2 இராஜாக்கள் 25

25 ¹சிதேக்கியாவின் ஒன்பதாம் வருஷத்தில், பத்தாம் மாதத்தின் பத்தாம் நாளிலே, பாபிலோன் ராஜாவாகிய நேபுகாத்நேச்சார் தன் சர்வ சேனையோடும் எருசலேமுக்கு விரோதமாய் வந்து, அதற்கு வெளியே பாளயமிறங்கி, அதைச் சுற்றிலும் முற்றுகைச் சுவரைக் கட்டினான். ²இப்படியாக அந்த நகரம் ராஜாவாகிய சிதேக்கியாவின் பதினொன்றாம் வருஷம்மட்டும் முற்றுகைபோடப்பட்டிருந்தது. ³நாலாம் மாதத்தின் ஒன்பதாம் நாளிலே, நகரத்திலே பஞ்சம் மிகவும் கொடியதாயிருந்ததால், தேசத்தின் ஜனங்களுக்கு உணவு இல்லாமற்போயிற்று. ⁴நகரத்தின் மதில் இடிக்கப்பட்டது; கல்தேயர் நகரத்தைச் சுற்றிலும் இருந்தாலும், போர்வீரர் அனைவரும் இராக்காலத்தில் ராஜாவின் தோட்டத்தண்டையிலிருந்த இரண்டு மதில்களுக்கும் நடுவான வாசல்வழியாய் அரபா தேசத்தை நோக்கி ஓடிப்போனார்கள். ⁵கல்தேயரின் சேனை ராஜாவைப் பின்தொடர்ந்து, எரிகோவின் சமபூமியிலே அவனைப் பிடித்தது; அவனுடைய சேனை அனைத்தும் அவனைவிட்டுச் சிதறிப்போயிற்று. ⁶அவர்கள் ராஜாவைப் பிடித்து, ரிப்லாவிலிருந்த பாபிலோன் ராஜாவினிடத்திற்கு அவனைக் கொண்டுவந்து, அவனுக்கு நியாயத்தீர்ப்பு அளித்தார்கள். ⁷அவர்கள் சிதேக்கியாவின் குமாரரை அவன் கண்களுக்கு முன்பாகக் கொன்று, சிதேக்கியாவின் கண்களைக் குருடாக்கி, அவனை வெண்கல விலங்குகளால் கட்டி, பாபிலோனுக்குக் கொண்டுபோனார்கள்.

⁸பாபிலோன் ராஜாவாகிய நேபுகாத்நேச்சாரின் பத்தொன்பதாம் வருஷத்தின் ஐந்தாம் மாதத்தின் ஏழாம் நாளிலே, பாபிலோன் ராஜாவின் ஊழியக்காரனும் மெய்க்காவலர்களின் தலைவனுமாகிய நேபுசராதான் எருசலேமுக்கு வந்தான். ⁹அவன் எங்கள் பிதாவின் ஆலயத்தையும், ராஜாவின் அரமனையையும், எருசலேமின் எல்லா வீடுகளையும் சுட்டெரித்தான்; பெரிய வீடுகள் யாவையும் அவன் தீக்கிரையாக்கினான். ¹⁰மெய்க்காவலர் தலைவனோடிருந்த கல்தேயரின் சர்வ சேனையும் எருசலேமைச் சுற்றிலும் இருந்த மதில்களை இடித்துப்போட்டது. ¹¹மெய்க்காவலர் தலைவனாகிய நேபுசராதான் நகரத்தில் மீதியாயிருந்த மற்ற ஜனங்களையும், பாபிலோன் ராஜாவின் பட்சமாய்ச் சேர்ந்துபோன கூட்டத்தாரையும், மீதியான ஏனைய திரளையும் சிறைபிடித்துக்கொண்டுபோனான். ¹²ஆனாலும் மெய்க்காவலர் தலைவன், திராட்சத்தோட்டங்களைப் பண்படுத்தவும் நிலங்களை உழவும், தேசத்தில் மிகவும் தரித்திரமானவர்களில் சிலரை விட்டுவைத்தான்.

¹³எங்கள் பிதாவின் ஆலயத்திலிருந்த வெண்கலத் தூண்களையும், ஆதாரப் பீடங்களையும், வெண்கலக் கடல்தொட்டியையும் கல்தேயர் உடைத்து, அவைகளின் வெண்கலத்தைப் பாபிலோனுக்குக் கொண்டுபோனார்கள். ¹⁴மேலும் பானைகளையும், சாம்பல் அள்ளும் கரண்டிகளையும், திரிக்கத்தரிகளையும், தட்டுகளையும், ஆராதனைக்கு உபயோகித்த வெண்கலப் பணிமுட்டுகள் யாவையும் அவர்கள் எடுத்துக்கொண்டார்கள். ¹⁵தூபகலசங்களையும் தெளிக்கும் கலங்களையும், சுத்தப்பொன்னும் சுத்தவெள்ளியுமாயிருந்த யாவற்றையும் மெய்க்காவலர் தலைவன் எடுத்துக்கொண்டான். ¹⁶எங்கள் பிதாவின் ஆலயத்திற்காக சாலொமோன் செய்த இரண்டு தூண்களும், கடல்தொட்டியும், ஆதாரப் பீடங்களும் — இவை யாவற்றின் வெண்கலமும் நிறுக்க முடியாத அளவாயிருந்தது. ¹⁷ஒவ்வொரு தூணும் இருபத்தேழு அடி உயரமாயிருந்தது; அதின்மேல் நாலரை அடி உயரமான வெண்கலக் குமிழ் இருந்தது; அந்தக் குமிழைச் சுற்றிலும் வெண்கலத்தினால் செய்யப்பட்ட மாதுளம்பழ வலைப்பின்னல் இருந்தது. இரண்டாம் தூணும் அதின் வலைப்பின்னலோடே அப்படியேயிருந்தது.

