Etiya Poritran Laga Din Ase

Paul pora tar proman khan dikhai ase, aru etu khan mar khuwa, jail, nindra nathaka rati aru misa nindha ase. Titia tai tok-tok bondo kori kene khali binti kore: tar mon pura khula ase, kintu tarkhan laga mon bondo ase. Tai tarkhan ke murti khan pora ulai kene Pitri laga nijor putro aru suali khan nisina jinda thakibole koi.

Adhyay 6.

Tar logot te kaam kora manuh khan hoi kene, amikhan tumikhan ke anurodh kori ase, amar Pitri laga anugrah ke misa-misi grohon nakoribi.

Kilemane Tai koi ase, “Thik homoi te Moi tumar kotha hunise; poritran laga din te Moi tumar ke modot korise.” Sabi, etiya thik homoi ase; sabi, etiya poritran laga din ase.

Amikhan kun manuh laga rasta te bhi eku badha narakhe, titia amikhan laga sewa-kaam te eku golti napabo. Hoile bhi, amar Pitri laga noukor khan hoi kene, amikhan sob jinis te nijorke thik pora dikhai di ase: bisi dhorjo loi kene, dukh paikena, digdar te, chinta te, marpit te, bondhi ghor te, gondugol te, bisi kaam te, ghumai nopara rati khan te, bhuk te; sapha mon pora, gyaan pora, dhorjo pora, bhal mon pora, Pobitro Atma pora, hosa prem pora, hosa kotha pora, amar Pitri laga takot pora, dyna hath aru baya hath nimite dharmikota laga hathiyar khan loi kene, sonman aru beijjati pora, ninda aru prosansa pora. Amikhan ke thogbaj khan nisena ginti kore, hoile bhi amikhan hosa ase; najana manuh nisena, hoile bhi bhal pora jana; mori ja nisena, kintu sabi, amikhan jinda ase; saja pa nisena, hoile bhi mora nai; mon dukh kora nisena, hoile bhi amikhan hodai khushi ase; gorib nisena, hoile bhi bisi manuh ke dhoni bonai di ase; eku nathaka nisena, hoile bhi sob jinis amikhan laga ase.

He Korinthi manuh khan, amikhan tumikhan ke khula mon pora kotha koise; amikhan laga mon tumikhan nimite dangor khuli kene ase. Amikhan pora tumikhan ke bondh kora nai, kintu tumikhan nijor laga mon te he bondh hoi ase. Bodla te — Moi nijor bacha khan ke kowa nisena koi ase — tumikhan bhi nijor mon dangor khuli dibi.

Pitri Laga Poribar Te Wapas Ahhibi

Biswas nakora khan logot te ekjuti hoi kene nathakibi. Kilemane dharmikota aru niyom nathaka kaam te ki mil ase? Nahole ujala tu andhera logot ki sangoti ase? Khrista aru saitan laga majot te ki mil thakibo? Biswas kora ekjon pora biswas nakora ekjon logot ki bhag ase?

Amar Pitri laga mondir tu murti khan logot ki bhag ase? Kilemane amikhan jinda Pitri laga mondir ase, Tai kowa nisena, “Moi tarkhan laga majot te thakibo aru tarkhan laga majot te berabo; Moi tarkhan laga Pitri hobo, aru tarkhan Moi laga bacha khan hobo.” Etu nimite, “Tarkhan majot pora bahar ulai ahhibi aru alag hoi jabi, amar Pitri koi ase, aru eku letera jinis ke nachubi; titia Moi tumikhan ke grohon koribo, aru Moi tumikhan nimite ekjon Pitri hobo, aru tumikhan Moi nimite chokra aru chukri khan hobo, amar Pitri, Sob-takot thaka Ekjon koi ase.” ^a