2ይ ቆሮንቶስ 1 FHB Father's Heart Bible™

1 ¹ብፍቓድ ኣቦና ሃዋርያ ኢየሱስ ክርስቶስ ዝኾነ ጳውሎስን ጢሞቴዎስ ሓውናን፥ ኣብ ቆሮንቶስ ናብ እትርከብ ቤተ ክርስቲያን ኣቦና፥ ምስቶም ኣብ ብዘላ ኣካይያ ዘለዉ ኵሎም ቅዱሳን፦ ²ካብ ኣቦናን ካብ ጐይታና ኢየሱስ ክርስቶስን ፀጋን ሰላምን ይኹንኩም።

ኣቦ ኵሉ ምፅንናዕ

³ኣቦና፥ ኣቦ ጐይታና ኢየሱስ ክርስቶስ፥ ኣቦ ምሕረትን ኵሉ ምፅንናዕን፥ ቡሩኽ ይኹን፤ ⁴ንሱ በቲ ባዕልትና ካብ ኣቦና እንቕበሎ ምፅንናዕ፥ ንኻልኦት ኣብ ኵሉ መከራኦም ምእንቲ ኸነፅናንዖም፥ ኣብ ኵሉ መከራና የፅናንዓና። ⁵ከምቲ መከራ ክርስቶስ ናባና ዝበዝሕ፥ ምፅንናዕናውን ብክርስቶስ ከምኡ ዝበዝሕ እዩ። ⁶መከራ እንተ ተቐበልና፥ ንምፅንናዕኹምን ንምድሓንኩምን እዩ፤ እንተ ተፀናናዕና ድማ፥ ነቲ ንሕናውን እንቕበሎ መከራ ብትዕግስቲ ኽትፅመምዎ ከለኹም ዝረጋገፅ፥ ንምፅንናዕኹም እዩ። ⁷ከምቲ ኣብ መከራ እትሳተፉ፥ ከምኡውን ኣብ ምፅንናዕ ከም እትሳተፉ ስለ እንፈልጥ፥ እቲ ብዛዕባኻትኩም ዘለና ተስፋ ፅኑዕ እዩ።

⁸ኣቱም ኣሕዋተይ፥ ብዛዕባ እቲ ኣብ እስያ ዝገጠመና መከራ ክትፈልጡ ንደሊ ኢና፤ ካብ ዓቕምና ኣዝዩ ንላዕሊ ስለ ዝኸበደና፥ ብህይወት ክንነብር እኳ ተስፋ ቖሪፅና ነበርና። ⁹ኣብ ርእስና ዘይኮነ ደኣ ኣብቲ ንምዉታን ዘተስኦ ኣቦና ምእንቲ ኽንውከል እምበር፥ ናይ ሞት ፍርዲ ኸም እተቐበልና ኣብ ርእስና ተሰሚዑ ነበረ። ¹⁰ካብ ከምዙይ ዝበለ ናይ ሞት ሓደጋ ኣናገፈና፤ መሊሱ ኸዓ ከናግፈና እዩ፤ ገና ኸም ዘናግፈና ድማ ኣብኡ ተስፋ ገይርና ኣለና፤ ¹¹ንስኻትኩም ድማ ብፀሎትኩም ክትሕግዙና ከለኹም፥ በቲ ብብዙሕ ፀሎት ናባና ዝተውሃበ ናይ ፀጋ ውህብቶ ምእንታና ብዙሓት ምእንቲ ኸመስግኑ እዩ።

