Pitri laga Puhor Amikhan Pora Jiliki Ase

Chalaki aru lukai rakha mon laga dosh dikha homoi, Paul uttor diye, tai khali hosa kotha sojha pora koi. Shakti tu tai laga nohoi koi kene dikhi ase: dukh pai, bhobona te ase, mari girai diye, kintu kitia bhi khotom nohoi. Mati laga bortan te dhon ase, aru bortan laga komjur tu he asol kotha ase, titia mohima tu amar Pitri laga he thakibo.

Adhyay 4.

Etu karne, amikhan ke dikhuwa doya pora etu sewa kaam amikhan logot te thaka nimite, amikhan mon chutu nakore. Hoilebi, amikhan lukai thaka, sorom laga jinis khan ke chari dise. Amikhan chalaki pora kaam nakore, aru amar Pitri laga kotha ke ulta bhi nakore. Kintu, hosa kotha ke khuli kene koi kene, amar Pitri usor te sob manuh laga bibek age te amikhan nijor ke bhal koi dikhai diye. Jodi amikhan laga susamachar lukai kene ase bhi, eitu nosto hoi ja khan nimite he lukai kene ase. Tarkhan nimite, etu yug laga isor pora biswas nakora khan laga mon ke andha kori dise, etu karne tarkhan susamachar laga puhor—kun Khrista amar Pitri laga roop ase, Tar laga mahima—dikhibo napare. ^a Amikhan nijor ke prachar nakore, kintu Jisu Khrista ke Prabhu ase koi kene prachar kore—amikhan Jisu nimite tumikhan laga noukar khan ase.

Kilemane, “Andhar pora puhor jiliki ahhibi,” koi diya amar Pitri pora amikhan laga mon bhitor te jiliki dise, aru puhor dise—etu puhor tu Jisu Khrista laga chehera te amar Pitri laga mahima laga gyaan ase.

Amikhan etu dhun ke mati laga bhara te rakhise, etu karne etu sob pora dangor takot tu amar Pitri laga ase, amikhan pora nohoi. Amikhan sob phale te dukh pai ase, kintu piste kene nai; chinta te giri ase, kintu asha haru nai; digdari pai ase, kintu chari diya nohoi; marai girai ase, kintu khotom kora nohoi. Amikhan hodai Jisu laga mrityu ke gaw te bukhi kene phure, etu karne Jisu laga jivon bhi amikhan laga gaw te dikhibo pare. Jinda thaka amikhan ke Jisu nimite hodai mrityu laga hath te di diya hoi, etu karne Jisu laga jivon bhi amikhan laga mori ja gau-mangso te dikhibo pare. Etu karne, mrityu amikhan bhitor te kaam kori ase, kintu jivon tumikhan bhitor te.

“Moi biswas korise, etu karne moi koise,” koi kene likhi kene thaka nisina, etu eke biswas laga atma logot te, amikhan bhi biswas kore, etu karne amikhan bhi kotha koi, Prabhu Jisu ke jee uthai diya Ekjon pora amikhan ke bhi Jisu logot te uthai dibo, aru tumikhan logot te, amikhan ke Tar usor te khara kori dibo, eitu amikhan jane. Etu sob tumikhan nimite ase, etu karne anugrah, aru bisi manuh usor te punchi kene, amar Pitri laga mahima nimite dhanyabad ke bhorta kori dibo.

Etu karne amikhan mon chutu nakore. Amikhan laga bahar laga manuh biya hoi jai ase bhi, amikhan laga bhitor laga manuh din-pichete-din notun hoi ase. Kilemane, etu olop somoi laga halka dukh pora amikhan nimite tulona kori bo napara ananta bhari mahima ulai ani ase, etu karne amikhan dikhibo para jinis khan te nohoi, kintu dikhibo napara jinis khan te mon lagai, kilemane dikhibo para jinis tu ferai jai ase, kintu dikhibo napara jinis tu ananta ase.