¹⁸மெய்க்காவலர் தலைவன் பிரதான ஆசாரியனாகிய செராயாவையும், இரண்டாம் ஆசாரியனாகிய செப்பனியாவையும், வாசல்காக்கிற மூன்று பேரையும் பிடித்துக்கொண்டான். ¹⁹நகரத்திலிருந்து அவன், போர்வீரர்மேல் அதிகாரியாயிருந்தவனையும், அங்கே காணப்பட்ட ராஜாவின் ஆலோசனைக்காரர் ஐந்துபேரையும், தேசத்தின் ஜனங்களைப் படைக்குச் சேர்த்த சேனாபதியின் எழுத்தனையும், நகரத்திலே காணப்பட்ட அறுபது சாதாரண மனிதர்களையும் பிடித்துக்கொண்டான். ²⁰மெய்க்காவலர் தலைவனாகிய நேபுசராதான் அவர்களைப் பிடித்து, ரிப்லாவிலிருந்த பாபிலோன் ராஜாவினிடத்திற்குக் கொண்டுபோனான். ²¹ஆமாத் தேசத்திலுள்ள ரிப்லாவிலே பாபிலோன் ராஜா அவர்களை வெட்டிக் கொன்றுபோட்டான். இப்படியாக யூதா தன் தேசத்திலிருந்து சிறைப்பட்டுப்போயிற்று.

தேசத்தின்மேல் கெதலியா நியமிக்கப்படுதல்

²²பாபிலோன் ராஜாவாகிய நேபுகாத்நேச்சார், யூதாவிலே மீதியாக விட்டுவைத்த ஜனங்கள்மேல், சாப்பானின் மகனாகிய அகீக்காமின் குமாரன் கெதலியாவை அதிபதியாக நியமித்தான். ²³பாபிலோன் ராஜா கெதலியாவை அதிபதியாக்கினான் என்று சேனாதிபதிகள் அனைவரும் அவர்கள் மனுஷரும் கேட்டபோது, அவர்கள் மிஸ்பாவிலிருந்த கெதலியாவினிடத்திற்கு வந்தார்கள்; நெத்தானியாவின் குமாரன் இஸ்மவேலும், கரேயாவின் குமாரன் யோகனானும், நெத்தோபாத்தியனாகிய தன்கூமேத்தின் குமாரன் செராயாவும், மாகாத்தியனுடைய குமாரன் யசனியாவும், அவர்களுடைய மனுஷரும் வந்தார்கள். ²⁴கெதலியா அவர்களுக்கும் அவர்கள் மனுஷருக்கும் ஆணையிட்டு: “கல்தேயரின் அதிகாரிகளுக்குப் பயப்படாதிருங்கள்; தேசத்திலே குடியிருந்து, பாபிலோன் ராஜாவைச் சேவியுங்கள்; அப்பொழுது உங்களுக்கு நன்மை உண்டாகும்” என்றான்.

²⁵ஏழாம் மாதத்திலே, எலிசாமாவின் மகனாகிய நெத்தானியாவின் குமாரனும் ராஜவம்சத்தானுமாகிய இஸ்மவேல் பத்து மனுஷரோடேகூட வந்து, கெதலியாவை வெட்டி, அவனையும் அவனோடே மிஸ்பாவிலிருந்த யூதரையும் கல்தேயரையும் கொன்றுபோட்டான். ²⁶அப்பொழுது சிறியோர் தொடங்கிப் பெரியோர்மட்டும் எல்லா ஜனங்களும் சேனாதிபதிகளும், கல்தேயருக்குப் பயந்ததால் எழுந்து எகிப்துக்கு ஓடிப்போனார்கள்.

சிறைப்பட்ட ராஜாவுக்கு நம்பிக்கை

²⁷யூதாவின் ராஜாவாகிய யோயாக்கீன் சிறைப்பட்டுப்போன முப்பத்தேழாம் வருஷத்திலே, ஏவில்மெரோதாக் பாபிலோனுக்கு ராஜாவான வருஷத்தில், பன்னிரண்டாம் மாதத்தின் இருபத்தேழாம் நாளிலே, அவன் யூதாவின் ராஜாவாகிய யோயாக்கீன்மேல் தயவுவைத்து, அவனைச் சிறையிலிருந்து விடுதலையாக்கினான். ²⁸அவன் அவனோடே தயவாய்ப் பேசி, தன்னோடே பாபிலோனிலிருந்த ராஜாக்களின் ஆசனங்களைப்பார்க்கிலும் உயர்ந்த ஆசனத்தை அவனுக்குக் கொடுத்தான். ²⁹யோயாக்கீன் தன் சிறையிருப்பின் வஸ்திரங்களைக் களைந்துபோட்டு, தன் ஜீவனுள்ள நாளெல்லாம் எப்பொழுதும் ராஜாவின் பந்தியிலே அவனுக்கு முன்பாகச் சாப்பிட்டான். ³⁰அவன் உயிரோடிருந்த நாளெல்லாம், அன்றன்றைக்குரிய பங்கை ராஜா அவனுக்கு நித்தமும் கொடுத்துவந்தான்.