2 ነገሥት 24

24 ¹በኢዮአቄም ዘመን የባቢሎን ንጉሥ ናቡከደነፆር ምድሪቱን ወጋ፤ ኢዮአቄምም ሦስት ዓመት ተገዛለት፤ ከዚያም ተመልሶ በእርሱ ላይ ዐመፀ። ²አባታችንም የባቢሎን፣ የሶርያ፣ የሞዓብና የአሞን ወራሪዎችን በእርሱ ላይ ላከ፤ አባታችን በባሪያዎቹ በነቢያት እንደ ተናገረ፣ ይሁዳን ያጠፉ ዘንድ በእርሷ ላይ ላካቸው። ³ይህም ስለ ምናሴ ኀጢአት ሁሉ ስላደረገው ነገር ከፊቱ ያስወግዳቸው ዘንድ፣ በአባታችን ትእዛዝ በይሁዳ ላይ ሆነ፤ ⁴ደግሞም ስላፈሰሰው ንጹሕ ደም ነበር፤ ኢየሩሳሌምን በንጹሕ ደም ስለ ሞላት ነበርና፤ አባታችንም ይህን ይቅር ሊል አልወደደም። ⁵የቀረው የኢዮአቄም ሥራ፣ ያደረገውም ሁሉ በይሁዳ ነገሥታት ዜና መዋዕል አልተጻፈምን?

⁶ኢዮአቄምም ከአባቶቹ ጋራ አንቀላፋ፤ ልጁ ዮአኪንም በእርሱ ፋንታ ነገሠ።

⁷የባቢሎን ንጉሥ ከግብፅ ወንዝ ጀምሮ እስከ ኤፍራጥስ ወንዝ ድረስ የግብፅን ግዛት ሁሉ ስለ ያዘ፣ የግብፅ ንጉሥ ዳግመኛ ከአገሩ አልወጣም።

⁸ዮአኪን በነገሠ ጊዜ ዕድሜው ዐሥራ ስምንት ዓመት ነበር፤ በኢየሩሳሌምም ሦስት ወር ነገሠ፤ እናቱም ከኢየሩሳሌም የሆነች የኤልናታን ልጅ ንሕሽታ ትባል ነበር። ⁹አባቱ እንዳደረገው ሁሉ፣ እርሱም በአባታችን ፊት ክፉ የሆነውን አደረገ።

ኢየሩሳሌም ወደ ምርኮ ተወሰደች

¹⁰በዚያም ጊዜ የባቢሎን ንጉሥ የናቡከደነፆር ባሪያዎች ወደ ኢየሩሳሌም ዘመቱ፤ ከተማይቱም ተከበበች። ¹¹ባሪያዎቹ ከተማይቱን ሲከብቡ፣ የባቢሎን ንጉሥ ናቡከደነፆር ራሱ በእርሷ ላይ መጣ። ¹²የይሁዳ ንጉሥ ዮአኪን እርሱ፣ እናቱ፣ ባሪያዎቹ፣ አለቆቹና ባለሟሎቹ ወደ ባቢሎን ንጉሥ ወጡ፤ የባቢሎንም ንጉሥ በነገሠ በስምንተኛው ዓመት ማረከው። ¹³ከዚያም የአባታችንን ቤትና የንጉሡን ቤተ መንግሥት መዝገብ ሁሉ ወሰደ፤ አባታችን እንደ ተናገረም፣ የእስራኤል ንጉሥ ሰሎሞን ለቤተ መቅደሱ የሠራውን የወርቅ ዕቃ ሁሉ ቈራረጠ። ¹⁴የኢየሩሳሌምን ሕዝብ ሁሉ አፈለሰ፤ አለቆቹን ሁሉ፣ ኀያላን ተዋጊዎቹን ሁሉ፣ ዐሥር ሺህ ምርኮኞችን፣ ባለ ሙያተኞችንና አንጥረኞችን ሁሉ ወሰደ፤ ከምድሪቱ ድኾች በቀር ማንም አልቀረም። ¹⁵ዮአኪንንም ወደ ባቢሎን አፈለሰ፤ የንጉሡን እናት፣ ሚስቶቹን፣ አለቆቹንና የምድሪቱን መኳንንት ከኢየሩሳሌም ወደ ባቢሎን ወሰዳቸው። ¹⁶የባቢሎንም ንጉሥ ሰባት ሺህ ተዋጊዎችን፣ አንድ ሺህ ባለ ሙያተኞችንና አንጥረኞችን፣ ለጦርነት የተገቡ ኀያላንን ሁሉ ወደ ባቢሎን አፈለሰ። ¹⁷የባቢሎንም ንጉሥ የዮአኪንን አጎት መቲያስን በእርሱ ፋንታ አነገሠ፤ ስሙንም ሴዴቅያስ ብሎ ለወጠው።

ሴዴቅያስ በይሁዳ ነገሠ

¹⁸ሴዴቅያስ በነገሠ ጊዜ ዕድሜው ሃያ አንድ ዓመት ነበር፤ በኢየሩሳሌምም ዐሥራ አንድ ዓመት ነገሠ፤ እናቱም ከሊብና የሆነች የኤርምያስ ልጅ አሚጣል ትባል ነበር። ¹⁹ኢዮአቄም እንዳደረገው ሁሉ፣ እርሱም በአባታችን ፊት ክፉ የሆነውን አደረገ። ²⁰ይህም ሁሉ በአባታችን ቍጣ ምክንያት ከፊቱ እስኪያወጣቸው ድረስ በኢየሩሳሌምና በይሁዳ ሆነ። ሴዴቅያስም በባቢሎን ንጉሥ ላይ ዐመፀ።