2 ነገሥት 25

25 ¹በሴዴቅያስ ዘጠነኛ ዓመት፣ በዐሥረኛው ወር በዐሥረኛው ቀን፣ የባቢሎን ንጉሥ ናቡከደነፆር ከሠራዊቱ ሁሉ ጋራ ወደ ኢየሩሳሌም ዘመተ፤ በውጭ ሰፍሮም በዙሪያዋ የመክበቢያ ቅጥር ሠራ። ²ከተማዪቱም እስከ ንጉሥ ሴዴቅያስ ዐሥራ አንደኛ ዓመት ድረስ ተከባ ቈየች። ³በአራተኛው ወር በዘጠነኛው ቀን በከተማዪቱ ራብ እጅግ ጸንቶ ነበር፤ የምድሪቱም ሕዝብ የሚበሉት እህል አልነበራቸውም። ⁴የከተማዪቱ ቅጥር ተደረመሰ፤ ባቢሎናውያንም ከብበዋት የነበረ ቢሆንም፣ ወታደሮቹ ሁሉ በንጉሡ አትክልት አጠገብ ባሉት በሁለቱ ቅጥሮች መካከል በነበረው በር አድርገው በሌሊት ወደ ዓረባ ሸሹ። ⁵የባቢሎን ሠራዊት ንጉሡን አሳደደው፤ በኢያሪኮ ሜዳም ያዘው፤ ሠራዊቱም ሁሉ ከእርሱ ተበተነ። ⁶ንጉሡንም ይዘው በራብላ ወደ ነበረው የባቢሎን ንጉሥ አመጡት፤ በእርሱም ላይ ፍርድ ሰጡ። ⁷የሴዴቅያስንም ልጆች በዓይኑ ፊት ገደሉ፤ ዐይኖቹንም አወሩ፤ በናስ ሰንሰለት አስረውም ወደ ባቢሎን ወሰዱት።

⁸በአምስተኛው ወር በሰባተኛው ቀን፣ ይኸውም የባቢሎን ንጉሥ የናቡከደነፆር ዐሥራ ዘጠነኛ ዓመት ነበር፤ የባቢሎን ንጉሥ አገልጋይ የሆነው የዘበኞች አለቃ ናቡዘረዳን ወደ ኢየሩሳሌም መጣ። ⁹የአባታችንን ቤት፣ የንጉሡን ቤተ መንግሥትና የኢየሩሳሌምን ቤቶች ሁሉ አቃጠለ፤ ታላላቆቹንም ቤቶች ሁሉ በእሳት አቃጠለ። ¹⁰ከዘበኞች አለቃም ጋራ የነበረው የባቢሎን ሠራዊት ሁሉ የኢየሩሳሌምን ቅጥሮች በዙሪያዋ አፈረሰ። ¹¹የዘበኞች አለቃ ናቡዘረዳንም በከተማዪቱ የቀሩትን ሕዝብ፣ ወደ ባቢሎን ንጉሥ የኰበለሉትን ሰዎችና የቀረውን ሕዝብ ማረከ። ¹²የዘበኞች አለቃ ግን የወይን አትክልቱንና እርሻውን እንዲያርሱ ከምድሪቱ ድኾች አንዳንዶቹን ተወ።

¹³ባቢሎናውያንም በአባታችን ቤት የነበሩትን የናስ ዐምዶች፣ ተንቀሳቃሽ መቀመጫዎችንና የናስ ባሕርን ሰባብረው ናሱን ወደ ባቢሎን ወሰዱ። ¹⁴ድስቶቹን፣ አካፋዎቹን፣ የመቅጥኛ መሣሪያዎቹን፣ ሳሕኖቹንና በቤተ መቅደሱ ለአገልግሎት የሚውሉትን የናስ ዕቃዎች ሁሉ ደግሞ ወሰዱ። ¹⁵የዘበኞች አለቃም ጽናሆቹንና መርጫ ሳሕኖቹን ወሰደ፤ እነዚህም ሁሉ ጥሩ ወርቅና ጥሩ ብር ነበሩ። ¹⁶ሰሎሞን ለአባታችን ቤት የሠራቸው ሁለቱ ዐምዶች፣ ባሕሩና ተንቀሳቃሽ መቀመጫዎቹ—የእነዚህ ሁሉ ናስ ከመጠን በላይ ስለ ነበር ሊመዘን አልቻለም። ¹⁷እያንዳንዱ ዐምድ ቁመቱ ሃያ ሰባት ጫማ ነበር፤ በላዩም ላይ አራት ጫማ ተኩል ከፍታ ያለው የናስ ጕልላት ነበረበት፤ በዙሪያውም የናስ የሮማን መረብ ነበረ። ሁለተኛውም ዐምድ ከመረቡ ጋራ እንደዚሁ ነበር።

