Mi eng' bukuit

2 Korintoek 5 FHB Father's Heart Bible™

Kiistoi 15% eng' kiy ne iale korook →
Bukuit

Koonnyo ne po Koigeny kobooto Kwanda

Ietoi Paulo amune koeesyoi koboisyee poortanyi. Ng'emak emainnyo ne po ng'wony, ak koganyei koot ne punu Kwanda. Ipeei ineendet chamyetap Kristo, ak koganyei ineendet ng'echereetap kirwoogetap Kristo. Kigoito Kwanda ng'wony kobooto ineegei, ak koibei Paulo soomeetooto ko uu tongoaniat.

Sura 5.

Kingen keele, ngot ko ng'emak emainnyo ne po ng'wony ne kimenye, ketinye teekseet ne punu Kwandanyo, koot ne ma kiteech eunek, ne po koigeny eng' kipsengwet. Amu ketigeni eng' emaitni, kigeni keelaakyigei koonnyo ne po kipsengwet, ngot ko iman, ye kagelaakyigei, ko matook keele kimi aach ngor. Ye kemi eng' emaitni, ketigeni ak kinyigiisitu—ma kemache keireegu ngoroik, ago kelaakyigei kosiir, si kobiit kolugui saboondo kiit ne ng'emaksei. Nguno, ineendet ne ki ichopech agobo kiini ko Kwandanyo, ne ki igoonech Kabuuset ne Tiliil koek tongoaniat.

Nooto anyun, kimang'u kotugul, kingen keele ye kemenye eng' poorto, kemi loo ak Kiptaiyat, amu kebendi eng' kayaneet, ma eng' keeret. Kimang'u anyun, ak kigeere komyee kemang'une poorto si kemenye kobooto Kiptaiyat. Nooto anyun, ngo kemenye koo anan ngo kemi loo, kigeni keboiboiyon ineendet. Amu konyolu kepwoonei echeek tugul taitap ng'echereetap kirwooget ne po Kristo, si konyooru chii age tugul kiit ne nyolu agobo ne ki yai eng' poorto, ngo myee anan ngo ya.

Kaiyomtoisyoge ak Kiyookse koek Kiyooktoik

Nooto anyun, kingen ng'wandutap Kiptaiyat, kigaigai piik; kiboorunot eng' taitap Kwandanyo, ak amang'u keele kiboorunot agine eng' kabwaateng'wong'. Ma kelosegei echeek kogeny eng' okweek, ago kigoonok poroindo si olosgei agobo acheek, si otinye ne owolji che losegei eng' togeet, ma eng' muguleldo. Ngo keng'oluuge, ko po Kwandanyo; ngo kemi eng' kabwaatennyo ne myee, ko po okweek. Amu ichirchirech chamyetap Kristo, amu kingen komyee keele: ki me agenge agobo tugul, nooto anyun kame tugul. Ki me agobo tugul, si ma kosob che sobtos agobo ineegei, ago agobo ineendet ne ki me agobo icheek ak kiging'eeta.

Nooto anyun, kobooch nguno, ma kingen chii age tugul eng' kakwaetap chiito. Ki kingen Kristo agine ko uu nooto, ago mata kingen kou nooto. Nooto anyun, ngo mi chii age tugul eng' Kristo, ko yaeet ne leel! Kagoba tuguuk che kong'etee; keero, kagonyo che leel! Tuguuchu tugul ko punu Kwandanyo, ne ki iyomisyoech ak ineegei kobun Kristo, ak kogoonech minitap iyomtoiyet: a a v18 Taunei iyomtoiyet eng' muguleldap Kwandanyo inyeegei—ineendet ko ne cheeng'ech si koibech koo, ak Jeso ko ooreet ne yaune ineendet nooto. Ko ni, eng' Kristo ko ki iyomisyi Kwandanyo ng'wony ak ineegei, ma kiititei icheek ng'oogisyekwak, ak koinde eunennyo ng'olyootap iyomtoiyet.

Nooto anyun, ki echeek kiyooktoigap Kristo, ko uu ye riirchinok Kwandanyo kobun acheek. Kiriirchini agobo Kristo: Oiyomisyoge ak Kwandanyo. Agobo acheek, ko ki yai ineendet ne ki ma ngen ng'oogisto koek ng'oogisto, si kobiit keegu echeek imandap Kwandanyo eng' ineendet.