2 Corinthnao 5

5 ¹Ithumna thei: ithumwui okathuiwui kachonshim hi sakhaihaiakha, ithumna kazingramli katang makhavai, pāng eina makasā, ithumwui Avāwui eina kharā shim akha leira. ²Kaja hi kachonshimli ithumna ringāda, ithumwui kazingramwui pamkhavai eina sāri sang khavai longa. ³Kachangkhat eina, ithumna chi sanghaiakha, asāmsai eina matheipaimara. ⁴Hi kachonshimli ithumna khalaphaida ringāda lei. Kharingna mathan chi mayuisang khavai, ithumna kachon pheokhavai maningla atungli sang khavai longa. ⁵Ara ot hiwui vang ithumli ngarān khame, khudam sāda ithumli Manglā Kathara khame chiya ithumwui Avā china.

⁶Chieina phasāli pamda leilakha ithum Proho eina ngara̱da lei kaji theida, ithumna atam kachida ning nganinga. ⁷Kaja ithumna shitkasang eina zata, theikahai eina maningmana. ⁸Chieina ithumna ning nganinga, kala phasāli ngalanlaga Proho eina ngasokapam khavai phāmei da phaninga. ⁹Chieina kapama leilala, ngara̱li leilala, ali ningyāng ngasak khavai kasā hi ithumwui otna. ¹⁰Kaja mi kachiva̱na phasāli sākahai, kaphāla makaphāla, chiwui athishurda samphangkhangayi chi samphang khavai, ithum saikora Khristawui bichar pam mangāli rānganingra.

Ngashimhaida Kala Paomebing Sāda Chihovā

¹¹Chieina Prohowui khangachee chi theida, ithumna mibingli shitsang khavai hotnai; ithum ithumwui Avāwui mangāli phongshar eina lei, kala nathumwui mashun-makhuili phongshar eina lei da ina kachihāna. ¹²Ithumna khalattali nathumli latluida khuisang maningmana, kha wuklungli maningla zakmai eina lāngso mibingli nathumna ngahānkā chi samphang khavai, nathumli ithumwui vang lāngso kashap mihaira. ¹³Ithumwui ning kāhaiakha, chi ithumwui Avāwui vangna; ithumwui ning khamashung leilakha, chi nathumwui vangna. ¹⁴Kaja Khristawui leikashina ithumli kasatmi, kaja ithumna hi shitsangchaowa: akhana saikorawui vang thihaira, chieina saikora thihaira. ¹⁵Ana saikorawui vang thihaira, chieina kharingabing chi khalattawui vang latluida maringmana, kha athumwui vang thida ringshok ngasak kahai chiwui vang ringra.

¹⁶Chieina ara eina thuida, ithumna mi kateili okathuiwui ningphun-ningrin eina matheiluimana. Ithumna Khristali chithāda theisi, kha ara matheiluimana. ¹⁷Chieina khipānakha Khristali leiakha, a midhar khangasā akhana! Khare chi kānhaira; yanglu, kadhar rāhaira! ¹⁸Hi saikora ithumwui Avāwui eina kharāna, ana Khristawui mangā eina ithumli a khalattali ngashimmi, kala ithumli ngashimwui otram khangatha̱ mihaira: ^a a v18 Ngashim hi ithumwui Avā khalattawui wuklungli haophokna—ana ithumli shimli hanunglui khuirā khavai pāng khalankhame chi ana, kala Jishuva ana chi sāwui apongna. ¹⁹Chi hi, Khristali ithumwui Avāna okathuili a khalattali ngashimda leisai, athumwui morei chi athumwuitungli mashānhaila, kala ithumli ngashimwui pao horsangmi.

²⁰Chieina ithumwui Avāna ithummor eina kapo kathada ithum Khristawui vang paomebingna. Khristawui vang eina ithumna kapona: ithumwui Avāli ngashimchaolu. ²¹Awui lungli ithum ithumwui Avāwui khamashung khangarong ngasā khavai, ithumwui vang eina morei matheila chi ana morei sāngasaka.