2 ቆሮንቶስ 4

4 ¹ስለዚህ ይህ አገልግሎት በተደረገልን ምሕረት ስላገኘን፣ ተስፋ አንቈርጥም። ²ከዚህ ይልቅ፣ የተሰወሩትን አሳፋሪ ነገሮች ተውን። በተንኰል አንሠራም፤ የአባታችንንም ቃል አናጣምም። ነገር ግን እውነትን በግልጽ በመናገር፣ በአባታችን ፊት ራሳችንን ለሰው ሁሉ ኅሊና እናስመሰክራለን። ³ወንጌላችን የተከደነ ቢሆንም እንኳ፣ የተከደነው ለሚጠፉት ነው። ⁴ለእነርሱ የዚህ ዘመን አምላክ የማያምኑትን አእምሮ አሳውሯል፤ ስለዚህ የወንጌልን ብርሃን፣ ማለትም የአባታችን መልክ የሆነው የክርስቶስን ክብር ማየት አይችሉም። ^a a v4 እዚህ ላይ “የዚህ ዘመን አምላክ” የተባለው ሰዎችን የሚያሳውረው ጠላት ነው እንጂ አባታችን አይደለም፤ በትንሽ ፊደል የተጻፈው ቃል ለልጆቹ የተዘጋጀውን ብርሃን የሚሰርቀውን አስመሳይ ያመለክታል። ⁵ራሳችንን አንሰብክም፤ ነገር ግን ኢየሱስ ክርስቶስ ጌታ እንደሆነ እንሰብካለን፤ እኛም ስለ ኢየሱስ ባሪያዎቻችሁ ነን።

⁶“ብርሃን ከጨለማ ይብራ” ያለው አባታችን፣ በኢየሱስ ክርስቶስ ፊት ያለውን የአባታችንን ክብር እውቀት ብርሃን ይሰጠን ዘንድ በልባችን ውስጥ አብርቶአል።

⁷ይህ የላቀ ኀይል የአባታችን እንጂ ከእኛ እንዳይሆን፣ ይህን ሀብት በሸክላ ዕቃ ውስጥ ይዘናል። ⁸በየጎኑ መከራ ይደርስብናል፣ ነገር ግን አንደቅም፤ ግራ ይገባናል፣ ነገር ግን ተስፋ አንቈርጥም፤ ⁹ስደት ይደርስብናል፣ ነገር ግን አንተውም፤ ተመትተን እንወድቃለን፣ ነገር ግን አንጠፋም። ¹⁰የኢየሱስ ሕይወት ደግሞ በሰውነታችን እንዲገለጥ፣ ሁልጊዜ የኢየሱስን ሞት በሰውነታችን ተሸክመን እንዞራለን። ¹¹የኢየሱስ ሕይወት ደግሞ በሚሞት ሥጋችን እንዲገለጥ፣ ሕያዋን የሆንን እኛ ስለ ኢየሱስ ሁልጊዜ ለሞት አልፈን እንሰጣለን። ¹²እንግዲህ ሞት በእኛ ይሠራል፣ ሕይወት ግን በእናንተ ይሠራል።

¹³“አመንሁ፣ ስለዚህም ተናገርሁ” ተብሎ እንደተጻፈ፣ ያው የእምነት መንፈስ ስላለን፣ እኛም እናምናለን፣ ስለዚህም እኛም እንናገራለን፤ ¹⁴ጌታን ኢየሱስን ያስነሣው፣ እኛንም ከኢየሱስ ጋራ እንደሚያስነሣን ከእናንተም ጋራ በፊቱ እንደሚያቆመን እናውቃለን። ¹⁵ይህ ሁሉ ለእናንተ ነው፤ ጸጋ ወደ ብዙዎች እየደረሰ፣ ለአባታችን ክብር ምስጋናን ያትረፈርፍ ዘንድ ነው።

¹⁶ስለዚህ ተስፋ አንቈርጥም። ውጫዊው ሰውነታችን እየጠፋ ቢሄድም፣ ውስጣዊው ሰውነታችን ዕለት በዕለት ይታደሳል። ¹⁷ይህ ቀላልና ጊዜያዊ መከራ፣ ከሁሉ የላቀ የዘላለም ክብር ክብደት ያስገኝልናልና፤ ¹⁸ስለዚህ ትኵረታችንን በሚታዩት ነገሮች ላይ ሳይሆን በማይታዩት ላይ እናደርጋለን፤ የሚታየው ጊዜያዊ ነውና፣ የማይታየው ግን ዘላለማዊ ነው።