2 Wungnaobing 25

25 ¹Zedekiahna khamung kachiko kum, kachāng katharāwui zimiksho katharāthang, Babylonwui awunga Nebuchadnezzarna awui raimi saikorali ngasoda Jerusalemli vāda, keinung ayarli rāmrah asāpamlaga, chi kuimareida kuinamkahai phākho sāhaowa. ²Chithāda Awunga Zedekiahna khamung kum tharāda akha kākashung eina tangda keinung chi kuinama. ³Kachāng khamatewui zimiksho kachikothang keinung chili zāt sakkachangkhathaida, ngalei chiwui mibingna kashakazā makhaleiana. ⁴Keinung phākho sakhaizangda, Chaldeawui raimibingna keinung chi kuimareida leilala, raimi saikora ngayā awungawui yāmgui pheiwui phākho khaniwui ngachaili khalei ngavei eina Arabahshong yāmhaowa. ⁵Chaldeawui raimibingna awungali kharomvai, kala Jerichowui tampākli ali angaphankhui; kala awui raimi saikora awui eina kachāyām eina yāmhaowa. ⁶Athumna awungali tukkhuida Riblahli Babylonwui awungawui pāngli ali khuiungmi; chithāda awuitungli tuitak tāmi. ⁷Athumna Zedekiahwui naomayarabingli awui miktāli shaothathaowa, kala Zedekiahwui mik latshokmihaowa, mari khānghui eina khalaphailaga Babylonli khuivāhaowa.

⁸Kaphangā kachāng zimiksho kashinethang, Babylonwui awunga Nebuchadnezzarwui mungda tharāda kachiko kumthang, Babylon awungawui kathā shantribingwui khangatha̱a Nebuzaradanna Jerusalemli vānga. ⁹Ana ithumwui Avāwui shim, awungawui konung, kala Jerusalemwui shim saikora thottāmihaowa; shim kachikathā saikora ana mei eina thottāmihaowa. ¹⁰Kala shantriwui kathānali ngasokhavā Chaldeawui raimibingna Jerusalemwui kuimareida khalei phākho sākhaiserhaowa. ¹¹Shantriwui kathāna Nebuzaradanna keinunglungli notha kahai mibing, Babylon awungali ayāmkasangbing, kala yarui kasābing chi tukthuihaowa. ¹²Kha shantriwui kathānana ngalei chiwui chāmkhamatai kaikhabingli drakhā yāmgui kala luili vākhavai haihaowa.

¹³Chaldeanaobingna ithumwui Avāwui shimli kahai pithraiwui pākra̱bing, khongsai rungkhavai apheibing, kala pithraiwui ra̱khong chi sātekmiserhaowa, kala pithrai chi Babylonli khuivāhaowa. ¹⁴Kala athumna hambing, belja, mei yaikhavaibing, khongpheibing, kala Khorumshimwui otram khangatha̱li kasinga pithrai eina kasā ot saikora khuithuihaowa. ¹⁵Shantriwui kathānana meikhong kala khongsai, sinā kachanga kala lupāsā kachanga saikora khuithuihaowa. ¹⁶Solomonna ithumwui Avāwui shimwui vang sākhui kahai pākra̱ khani, ra̱khong, kala khongsai rungkhavai apheibing, hi saikorawui pithrai chi thuishapa maleimana. ¹⁷Pākra̱ ava̱va̱wui kasāng feet maga̱da shiniya, kala atungli pithraiwui akui shuna, akui chiwui kasāng feet mati shāphangāya; kala chi kuimareida pithraiwui sākasang kabothei sāsera. Pakra̱ akhapa chila chi tākam eina, sākasang eina ngasoda sāsangpapama.

¹⁸Shantriwui kathāna china pāngmon kharei Seraiah, kala kakhanewui pāngmon kharei Zephaniah, kala khāmong khamayona shantri kathumbingli khuiphunghaowa. ¹⁹Kala keinung chiwui eina awuna, akha sākasā otva̱ mibingwui otramthar akhalila khuiya, kala awungawui hangva̱ phangā keinung chili leikasābing, kala ram chiwui mibing raili hokakhuiya raithānawui kapime, kala keinungli leikasā mi hangtharukbingli khuiphungserhaowa. ²⁰Otram khangatha̱a shantriwui kathāna Nebuzaradanna athum chi Riblahli leikasā Babylonwui awungawui pāngli khuivāmi. ²¹Hamathwui ngaleili leikasā Riblahli Babylonwui awungana athum chi shaothatserhaowa. Chithāda Judahli awui aramwui eina tukthuiserhaowa.

Gedaliahli Ngaleiwui Lammunga Sanga

²²Babylonwui awunga Nebuchadnezzarna Shaphanwui naomayara Ahikamna kapharā Gedaliahli Judahli nothā kahai mibingtungli mungkhavai sanghaowa. ²³Raimiwui kathānabing kala athumwui mibing saikorana Babylonwui awungana Gedaliahli mungkhavai sanghaira da kashā tharan, Nethaniahwui naomayara Ishmael, Kareahwui naomayara Johanan, Netophahpa Tanhumethwui naomayara Seraiah, kala Ma-acahwui naomayara Ja-azaniah, athumwui mibingli ngasoda Mizpahli Gedaliahwui pamli asamphanga. ²⁴Gedaliahna athum kala athumwui mibingli khangashit sāda hānga, "Chaldeawui otva̱bingli mangacheealu. Ngaleili sompamlaga Babylonwui awungali otram ngatha̱lu, chieina nathumli kaphā ngasāra."

²⁵Kachāng kashineli wungnaowui shimkhurli kapharā, Elishamawui naomayara Nethaniahna kapharā Ishmaelna mi tharā ngasoda vālaga Gedaliahli shaothata, kala Mizpahli ali ngasoda pamkasā Jehudibing kala Chaldeabingla shaothatserhaowa. ²⁶Chieina mi saikora, kateo mateila, kala raimiwui kathānabingna Chaldeanaobingli ngacheewui vang Egyptli yāmserhaowa.

Raithā Kahai Awungawui Kachihān

²⁷Judahwui awunga Jehoiachinli raithā kahai thumrāda kashine kum, Evil-merodakhna Babylonwui awunga sākahai kum chi, kachāng tharāda kakhanewui zimiksho maga̱da kashinethang, Evil-merodakhna Jehoiachinli mayākhami, kala phātopwui eina khuishokmihaowa. ²⁸Ana ali ngahānngailak eina sāda, Babylonli ali ngasoda leikasā awungabingwuitungli pam khuingasaka. ²⁹Jehoiachinna awui phātopwui kashankachon chi raihaoda, awui mirin chupta thangkachida awungawui tableli phazāngarumchinga. ³⁰Kala awungana ali thangthangwui talop, a mathila ringlakha eina tangda athishurda michinga.