Ara Chi Huikhamiwui Ngashunna
Paul na awui kashākhi chitheia, kala chibing chi shaokhami, phātop, ngayā mapikakhui, kala maikashi da. Chiwui thili ana ngachukngarok chi haida kapo mimāng sai: awui wuklung chonkhavai rāhaira, kha athumwui wuklung chi nganukhaira. Ana athumli meoma̱ bingwui eina khuishokda ithumwui Avāwui khalatta naomayarabing kala naongalāva̱bing thāda ringranu da kapo.
6 1Awui ot sakhangarumbing sāda, ithumwui Avāwui lukhamashan chi nathumna aremali masamphang khavai ithumna nathumli kasatsanga.
2Kaja ana hānga, "Atam kaphāli ina nali shāhaira; huikhamiwui ngashunli ina nali ngachonmi." Yanglu, ara chi atam kaphāna; yanglu, ara chi huikhamiwui ngashunna.
3Ithumwui otram khangatha̱li khipānakha maphen khavai, ithumna khipākhawui shongfali makhārkaphin masāmana. 4Chiwui mahutliva, ithumna ot saikorali ithum khalatta ithumwui Avāwui raobing sāda chitheingai: khāngkathei kahakva eina, kachotkachāngli, rekakharek, kasakli, 5shaomi, phātopli chungmeida, kuikazāli, ot kasāli, ngayā mapikakhuili, kathaili; 6tuimatuili, theikakhuili, ningzinghāringda, lukhamashanli, Manglā Katharali, kāshunglak leikashili, 7mashun tuili, ithumwui Avāwui pangshapli, yāpang kala kaipangwui vang khamashung khangarongwui khutlai eina, 8khayākakā kala maikashi eina, mashāt kala masot eina. Ithumli sākharekbing sāda shānkhuiya, chithālala ithum mashunna; 9makatheiya thāda, chithālala kathei kahaina; kathi thāda, kala yanglu, ithum ringda lei; tandi khami thāda, chithālala mashaothatmana; 10kakhanang thāda, chithālala atam kachida khamathān; kachāma thāda, chithālala mi kachungkhali shāng ngasak; khikhala makhaleiya thāda, chithālala ithumli saikora lei.
11O Corinthli mibing, ithumna nathumli tharzā eina hānghaira; ithumwui wuklung nathumli chonkhavai rākahaina. 12Ithumna nathumli manganukngasakmana, kha nathum nathum khalattawui wuklungli nganuk kahaina. 13Iwui naongarāli hāng thāda ina hāngna. Athishurda nathumwui wuklungla chonkhavai raklu.
Avāwui Shimkhurli Mai Latungulu
14Mashitkasangbing kathāli mangasoalu. Kaja khamashung khangarong kala moreina khi ngarumrakhala? Lah kahorna tangkhamang kathāli khi ngarumsak leikhala? 15Khrista kala chipeewui ngachaili khi ningngai leikhala? Shitkasanga akhana mashitkasanga akhali khi ngarumra?
16Ithumwui Avāwui khorumshimna meoma̱ kathāli khi sharuk leikhala? Kaja ithum kharinga Avāwui khorumshimna, ana hāngkahai thada: "Ina athumwui alungli okthuira kala athumwui alungli yaothuira; I athumwui Avā ngasāra, kala athum iwui mi ngasāra." 17Chiwui vang eina, "Athumwui alungli eina khuishoklu kala ngatei pamlu, da ithumwui Avāna hānga, kala makathar khikha masingalu; chieina ina nathumli samphangkhuida, 18kala ina nathumwui Avā ngasāra, kala nathum iwui naomayarabing kala naongalāva̱bing ngasāra, da ithumwui Avā, Sāshap-pangshapana hānga." a a v18 Achālakha ithumwui Avāna Davidwui awunga naomayarali kasā ngashit chi, hikatharan ana shitkasang saikorali shongasakhaira — awuili kharābing saikorawui Avā ngasāda, kala ithum awui naomayarabing kala naongalāva̱bing ngasāra.
