Nathum Ithumwui Chithina
Kachitheiwui chithi khuiungkahai mi kaikha rāhaira. Paulna ngahānkai, Corinthnaobing khalattana awui chithina, kharinga ithumwui Avāwui Manglā eina miwui wuklungli kapisanghai. Ana ngalung lungphekli yekkakhui kadhara, tekhamatei leilala makhangatha̱, chi katang makhavai kadharawui mangāli haia, chili mairār khuithuida ningkhān lei.
3 1Ithumna ithum khalatta latluida chitheikhui khavai haokaphoklirala? Lah mi kaikha thāda ithumna nathumli lah nathumwui eina kachitheiwui chithi khavāt leira? 2Nathum khalatta hi ithumwui wuklungli kapisang, mi saikorana theihaida pāki kaji ithumwui chithina. 3Nathum Khristawui eina rā chithi, ithumna chihovā kahai da nathum khalatta chitheikhui; muk eina maningla kharinga ithumwui Avāwui Manglā eina, ngalung lungphekli maningla miwui wuklungwui lungphekli kapisanghai.
4Khristawui mangā eina ithumwui Avāli ithumna hikathā ning khanganung lei. 5Ithum khalattali khikha akhanidala ithum khalattawui da shānkhui khavai ithum sāshap kaji maningmana, kha ithumwui sāshap chi ithumwui Avāwui einana. 6Ana ithumli kadhara tuingashit chiwui otram ngatha̱ khavai sāshap ngasakhaira. Hi chithi eina maningla Manglā einana. Kaja chithina shaothata, kha Manglāna ringngasaka.
Kadhara Kadhar Horkhangai Hora
7Kaja ngalungli chithi eina yekkakhui kaji kathiwui otram khangatha̱ china tekhamatei eina rāsai. Pa̱tāki kaji tekhamatei chiwui vang Israelnaobingna Moseswui maili mayangpaithuwa. Chi hikathā tekhamatei eina raakha, 8Manglāwui otram khangatha̱ china tekhamatei reikhameiya eina reikhameia marānikhala? 9Kaja mayāwui otram khangatha̱li tekhamatei leiakha, khamashung khangarongwui otram khangatha̱ chi tekhamatei eina langmeikharda hakmeikhāra! 10Tekhamatei kasā kaji chi, hakkhamahā tekhamateina reikhameiwui vang, ara tekhamatei maleiluimana. 11Kaja pa̱tāki kaji china tekhamatei eina raakha, ngasāchinga kaji chiwui tekhamatei chi khi reikhameirakhala!
12Hikathā kachihān khaleiwui vang ithumna malung pinglak khamataia eina ot sāli. 13Ithum Moses thāda maningmana, ana awui maili mairār farorpama, chieina Israelnaobingna pa̱tāki kaji chiwui khanao chi mayangpaithuwa. 14Kha athumwui ning makang ngasakhaira. Ara phei kateka eina tangdala, kachama tuingashit chi pā tharan, chiya mairār china makhāngkhui kaji ngasāchinga, kaja Khristali maningla chi raihaira. 15Mha, phei kateka eina tangdala, Moses chi pā tharan kachida, athumwui wuklungtungli mairār akha lei. 16Kha khipākhala ithumwui Proho Jishushong ngareithui tharan kachida, mairār chi khuithuihaira. 17Ithumwui Proho Jishu china Manglāna, kala ithumwui Proho Jishuwui Manglā leilakha chili, ningkhān lei. a a v17 Paulna hili matakhakhai kahai theikhui akha hānga: Israelna ngareithui kaji Proho kala ningkhān rāmi kaji Manglā chi Vare akhamānga—ngararok khangarok pangshap khani maningla, kha wuklung chi ningkhān ngasak khavai ot sāki Avā, Anaomayara kala Manglā Kathara akhamānga. 18Ithum saikora amai makuirunla ithumwui Proho Jishuwui tekhamatei chi yangtitta, tekhamatei eina tekhamateili tākam ama̱ chili onchang onngasakhaora; hi Manglā kaji ithumwui Proho Jishuwui eina kharāna.
