2ይ ቆሮንቶስ 6 FHB Father's Heart Bible™

6 ¹ምስኡ እንሰርሕ ኴንና፥ ፀጋ ኣቦና ብኸንቱ ከይትቕበሉ ንምሕፅነኩም ኣለና።

²ንሱ ከምዙይ ይብል እዩ እሞ፦ “ብግቡእ ግዜ ሰማዕኩኻ፥ ብመዓልቲ ምድሓን ረዳእኩኻ።” እንሆ፥ ሕዚ ግቡእ ግዜ እዩ፤ እንሆ፥ ሕዚ መዓልቲ ምድሓን እዩ።

³ኣገልግሎትና ከይንቀፍ ኢልና፥ ንዝኾነ ሰብ ዕንቅፋት ኣይንገብረሉን ኢና። ⁴ብኣንፃሩ ደኣ፥ ብብዙሕ ትዕግስቲ፥ ብመከራ፥ ብስቓይ፥ ብጭንቂ፥ ከም ኣገልገልቲ ኣቦና ኴንና፥ ንባዕልና ብዅሉ ነርኢ ኢና፤ ⁵ብመውቃዕቲ፥ ብማእሰርቲ፥ ብህውከት፥ ብፃዕሪ፥ ብዘይ ድቃስ ለይቲ፥ ብጥሜት፤ ⁶ብንፅህና፥ ብፍልጠት፥ ብዓቕሊ፥ ብሕያዋይነት፥ ብመንፈስ ቅዱስ፥ ብናይ ሓቂ ፍቕሪ፥ ⁷ብቓል ሓቂ፥ ብሓይሊ ኣቦና፥ ነቲ የማንን ነቲ ፀጋምን ብኣፅዋር ፅድቂ፥ ⁸ብኽብርን ብውርደትን፥ ብክፉእ ወረን ብፅቡቕ ወረን፤ ከም መስለይቲ ንቝፀር፥ ሓቀኛታት ክነስና፤ ⁹ከም ዘይንፍለጥ ኴንና፥ ፍሉጣት ክነስና፤ ከም ንመውት ኴንና፥ እንሆ ድማ ህያዋን ኢና፤ ከም እንቕፃዕ ኴንና፥ ዘይንቕተል ክነስና፤ ¹⁰ከም እንሓዝን ኴንና፥ ኵልሻዕ ሕጉሳት ክነስና፤ ከም ድኻታት ኴንና፥ ንብዙሓት ነህብትም ክነስና፤ ዋላ ሓደ ዘይብልና ክነስና፥ ኵሉ ዘለና ኢና።

¹¹ኦ ቆሮንቶሳውያን፥ ብግልፂ ተዛረብናኩም፤ ልብና ድማ ንኣኻትኩም ርሒቡ ተኸፊቱ ኣሎ። ¹²ብኣና ኣይተፀበብኩምን፤ ኣብ ልብኹም ደኣ ተፀቢብኩም እምበር። ¹³ኣብ ክንድኡ፥ ከም ንውሉደይ እዛረብ ኣለኹ፥ ንስኻትኩምውን ልብኹም ኣርሕቡ።

ናብ ስድራ ቤት ኣቦ ተመለሱ

¹⁴ምስ ዘይኣምኑ ብሓደ ኣይትፀመዱ። ፅድቅን ዓመፅንከ እንታይ ይማቐሉ? ወይ ብርሃን ምስ ፀልማት እንታይ ሕብረት ኣለዎ? ¹⁵ኣብ መንጎ ክርስቶስን ድያብሎስንከ እንታይ ስምምዕ ኣሎ? ኣማኒ ምስ ዘይኣማኒከ እንታይ ይማቐል?

¹⁶ቤተ መቕደስ ኣቦናከ ምስ ጣዖታት እንታይ ሕብረት ኣለዎ? ንሕና ቤተ መቕደስ እቲ ህያው ኣቦ ኢና እሞ፥ ከምዙይ ኢሉ፦ “ኣብ ማእኸሎም ክነብርን ክመላለስን እየ፤ ኣቦኦም ክኸውን እየ፥ ንሳቶም ከዓ ውሉደይ ክኾኑ እዮም።” ¹⁷ስለዙይ፦ “ካብ ማእኸሎም ውፁ፥ ተፈለዩ ኸዓ፥ ይብል ኣቦና፥ ርኹስ ነገርውን ኣይትንከዩ፤ ሽዑ ኽቕበለኩም እየ፥ ¹⁸ኣነ ኸዓ ኣቦ ክኾነኩም እየ፥ ንስኻትኩምውን ኣወዳትን ኣዋልድን ክትኮኑኒ ኢኹም፥ ይብል እቲ ዅሉ ዝኽእል ኣቦና።” ^a a v18 እታ ኣቦና ቐደም ነቲ ንጉሳዊ ወዲ ዳዊት ዝኣተዋ ተስፋ፥ ኣብዙይ ንነፍሲ ወከፍ ኣማኒ ይኸፍታ ኣሎ፤ ነቶም ናብኡ ዝመፁ ዅሎም ኣቦ ይኾኖም፥ ንሕናውን ኣወዳቱን ኣዋልዱን ንኸውን።