Cincino Ndi Ntsiku ya Upulumuki

Paulo apereka pinthu pyakupangiza utumwi wace, na pyenepi ndi kumenywa, kufungwa m'kaidi, masiku akusowa tulo na kunyozedwa. Natenepa iye asiya kutsutsana mbacondera basi: ntima wace ndi wakufunguka kakamwe, mbwenye wawo ndi wakufungika. Iye aaphemba toera abuluke m'mafano mbakhala ninga ana a Baba enekhene, amuna na akazi.

Kapitulu 6.

Ninga anyabasa pabodzi na Iye, tisakudembeterani toera mukhonde kutambira kukoma ntima kwa Baba wathu mwapapezi.

Thangwi Iye asalonga tenepa: “N'dzidzi wakuthema ndakubvani; pa ntsiku ya upulumuki ndakuphedzani.” Onani, cincino ndi n'dzidzi wakuthema; onani, cincino ndi ntsiku ya upulumuki.

Ife nkhabe kuikha cipingizo munjira mwa munthu m'bodzi, toera mu utumiki wathu mukhonde kugumanika cinthu cakuipa. Mbwenye, m'pyonsene tisapangiza kuti ndife atumiki a Baba wathu: na kupirira kukulu, mu nyatwa, mu pyakunentsa, mu mabvuto, mu kumenywa, mu kumangwa n'kaidi, mu kupokoswa, mu mabasa akunentsa, mu masiku akukhonda gona, mu njala; na kucena, na kudziwa, na kulolera, na udidi, na Nzimu Wakucena, na kufuna kwandimo, na mafala andimo, na mphambvu za Baba wathu, na pida pyankhondo pya kulungama pya n'djanja ya madyo na pya n'djanja ya bzwere, mu mbiri na mu kunyozeka, mu kusedzerwa na mu kusimbwa. Tisaonwa ninga anyakunyengeza, mbwenye ndife andimo; ninga akukhonda dziwika, mbwenye adziwika mwadidi; ninga anafa, mbwenye onani, tiri na moyo; ninga akulangwa, mbwenye nkhabe kuphiwa; ninga akutsukwala, mbwenye ndzidzi onsene akutsandzaya; ninga akucerenga, mbwenye tisapfumisa azinji; ninga akusowa cinthu, mbwenye tiri na pyonsene.

Ife talonga namwe mwakusudzuka, imwe Akorinto; ntima wathu wafunguka kwa imwe mwakukulu. Imwe nkhabe kucepeswa mwa ife, mbwenye musacepeswa mu mitima yanu yene. Toera kubwezera—ndisalonga ninga kuna anang'a—fungulanimbo mitima yanu mwakukulu.

Bwerani Kunyumba ku Banja ya Baba

Lekani kuphataniswa pabodzi na ale akukhonda khulupira. Thangwi kulungama na kusowa mwambo pisagawana ninji? Peno ceza ciri na kuphatana kwanji na cidima? Kubverana kwanji kuli pakati pa Kirixtu na Dyabo? Ule anakhulupira asagawana ninji na ule akukhonda khulupira?

Templo ya Baba wathu iri na ciphatano canji na madzimunthu? Thangwi ife ndife templo ya Baba wa moyo, ninga mudalongera Iye: “Ndinakhala pakati pawo mbandifamba pakati pawo; Ine ndinakhala Baba wawo, iwo anakhala anang'a.” Natenepa, “Bulukani pakati pawo mbamusiyana nawo, asalonga Baba wathu, lekani kukhuya cinthu cakukhonda kucena; penepo Ine ndinakutambirani, Ine ndinakhala Baba kwa imwe, imwe munakhala anamuna na ankazi kwa Ine, asalonga Baba wathu, Wamphambvu Zonsene.” ^a