Okweek Ko Parweennyo
Kibwa piik che cheeng'ei ole mi Paulo, koip paronok che booruni icheek. Kowolu Paulo kole piigap Korinto icheegei ko parweennyi, ne kisiraat eng' Kabuusetap Kwandanyo ne sobe eng' mugulelwegap piik. Kotononchi arorutyet ne ki kisir eng' koik, ne tinye toroornatet ago ne istoegitu, ak arorutyet ne meng'u, ole kewoguni togeet ak kewoguni piik.
3 1Tos kitaune keboorunegei kogeny? Anan kemage echeek, ko uu alak, paronok che booruni agobo echeek, che koit okweek anan che punu okweek? 2Okweek ko parweennyo, ne kisiraat eng' mugulelwekyok, ne ingen ak ne isomani piik tugul. 3Oboorunegei ole oo parweet ne punu Kristo, ne ki kiip echeek—ne ki kisir ma eng' peegap sireet ago eng' Kabuusetap Kwandanyo ne sobe, ma eng' koik ago eng' mugulelwegap piik.
4Ni kayaneet ne kitinye eng' Kristo koba Kwandanyo. 5Ma kele kemuuchi echeek acheeget kenam kiy age tugul kele ki po echeek, ago muchnatennyo ko punu Kwandanyo. 6Kiyaiywech kemuuchi keboisyee arorutyet ne leel—ma ne po sireet ago ne po Kabuuset. Amu sireet ko barei, ago Kabuuset ko igoochin saboondo.
Iluuei Arorutyet ne Leel Kosiir
7Ngot ki pwa minitap meet, ne ki kisir tisyonik eng' koik, eng' toroornatet ne oo nooto si ma komuuch piigap Israel konyali togeennyi Musa amu toroornatennyi—toroornatet ne ki istoegitu, 8Tos ma nyoonei minitap Kabuuset eng' toroornatet ne oo kosiir? 9Amu ngot ki tinyei minitap kirwooget toroornatet, ara koeet minitap imanda kong'irtagei eng' toroornatet kosiir! 10Ne ki tinyei toroornatet ko ma tinyei toroornatet nguno, amu kigosiir toroornatet ne oo kosiir. 11Amu ngot ki pwa ne ki istoegitu eng' toroornatet, ara koo toroornatetap ne tebee koigeny!
12Amu kitinye mang'unet ne uu nooto, keyae eng' nyigoonet ne oo. 13Ma kiboigei Musa, ne ki tuge togeennyi kitambaet si ma komuuch piigap Israel konyali kagesunetap ne ki istoegitu. 14Ago ki kiuit mindilileennywa. Agoi nguno, komenyei kitambaet ne no ye kisoman arorutyet ne po keny—ne ma kiisto, amu eng' Kristo kityo ne kiisto. 15Ee, agoi nguno, ye kisoman Musa, koru kitambaet eng' mugulelwekwak. 16Ago ye koweekyigei chii age tugul Kiptaiyandennyo Jeso, keistoi kitambaet. 17Kiptaiyandennyo Jeso ko Kabuuset, ak ole mi Kabuusetap Kiptaiyandennyo Jeso, komi katyagnatet. a a v17 Imwae Paulo yu kiy ne oo: Kiptaiyat ne koweekyigei Israel ak Kabuuset ne ibu katyagnateet ko Kamuktaindet agenge—ma kimnotik aeng' che pooryotos, ago Kwanda agenge, ak Weeriit, ak Kabuuset ne Tiliil, che boisyei si kotyaach muguldo. 18Acheek tugul, che ma tuch togoochik, che konyali toroornatetap Kiptaiyandennyo Jeso, kewalegitui koek image ne no, kong'etee toroornatet koba toroornatet, ko uu ne punu Kiptaiyandennyo Jeso, ne ko Kabuuset.