¹⁸የዘበኞች አለቃም ሊቀ ካህናቱን ሠራያን፣ ሁለተኛውን ካህን ሶፎንያስንና ሦስቱን በር ጠባቂዎች ወሰደ። ¹⁹ከከተማዪቱም ተዋጊዎቹን የሚያዝዘውን መኰንን፣ በዚያ የተገኙትን አምስት የንጉሡን አማካሪዎች፣ የምድሪቱን ሕዝብ ለውትድርና የሚመዘግበውን የሠራዊቱ አለቃ ጸሓፊና በከተማዪቱ የተገኙትን ስድሳ ተራ ሰዎች ወሰደ። ²⁰የዘበኞች አለቃ ናቡዘረዳንም እነዚህን ይዞ በራብላ ወደ ነበረው የባቢሎን ንጉሥ ወሰዳቸው። ²¹በሐማት ምድር በራብላም የባቢሎን ንጉሥ መትቶ ገደላቸው። ስለዚህ ይሁዳ ከምድሩ ተማረከ።

ጎዶልያስ በምድሪቱ ላይ ተሾመ

²²የባቢሎን ንጉሥ ናቡከደነፆርም የሳፋን ልጅ የአኪቃም ልጅ ጎዶልያስን በይሁዳ በቀሩት ሕዝብ ላይ ሾመው። ²³የሠራዊቱ መኰንኖችና ሰዎቻቸው ሁሉ የባቢሎን ንጉሥ ጎዶልያስን አገረ ገዥ አድርጎ እንደ ሾመ በሰሙ ጊዜ፣ ወደ እርሱ ወደ ሚጽጳ መጡ፤ እነርሱም የናታንያ ልጅ እስማኤል፣ የቃሬ ልጅ ዮሐናን፣ የኔጦፋታዊው የተንሑሜት ልጅ ሠራያና የመዓካታዊው ልጅ ያዓዛንያ ከሰዎቻቸው ጋራ ነበሩ። ²⁴ጎዶልያስም ለእነርሱና ለሰዎቻቸው ማለላቸው፤ “የባቢሎናውያንን ሹማምት አትፍሩ፤ በምድሪቱ ኑሩ፤ የባቢሎንን ንጉሥ አገልግሉ፤ ይበጅላችኋልም” አላቸው።

²⁵በሰባተኛውም ወር የንጉሥ ዘር የሆነው የኤሊሳማ ልጅ የናታንያ ልጅ እስማኤል ከዐሥር ሰዎች ጋራ መጥቶ ጎዶልያስን መታው፤ በሚጽጳም ከእርሱ ጋራ የነበሩትን ይሁዳውያንንና ባቢሎናውያንን አብሮ ገደለ። ²⁶ስለዚህ ሕዝቡ ሁሉ ከታናሽ እስከ ታላቅ ከሠራዊቱ መኰንኖች ጋራ ባቢሎናውያንን ፈርተው ወደ ግብፅ ሸሹ።

ለተማረከው ንጉሥ ተስፋ

²⁷የይሁዳ ንጉሥ ዮአኪን ተማርኮ በሄደ በሠላሳ ሰባተኛው ዓመት፣ ኤውልሜሮዳክ የባቢሎን ንጉሥ በሆነበት ዓመት፣ በዐሥራ ሁለተኛው ወር በሃያ ሰባተኛው ቀን ዮአኪንን ራርቶለት ከእስር ቤት ፈታው። ²⁸በመልካምም ተናገረው፤ በባቢሎንም ከእርሱ ጋራ ከነበሩት ከሌሎች ነገሥታት ዙፋን በላይ ዙፋን ሰጠው። ²⁹ዮአኪንም የእስር ልብሱን አወለቀ፤ በዕድሜውም ዘመን ሁሉ ዘወትር በንጉሡ ማዕድ ይበላ ነበር። ³⁰ንጉሡም በሕይወት እስካለ ድረስ ዕለት ዕለት የተወሰነለትን ቀለብ ይሰጠው ነበር።