2 Corinthnao 2

2 ¹Chiwui vang eina, ina nathumwuili kakhanang eina rāluishita masākhavai da iwuklungli phaninghaowa. ²Kaja ina nathumli kakhanang ngasakakha, ina kakhanang ngasak kahaipa chi maningla khipāna ili ning mathān ngasakra? ³Ina rā tharan ili ning mathān ngasak phalungki kahaibingna ili kakhanang masākhavai, ina hi kapihai; kaja iwui khamathān chi nathum saikorawui khamathānna da nathum saikorali ina chihana. ⁴Nathumli kakhanang ngasak khavai maningla nathumwui vang iwui leikashi khavāt makhalei chi chitheimi khavai, kakhanang haklak eina kala wuklung kachot eina ina nathumli chāra̱ kachungkha eina kapihai.

⁵Kha khipānakha kakhanang ngasak kahaiakha, ana ili maningla, apong akha eina nathum saikorali kakhanang ngasakhaira. Ali ina thākta khami masākhangaimana.

Ali Pheomi kala Ngarānpinghailu

⁶Kaja chikathā mili, yarui chungkhamei mi kahaina shongrān hi shapa. ⁷Chiwui mahutliva, nathumna ali pheomi kala ringphā ngasak phalungra, chithākha ana kakhanang tarākhana pemhaora. ⁸Chiwui vang eina, nathumwui leikashi chi ali phongluishit khavai ina nathumli poli. ⁹Nathumli chāng tamyangda, nathum ot saikorali kahāng nganaida kaji theikhavaila ina hi kapihai. ¹⁰Nathumna khipāli pheomi, ina tākam eina pheomi. Ina pheomi kahai chi, khaleila leiakha, Khristawui miktāli nathumwui vang eina ina pheomihaira. ¹¹Hi Satanna ithumli awor masākhavaina, kaja awui khangarān chi ithumna matheirang maningmana.

¹²Ina Khristawui paokaphā hāshok khavai Troasli rā tharan, Prohowui mangāli iwui vang khāmong akha rakhaowa. ¹³Chithālala imanglā ngasāmkakhui maleithura, kaja iwui achinā Titus chili masamphangmana. Chieina ina athumli matuilaga Macedoniali vāhaowa.

¹⁴Kha ithumwui Avāli ningshisa, ana atam kachida Khristali ithumli mayui khamayonli thānmi, kala ithumwui eina ali theikahaiwui anganam chi apam kachiva̱li ngayao ngasaka. ^a a v14 Maiyuiwui chānpao hi Romewui rai-mayui khamayon akhana, khayuia mai-akhavā akhana awui matoppabing thānda shongfa peida nganamkaphā thao meikashao kajina—Paulna ithumwui Avā awui mibingli Khristawui maiyuili thānmi kaji chi ama thai. ¹⁵Kaja ithumna kahui samphang kahaibing kala shimānhaoki kahaibingwui alungli ithumwui Avāli Khristawui nganamkaphāna. ¹⁶Akhali, kathiwui eina kathili phaki anganamna; khangatei akhali, kharingwui eina kharingli phaki anganamna. Kala hiwui vang khipāna shapra? ¹⁷Kaja mi kachungkhana sāki thada ithum ithumwui Avāwui tui yorshok kahaibing maningmana. Kha awui eina kharā thada ningkathar eina awui miktāli ithumna Khristawui mangāli matui.