ጳውሎስ መደቡ ለወጠ

¹²ትምክሕትና እዝ እዩ፦ ብናይ ዓለም ጥበብ ዘይኮነ ደኣ ብፀጋ ኣቦና፥ ብቕድስናን ብንፅህናን ኣቦና፥ ኣብ ዓለም፥ ብፍላይ ከዓ ናባኻትኩም ከም ዝነበርና ልብና ይምስክረልና እዩ። ¹³ነቲ እተንብብዎን እተስተውዕልዎን እምበር ካልእ ኣይንፅሕፈልኩምን ኢና፤ ምሉእ ብምሉእ ከም እተስተውዕሉ ድማ ተስፋ እገብር ኣለኹ፤ ¹⁴ከምቲ ብኸፊል ዝተረዳእኹምና፥ ብመዓልቲ ጐይታና ኢየሱስ፥ ከምቲ ንሕና ብዛዕባኻትኩም እንምካሕ፥ ንስኻትኩም ድማ ብዛዕባና ክትምክሑ ኢኹም።

¹⁵በዝ ምትእምማን እዙይ ድማ፥ ካልኣይ ፀጋ ምእንቲ ኽትረኽቡ፥ ቅድም ናባኻትኩም ክመፅእ መደብኩ። ¹⁶ናብ መቄዶንያ ክኸይድ ከለኹ ናባኻትኩም ክበፅሕ፥ ካብ መቄዶንያ ድማ ተመሊሰ ናባኻትኩም ክመፅእ፥ ንስኻትኩም ከዓ ናብ ይሁዳ ክትፍንዉኒ መደብኩ። ¹⁷እዙይ ክመድብ ከለኹ እምበኣር ቀላል ዲየ ነይረ? ወይ “እወ፥ እወ”ን “ኣይኮነን፥ ኣይኮነን”ን ብሓንሳእ ምእንቲ ኽብል፥ ከም ፍቓድ ስጋ ዲየ ዝመድብ? ¹⁸ኣቦና እሙን ከም ዝኾነ ርግፅ፥ እቲ ናባኻትኩም ዝበልናዮ ቓል “እወ”ን “ኣይኮነን”ን ኣይነበረን። ¹⁹እቲ ብኣይን ብስልዋኖስን ብጢሞቴዎስን ኣብ ማእኸልኩም ዝተሰብከ ወዲ ኣቦና ኢየሱስ ክርስቶስ፥ “እወ”ን “ኣይኮነን”ን ኣይነበረን፥ ኣብኡ ደኣ ኵልሻዕ “እወ” እዩ ነይሩ። ²⁰ኣቦና ዝኣተዎ ተስፋ ዝኾነ ዅሉ፥ ኣብኡ “እወ” እዩ፤ ስለዙይ ስለ ክብሩ ኢልና፥ ብእኡ ገይርና ንሕናውን ንኣቦና “ኣሜን” ንብል ኢና።

²¹ሕዚ ነቲ ኣብ ክርስቶስ ምሳኻትኩም ዘፅንዐና፥ ዝቐብኣናውን ኣቦና እዩ፤ ²²ንሱ ድማ ዝሓተመና፥ ናይ ዝመፅእ ነገር መረጋገፂ ኽኸውን፥ መንፈስ ቅዱስ ኣብ ልብና ዝሃበና እዩ። ^a a v22 እታ 'መረጋገፂ' ንእትብል ናይ ግሪኽ ቃል፥ ናይ ንግዲ ቃል እያ፦ ቅድመ ክፍሊት። ኣቦና ነቲ ገና ዝመፅእ ዘሎ ዅሉ ነገር ከም ቀዳማይ ክፍሊት ጌሩ፥ ነቲ ዝጀመሮ ኸም ዝውድኦ መረጋገፂ ገይሩ፥ መንፈስ ቅዱስ ይህብ። ²³ምእንቲ ክናሕሰየልኩም ኢለ ናብ ቆሮንቶስ ከም ዘይተመለስኩ፥ ብነፍሰይ ንኣቦና ምስክር ጌረ እፅውዕ ኣለኹ። ²⁴ኣብ እምነትኩም እንገዝእ ዘይኮነ ደኣ፥ ንሓጐስኩም ምሳኻትኩም ሓቢርና እንሰርሕ ኢና እምበር፤ ብእምነት ፅኑዓት ኴንኩም ጠጠው ኢልኩም ኣለኹም እሞ።