2 ቆሮንቶስ 2

2 ¹ስለዚህ ዳግመኛ በኀዘን ወደ እናንተ ላለመምጣት በልቤ ቈረጥሁ። ²እኔ ባሳዝናችሁ፣ ካሳዘንሁት ሰው በቀር ደስ የሚያሰኘኝ ማን ይቀራል? ³ይህን የጻፍሁት መጥቼ ደስ ሊያሰኙኝ ከሚገባቸው ሰዎች ኀዘን እንዳይደርስብኝ ነው፤ ደስታዬ የሁላችሁም ደስታ እንደ ሆነ በሁላችሁ ላይ ተማምኛለሁና። ⁴ከብዙ መከራና ከልብ ጭንቅ የተነሣ በብዙ እንባ ጻፍሁላችሁ፤ ይህም ላሳዝናችሁ ሳይሆን ለእናንተ ያለኝን የተትረፈረፈ ፍቅር ላሳያችሁ ነው።

⁵ማንም ያሳዘነ ቢኖር፣ በመጠኑ ሁላችሁን እንጂ እኔን ብዙ አላሳዘነኝም፤ ይህን የምለው ልከብድበት ስለማልፈልግ ነው።

ይቅር በሉት፣ መልሱትም

⁶እንደዚህ ላለው ሰው ከአብዛኞቻችሁ የተሰጠው ይህ ቅጣት ይበቃዋል። ⁷ስለዚህ አሁን በተቃራኒው ከልክ ባለፈ ኀዘን እንዳይዋጥ ይቅር ልትሉትና ልታጽናኑት ይገባል። ⁸ስለዚህ ፍቅራችሁን ለእርሱ እንደ ገና እንድታረጋግጡ እለምናችኋለሁ። ⁹በሁሉ ነገር ታዛዦች መሆናችሁን ልፈትናችሁና ላውቅ ይህን ደግሞ ጻፍሁ። ¹⁰እናንተ ይቅር የምትሉትን እኔም ይቅር እለዋለሁ። እኔ ይቅር ያልሁት ነገር ቢኖር፣ ስለ እናንተ ብዬ በክርስቶስ ፊት ይቅር ብያለሁ፤ ¹¹ይህም ሰይጣን እንዳያታልለን ነው፤ ተንኰሉን አናጣውምና።

¹²የክርስቶስን ወንጌል ለመስበክ ወደ ጢሮአዳ በመጣሁ ጊዜ፣ በጌታ አንድ በር ተከፈተልኝ፤ ¹³ነገር ግን ወንድሜን ቲቶን በዚያ ስላላገኘሁት መንፈሴ ዕረፍት አጣ። ስለዚህ ተሰናብቻቸው ወደ መቄዶንያ ሄድሁ።

¹⁴ነገር ግን ሁልጊዜ በክርስቶስ በድል ለሚመራንና በእኛ በኩል እርሱን የማወቅን መዐዛ በየቦታው ለሚያሰራጨው ለአባታችን ምስጋና ይሁን። ^a a v14 የድል ጒዞ የሮም ድል አድራጊ ጦር ሠራዊት ሰልፍ ነበር፤ አሸናፊው አዛዥ ምርኮኞቹን እየመራ በመንገዱ ላይ ጥሩ መዐዛ ያለውን ዕጣን ያጨስ ነበር፤ ጳውሎስም አባታችን ሕዝቡን በክርስቶስ ድል እየመራ እንደ ሆነ ይስላል። ¹⁵እኛ በሚድኑትና በሚጠፉት መካከል ለአባታችን የክርስቶስ መዐዛ ነንና፤ ¹⁶ለአንዱ ከሞት ወደ ሞት የሆነ መዐዛ፣ ለሌላው ከሕይወት ወደ ሕይወት የሆነ መዐዛ ነን። ለዚህስ ብቁ የሆነ ማን ነው? ¹⁷እኛ እንደ ብዙዎቹ የአባታችንን ቃል የምንሸቅጥ አይደለንም፤ ነገር ግን በቅንነት፣ ከእርሱ እንደ ተላክን፣ በእርሱ ፊት በክርስቶስ እንናገራለን።