2 Kings 25 FHB Father's Heart Bible™

25 ¹Zedekiah laga 9 bochor te, 10 mohina laga 10 din te, Babylon laga raja Nebuchadnezzar tar laga pura sena logot Jerusalem uporte ahhise, bahar te tombu lagaise, aru tar charipakhe gheri kene bera bonaise. ²Etine, Zedekiah raja laga 11 bochor tak sheher tu gheri rakha te thakise. ³4 mohina laga 9 din te sheher te itna dangor akal ahhise je desh laga manuh khan logot kha-luwa eku nathakise. ⁴Sheher laga bera bhangi dise, aru Babylon manuh khan sheher ke gheri thakile bhi, sob sipahi khan rati te raja laga bagan usorte duita bera laga majot thaka dorja pora, Arabah phale polai jaise. ⁵Babylon laga sena pora raja ke piche korise, Jericho laga samatol te taike dhori loise, aru tar laga sob sipahi tar pora ephale-uphale hoi jaise. ⁶Tarkhan pora raja ke dhori loise, Riblah te Babylon laga raja usorte taike loi jaise, aru tar uporte bisar korise. ⁷Zedekiah laga chokra khan ke tar suku age te morai dise, taike andha kori dise, pitol laga bedi pora taike bandhi loise, aru Babylon te loi jaise.

⁸5 mohina laga 7 din te—Babylon laga raja Nebuchadnezzar laga 19 bochor te—Babylon laga raja laga noukar, pahara-dar khan laga senapati Nebuzaradan, Jerusalem te ahhise. ⁹Tai amar Pitri laga ghor, raja laga mohol, aru Jerusalem laga sob ghor ke jolai dise; sob dangor ghor ke tai jolai dise. ¹⁰Aru pahara-dar khan laga senapati laga nichete thaka pura Babylon laga sena pora Jerusalem ke gheri thaka bera khan bhangi dise. ¹¹Pahara-dar khan laga senapati Nebuzaradan pora sheher te bachi thaka baki manuh khan, Babylon laga raja phale jai jua khan, aru baki bhir ke desh pora loi jaise. ¹²Kintu pahara-dar khan laga senapati pora kunba desh laga sob pora gorib manuh khan ke angur-bagan aru kheti sa-boloi chari dise.

¹³Babylon manuh khan pora ta te thaka pitol laga khamba khan, uthai-loi phura adhar khan, aru amar Pitri laga ghor laga pitol laga Samundar ke tukra-tukra kori bhangise, aru pitol khan Babylon te loi jaise. ¹⁴Tarkhan pora handi khan, kodali khan, batti kata saman khan, thali khan, aru mondir laga sewa te choloa sob pitol laga saman khan bhi loi loise. ¹⁵Pahara-dar khan laga senapati pora jui rakha patro khan aru panisiti diya bati khan loi loise, eitu sob sapha suna aru sapha chandi pora bona thakise. ¹⁶Solomon pora amar Pitri laga ghor nimite bona duita khamba, Samundar, aru uthai-loi phura adhar khan—eitu sob laga pitol tu jukhibo napari thakise. ¹⁷Ekta-ekta khamba tu 27 feet uncha thakise, tar uporte 4 aru adha feet uncha pitol laga mukut thakise, aru pitol laga jali te dalim khan charipakhe ghirai thakise. Dusra khamba bhi, tar laga jali logot, eneka he thakise.

¹⁸Pahara-dar khan laga senapati pora boro purohit Seraiah, dusra purohit Zephaniah, aru tinjon dorja rokhiya khan ke dhori loise. ¹⁹Sheher pora tai lorai kora manuh khan uporte thaka ekjon adhikari, ta te pa-a raja laga 5 jon salahkar, desh laga manuh khan ke sena te bhorti kora senapati laga likhok, aru sheher te pa-a 60 jon sadharan manuh khan ke loi loise. ²⁰Pahara-dar khan laga senapati Nebuzaradan pora taikhan ke Riblah te Babylon laga raja usorte loi jaise. ²¹Ta te Hamath laga Riblah te, Babylon laga raja pora taikhan ke mari kene morai dise. Etine Judah ke tar nijor desh pora bondhi kori loi jaise.

Gedaliah ke Desh Uporte Niyukti Kora

²²Babylon laga raja Nebuchadnezzar pora Shaphan laga chokra Ahikam, tar laga chokra Gedaliah ke Judah te bachi thaka manuh khan uporte shasok bonaise. ²³Jitia sob sena laga adhikari khan aru tarkhan laga manuh khan pora Babylon laga raja pora Gedaliah ke shasok bonaise koi kene hunise, tetiya tarkhan Mizpah te tar usorte ahhise: Nethaniah laga chokra Ishmael, Kareah laga chokra Johanan, Netophathite jati laga Tanhumeth laga chokra Seraiah, aru Maacathite laga chokra Jaazaniah, tarkhan laga manuh khan logote. ²⁴Gedaliah pora taikhan aru taikhan laga manuh khan ke kosom khai kene koise, “Babylon laga adhikari khan ke bhoi nakoribi. Desh te thakibi, Babylon laga raja laga sewa koribi, aru tumikhan nimite bhal hobo.”

²⁵7 mohina te raja laga bongsho pora aha, Elishama laga chokra Nethaniah laga chokra Ishmael, 10 jon manuh logot ahhise aru Gedaliah ke mari dise, Mizpah te tar logot thaka Judah manuh khan aru Babylon manuh khan ke bhi morai dise. ²⁶Etine chutu pora dangor tak sob manuh khan, aru sena laga adhikari khan, Babylon manuh khan ke bhoi kori kene Egypt te polai jaise.

Bondhi Hua Raja nimite Asha

²⁷Judah laga Jehoiachin bondhi hua laga 37 bochor te, jun bochor te Evil-merodach Babylon laga raja hoise, tai Jehoiachin ke doya korise aru 12 mohina laga 27 din te taike bondi-ghor pora chari dise. ²⁸Tai tar logot morom pora kotha korise aru Babylon te tar logot thaka dusra raja khan pora uporte taike boha jagah dise. ²⁹Jehoiachin pora tar bondi-ghor laga kapra khuli dise aru tar baki jivon te hodai raja laga mez te khana khaise. ³⁰Tai jivit thaka tak, raja pora taike hodai din laga nishchit kha-luwa dise.