Ikwenyei lapkeiyetap Kwanda eng' acheek
Ki mwaei piik kole tinyei Paulo ng'aalseet ak kabwaatosyek che oosen, ago kowol ineendet kole imwaei imanit kityo komyee. Kiboorunot keele ma po ineendet kimnateet: kinyaliili, kogereer met, kigewiir ng'wony, ago ma king'emaksei. Mi konorweet eng' tereenik che po ng'ung'unyek, ak teweernatetap tereenik ko kiy ne oo, si komenye liilindo kobooto Kwanda.
Ng'alaali Kwandanyo eng' mustari 6
4 1Nooto anyun, amu kitinye minichu eng' rireenet ne kiboorwech, ma kiwandogei. 2Ago kagibagakta tuguuk che kiuun che po teweernateet. Ma kiboisyee ng'aalseet, anan kiwal ng'olyootap Kwanda. Ago kiboorchin iman imanit, kiboorunotkei eng' kabwaatetap chii age tugul eng' taitap Kwanda. 3Agot ngo ki kiguberi logoiywekyok che myach, ko kiguberi eng' che beeti. 4Eng' icheek, kagoitunen kamuktaindet ne po ng'wonyuni mindilileegap che ma yani, si ma komuuch kogeer lapkeiyetap logoiywek che myach—liilindap Kristo, ne itoondap Kwanda. a a v4 Yu ko "kamuktaindet ne po ng'wonyoni" ko punyondet ne iitunen piik koonyek, ma Kwanda — ng'olyoondet ne kisiri eng' leetweet ne ming'in koboorunei ne lembe, ne ibandai lapkeiyet ne kiyachi lagogyik. 5Ma kiaamda acheek, ago Jeso Kristo ko Kiptaiyat—ak acheek ko otwogikwok agobo Jeso.
6Amu Kwanda, ne ki le, “Ingokweny lapkeiyet kobun mesundeito,” kagokweny eng' muguleldennyo, koonech lapkeiyet—naetap liilindap Kwanda eng' togeetap Jeso Kristo.
7Kitinye konorwenini eng' tereenik che po ng'ung'unyek, si koek kimnateet ne siirei ne po Kwanda, ma ne kibunei acheek. 8Kinyalilech eng' ortinwek tugul, ago ma kiiri; kigereer met, ago ma kibeet kabwaatennyo; 9kigeusaus, ago ma kibagaktakei; kigewiir ng'wony, ago ma king'emaksei. 10Kiibu kotugul meetap Jeso eng' poorto, si koborunotkei saboondap Jeso agine eng' poorwekyok. 11Acheek che sobe ko kigoonorech meet kotugul agobo Jeso, si koborunotkei saboondap Jeso agine eng' poorwekyok che ng'emaksei. 12Nooto anyun, poisyei meet eng' acheek, ago saboondo eng' okweek.
13Kitinye kabuusetap kayaneet ne tupchi, ko uu ye kisir: “Ki ayan, nooto ka ang'alaal,” kiyani acheek kora, nooto king'alaali acheek kora, 14kingen keele ne ki ing'eet Kiptaiyat Jeso ko koing'eetech agine kobooto Jeso, ak kointech, kobooto okweek, eng' tainnyi. 15Tuguuchu tugul ko agobo okweek, si koteskei myeeindo kobwa piik che chaang', ak konyiit kongoi ne po liilindap Kwanda.
16Nooto anyun, ma kiwandogei. Agot ngo ng'emaksei chiinnyo ne po saang', ko iweegun chiinnyo ne po oriit peet ak peet. 17Amu nyalilda ne ming'in ne po sait ne ngerin, ko koyaiywech weigeetap liilindo ne po koigeny ne ma kiroge, 18si kitokyi konyeguk ma tuguuk che taagu, ago tuguuk che ma taagu; amu tuguuk che taagu ko che beeti, ago tuguuk che ma taagu ko che po koigeny.