2 ቆሮንቶስ 5

5 ¹ምድራዊው ድንኳናችን ቢፈርስ፣ ከአባታችን የሆነ ሕንጻ፣ ማለትም በእጅ ያልተሠራ፣ በሰማያት የሚኖር የዘላለም ቤት እንዳለን እናውቃለን። ²በዚህ ድንኳን ውስጥ ሳለን፣ ሰማያዊውን መኖሪያችንን ለመልበስ እየናፈቅን እንቃትታለንና፤ ³ይህን ለብሰን በርግጥ ዕራቁታችንን አንገኝም። ⁴በዚህ ድንኳን ውስጥ ሳለን ተጭነን እንቃትታለን፤ ይኸውም ሟች የሆነው በሕይወት እንዲዋጥ፣ ልንገፈፍ ሳይሆን ልንለብስ ስለምንወድ ነው። ⁵ለዚህም ነገር ያዘጋጀን አባታችን ነው፤ እርሱም መያዣ እንዲሆነን መንፈስ ቅዱስን ሰጠን።

⁶ስለዚህ ሁልጊዜ ልበ ሙሉዎች ነን፤ በሥጋ በምንኖርበት ጊዜ ከጌታ ተለይተን በሩቅ እንዳለን እናውቃለን፤ ⁷በእምነት እንጂ በማየት አንመላለስምና። ⁸ልበ ሙሉዎች ነን፤ ከሥጋ ርቀን ከጌታ ጋራ በቤታችን መኖርን ይልቁን እንወዳለን። ⁹ስለዚህ በቤት ሆነን ወይም ርቀን፣ እርሱን ደስ ማሰኘት ግባችን ነው። ¹⁰ሁላችን በክርስቶስ የፍርድ ወንበር ፊት ልንቆም ግድ ነውና፤ እያንዳንዱ በሥጋ ሳለ ያደረገውን መልካም ወይም ክፉ እንደ ሥራው ይቀበላል።

ታርቀን መልእክተኞች ሆነን ተልከናል

¹¹እንግዲህ የጌታን ፍርሃት ዐውቀን ሰዎችን እናግባባለን፤ ለአባታችን ግልጥ ነን፤ ለሕሊናችሁም ግልጥ እንደሆንን ተስፋ አደርጋለሁ። ¹²ዳግመኛ ራሳችንን ለእናንተ አናመሰግንም፤ ነገር ግን በልብ ሳይሆን በውጭ መልክ በሚመኩት ላይ መልስ እንዲኖራችሁ፣ በእኛ ትኮሩ ዘንድ ምክንያት እንሰጣችኋለን። ¹³አእምሮአችን ከእኛ ቢወጣ ለአባታችን ነው፤ በቅን አእምሮ ብንሆን ለእናንተ ነው። ¹⁴የክርስቶስ ፍቅር ግድ ይለናልና፤ አንዱ ስለ ሁሉ ሞተ፣ ስለዚህ ሁሉም ሞቱ ብለን ተረድተናል። ¹⁵እርሱም ስለ ሁሉ ሞተ፤ ይህም ሕያዋን ከእንግዲህ ለራሳቸው ሳይሆን ስለ እነርሱ ለሞተውና ለተነሣው እንዲኖሩ ነው።

¹⁶ስለዚህ ከእንግዲህ ማንንም በሥጋ አናውቅም፤ ክርስቶስንም ቀድሞ በሥጋ ዐውቀነው ብንሆን፣ አሁን ግን ከእንግዲህ እንደዚያ አናውቀውም። ¹⁷ስለዚህ ማንም በክርስቶስ ቢሆን አዲስ ፍጥረት ነው፤ አሮጌው ዐለፈ፤ እነሆ፣ አዲሱ መጣ! ¹⁸ይህ ሁሉ በክርስቶስ በኩል ከራሱ ጋራ ካስታረቀን፣ የማስታረቅንም አገልግሎት ከሰጠን ከአባታችን ነው፤ ^a a v18 ዕርቅ የሚጀምረው በአባታችን ልብ ውስጥ ነው፤ ወደ ቤት ሊመልሰን እጁን የሚዘረጋ እርሱ ነው፤ ይህንም የሚያደርግበት መንገድ ኢየሱስ ነው። ¹⁹ይኸውም፣ አባታችን ኀጢአታቸውን ሳይቈጥርባቸው ዓለምን በክርስቶስ ከራሱ ጋራ ያስታርቅ ነበር፤ የማስታረቅንም መልእክት ዐደራ ሰጠን።

²⁰እንግዲህ አባታችን በእኛ በኩል እንደሚማልድ፣ ስለ ክርስቶስ መልእክተኞች ነን። ከአባታችን ጋራ ታረቁ ብለን ስለ ክርስቶስ እንለምናችኋለን። ²¹እኛ በእርሱ ሆነን የአባታችን ጽድቅ እንሆን ዘንድ፣ ኀጢአትን ያላወቀውን እርሱን ስለ እኛ ኀጢአት አደረገው።