo, Kwanda ne po rireenet ak kaigaigaet tugul, 4ne igaigainech eng' nyalildanyo tugul, si kemuuchi kigaigai alak che mi nyalildanywa tugul, eng' kaigaigaet ne kagisich acheek wegeenyon kobun Kwandanyo. 5Ko uu ye ng'irtagei nyalilwogik che po Kristo kobwanech, ng'irtagei kora kaigainennyo eng' Kristo. 6Ngot kenyalil, ko agobo kaigaineng'wong' ak sorunet; ngot kigaigainech, ko agobo kaigaineng'wong', ne poisyetegei ye omuitoi otononse nyalilda age ne kinyalil acheek. 7Tononot genorwekyok agobo okweek, amu kingen ale ko uu ye otinye kebeberta eng' nyalilwogik, otinye kebeberta kora eng' kaigaigaet.
8Mache keele oegu, che kitupche, agobo nyalilda ne kinyoor eng' Asia: kigoiten miising' kosiir kimnateennyo, kot kegolda genorwogik agot po saboon. 9Kiiten keele kagisich kirwoogetap meet, si kingenor acheek ma wegeenyon, ago Kwandanyo, ne ing'eeti che ki kobek. 10Ki sarwech eng' meet ne oo nooto, ak tuun sarwech kogeny; kaigenor ineendet ale testai kosarwech, 11ye otoreti acheek kora eng' saautikwok, si koweekyi che chaang' kongoi agobo acheek, agobo konunetap myeeindo ne kagigoonech eng' saautik che chaang'.
Walyetap Koyootap Paulo
12Amu ni ko losennyo: paoryei ng'wanindennyo ale kimenye eng' ng'wony—miising' eng' okweek—eng' tiliilindo ak imanitap Kwandanyo, ma eng' ng'omnatetap ng'wony, ago eng' myeeindap Kwandanyo. 13Ma kisirwok kiy age tugul ago ne imuuchi osoman ak kora oguiye, ak agenor ale tuun oguiye tugul, 14ko uu ye kagoguiyech eng' kebeberta: eng' peetuutap Kiptaiyandennyo Jeso, iloskei okweek agobo acheek ko uu ye iloskei acheek agobo okweek.
15Eng' genoreni, ki abwaati ale anyoonjok tai, si osich myeeindo ne po aeng', 16Ki abwaati ale anyoonjok ye awendi Makedonia, ak aweek ole omi kobun Makedonia, ak oyookte anyoon Judea. 17Tos kiawalwalei ye abwaati niito? Anan tos abwaati ko uu poorto, ale Ee, ee ak Achicha, achicha eng' sait agenge? 18Ko uu ye imanda Kwandanyo, ma ki ek ng'olyoondennyo ne kemwaiwok “Ee” ak “Achicha.” 19Amu Weeriitap Kwandanyo, Jeso Kristo, ne kiamdaata eng' kwenung'wong' eng' Silvano, Timoteo, ak anee, ma ki ek “Ee” ak “Achicha,” ago ki ek “Ee” kotugul eng' ineendet. 20Amu kou chaang' kayomiset che ki yai Kwandanyo, mi ineendet ko “Ee”; nooto si eng' ineendet kora, kemwae “Amen” keipchi Kwandanyo, agobo toroornatennyi.
21Nguno ko Kwandanyo ne kimiitech kobooto okweek eng' Kristo ak ne kaiilech, 22ne kong'oochech kora ak ne kigoonech Kabuusennyi ne Tiliil eng' mugulelwogikyok koek kayomiset ne po tuguuk che nyo. a a v22 Ng'olyoondap Kiyunani ne po kayomiset ko ng'olyoondap aldaet—roptetap taai. Igoonech Kwandanyo Kabuuset ne Tiliil koek roptetap taai ne po tuguuk tugul che nyonu, kayomisennyi ale ipata kiy ne ki kotoiyta. 23Aguure Kwandanyo koek paoryandennyu, eng' saboondanyu, ale ma kiaweek Korinto si ariirewok. 24Ma kele kemuuktoi kayaneng'wong', ago kiboisyee kobootok agobo poiboiyeng'wong', amu otononse eng' kayaneet.