2 Kings 24

24 ¹For Jehoiakim time, Nebuchadnezzar king of Babylon attack di land; Jehoiakim serve am for three years, den e turn rebel against am. ²Den our Papa send Babylon, Aram, Moab, and Ammon raiders come against am; e send dem come against Judah to spoil am, just as our Papa don talk through im servants, di prophets. ³Dis one happen to Judah as our Papa command, to comot dem from im presence because of Manasseh im sins—everything wey e do, ⁴and also because of di innocent blood wey e pour, for e don full Jerusalem with innocent blood wey our Papa no go fit forgive. ⁵Di oda things wey Jehoiakim do, everything wey e do, dem no write am for di book of di history of Judah kings?

⁶So Jehoiakim rest with im ancestors, and Jehoiachin im son become king for im place.

⁷Egypt king no comot from im land again, because Babylon king don collect all di territory wey belong to Egypt, from di Brook of Egypt reach di River Euphrates.

⁸Jehoiachin be eighteen years when e become king, and e rule for three months for Jerusalem; im mama na Nehushta, di pikin of Elnathan, from Jerusalem. ⁹E do wetin be evil for di eyes of our Papa, just as im papa don do.

Dem Carry Jerusalem Go Exile

¹⁰For dat time, di servants of Nebuchadnezzar king of Babylon march go Jerusalem, and dem surround di city. ¹¹Nebuchadnezzar king of Babylon imself come against di city while im servants dey surround am. ¹²Jehoiachin king of Judah comot go meet Babylon king—im, im mama, im servants, im officials, and di people wey dey serve for im court—and Babylon king carry am go captivity, for di eighth year of im reign. ¹³E carry comot from there all di treasures of our Papa house and of di royal palace, and e cut up all di gold vessels wey Solomon king of Israel make for di temple, just as our Papa talk. ¹⁴E carry all Jerusalem go exile: all di officials, all di strong soldiers—10,000 captives—and all di craftsmen and di people wey dey work iron. Na only di poorest people for di land remain. ¹⁵E carry Jehoiachin go exile for Babylon with di king mama, im wives, im officials, and di leading men of di land, e carry dem from Jerusalem go Babylon. ¹⁶Di king of Babylon carry go exile for Babylon all di 7,000 fighting men, 1,000 craftsmen and people wey dey work iron, all of dem strong, and fit for war. ¹⁷Di king of Babylon make Jehoiachin im uncle, Mattaniah, king for im place, and e change im name to Zedekiah.

Zedekiah Rule for Judah

¹⁸Zedekiah become king when e be twenty-one years and e rule for eleven years for Jerusalem; im mama na Hamutal, di pikin of Jeremiah of Libnah. ¹⁹E do wetin be evil for di eyes of our Papa, just as Jehoiakim don do. ²⁰Because of di anger of our Papa, all dis one happen for Jerusalem and Judah, until e comot dem from im presence. Den Zedekiah rebel against Babylon king.