2 KwabaseKhorinte 2

2 ¹Ngakho nganquma ukuba ngingaphindi ngize kini ngokunivakashela okubuhlungu. ²Ngokuba uma nginiphatha kabuhlungu, ngubani osasele ongangijabulisa ngaphandle kwalowo engimphethe kabuhlungu? ³Ngabhala lokhu ukuze, lapho ngifika, labo okufanele bangijabulise bangangiphathi kabuhlungu, nginethemba kini nonke ukuthi injabulo yami iyinjabulo yenu nonke. ⁴Ngisekhatheni elikhulu nasebuhlungwini benhliziyo nganibhalela ngezinyembezi eziningi, ngingafuni ukunidabukisa kodwa ukuba nginibonise uthando oluchichimayo enginalo ngani.

⁵Kodwa uma ekhona obangele ubuhlungu, akangiphathanga kabuhlungu mina kangako, kodwa ngokwengxenye, nonke—angifuni ukuba lukhuni kuye ngokweqile.

Mthetheleleni Nimbuyisele

⁶Kuloyo muntu, lesi sijeziso esabekwa yiningi sanele. ⁷Ngakho manje kunalokho kufanele nimthethelele nimduduze, funa agajwe usizi oludlulele. ⁸Ngakho ngiyanincenga ukuba niqinise futhi uthando lwenu ngaye. ⁹Yingakho futhi ngabhala: ukuba nginivivinye ngazi ukuthi niyalalela yini kukho konke. ¹⁰Noma ngubani enimthethelelayo, nami ngiyamthethelela. Lokho engikuthethelele—uma kukhona—ngikuthethelele ngenxa yenu phambi kukaKhristu, ¹¹ukuze singakhohliswa nguSathane—ngokuba amacebo akhe kawasifihlakalele.

¹²Kwathi ngifika eTrowasi ukushumayela ivangeli likaKhristu, kwavulwa umnyango kimi eNkosini, ¹³kodwa umoya wami wawungenakho ukuphumula, ngokuba angimtholanga lapho umfowethu uThithu. Ngakho ngavalelisa ngedlulela eMakedoniya.

¹⁴Kodwa makabongwe uBaba wethu, osihola njalo ekunqobeni kuKhristu futhi ngathi usabalalisa yonke indawo iphunga elimnandi lokumazi. ^a a v14 Umkhosi wokunqoba wawuyibutho lamaRoma elidumisa ukunqoba, lapho induna eyayinqobile yayihola phambili izithunjwa zayo futhi ishisa impepho enukelela kamnandi endleleni—uPawulu ufanisa uBaba wethu ehola abantu bakhe ekunqobeni kukaKhristu. ¹⁵Ngokuba siyiphunga elimnandi likaKhristu kuBaba wethu phakathi kwalabo abasindiswayo nalabo ababhubhayo, ¹⁶kwabanye, iphunga elisuka ekufeni liye ekufeni; kwabanye, iphunga elisuka ekuphileni liye ekuphileni. Pho ngubani owanele lokhu? ¹⁷Ngokuba asinjengabaningi, abathengisa izwi likaBaba wethu, kodwa ngobuqotho, njengokuvela kuye, phambi kwakhe, sikhuluma kuKhristu.