ኢዮኣቄም ኣብ ባቢሎን ዓመፀ

ኢዮኣቄም ዓመፀ፥ ወረርቲ ድማ መፁ፤ እቲ ፅሑፍ ከዓ ነቲ ምኽንያት ይነግር፦ እቲ ኣቦና ይቕረ ኺብለሉ ዘይፈተወ ንፁህ ደም ምናሴ። ናቡከደነፆር ንኢየሩሳሌም ከበባ፤ ኢዮኣኪን ድማ ኢዱ ሃበ፥ ምስ ሹመኛታትን ፀረብትን ወርቂ ቤተ መቕደስን ከዓ ተፈለሰ። ብዘይካ እቶም ኣዝዮም ድኻታት ሓደ እኳ ኣይተረፈን፥ ኣብ ትሕቲ ሴዴቅያስ ተባሂሉ ዝተሰመየ ኣኮኡ።

ምዕራፍ 24።

ብዘመን ኢዮኣቄም ናቡከደነፆር ንጉስ ባቢሎን ናብታ ምድሪ ደዪቡ ወረራ፤ ኢዮኣቄም ድማ ሰለስተ ዓመት ተገዝኦ፤ ሽዑ ተመሊሱ ኣብ ልዕሊኡ ዓመፀ። ሽዑ ኣቦና ወረርቲ ባቢሎናውያንን ሶርያውያንን ሞኣባውያንን ኣሞናውያንን ናብኡ ሰደደ፤ ከምቲ ኣቦና ብኣገልገልቱ ነቢያት ዝበሎ፥ ንይሁዳ ምእንቲ ኸጥፍእዋ ናባ ሰደዶም። እዙይ ብትእዛዝ ኣቦና ኣብ ይሁዳ ኮነ፤ ብሰሪ ሓጢኣት ምናሴ፥ እቲ ዝገበሮ ዅሉ፥ ካብ ቅድሚ ገፁ ምእንቲ ኼርሕቖም እዩ። ብሰሪ እቲ ዘፍሰሶ ንፁህ ደምውን እዩ፤ ንኢየሩሳሌም ብንፁህ ደም መሊእዋ ነበረ፥ ኣቦና ድማ ይቕረ ኺብለሉ ኣይፈተወን። እቲ ዝተረፈ ናይ ኢዮኣቄም ነገርን እቲ ዝገበሮ ዅሉን፥ ኣብ መፅሓፍ ታሪኽ ነገስታት ይሁዳ ዝተፅሓፈዶ ኣይኮነን?

ኢዮኣቄም ድማ ምስ ኣቦታቱ ደቀሰ፤ ክንድኡ ኸዓ ወዱ ኢዮኣኪን ነገሰ።

ንጉስ ባቢሎን ካብ ሩባ ግብፂ ክሳዕ ሩባ ኤፍራጥስ ዝነበረ ዅሉ ግዝኣት ንጉስ ግብፂ ስለ ዝወሰዶ፥ ንጉስ ግብፂ ደጊም ካብ ምድሩ ኣይወፀን።

ኢዮኣኪን ኪነግስ እንተሎ ወዲ ዓሰርተ ሸሞንተ ዓመት ነበረ፤ ኣብ ኢየሩሳሌም ድማ ሰለስተ ወርሒ ነገሰ፤ እኖኡ ነሑሽታ ጓል ኤልናታን ናይ ኢየሩሳሌም ነበረት። ከምቲ ኣቦኡ ዝገበሮ፥ ኣብ ቅድሚ ኣቦና ክፉእ ገበረ።

ኢየሩሳሌም ናብ ምርኮ ተወስደት

በቲ ጊዜ እቲ ኣገልገልቲ ናቡከደነፆር ንጉስ ባቢሎን ናብ ኢየሩሳሌም ደየቡ፤ እታ ኸተማ ኸዓ ተኸበበት። ናቡከደነፆር ንጉስ ባቢሎን ባዕሉ ኸዓ፥ ኣገልገልቱ ኣብ ዝኸብብዋ ዝነበሩ ጊዜ፥ ናብታ ኸተማ መፀ። ኢዮኣኪን ንጉስ ይሁዳ ድማ ንሱን እኖኡን ኣገልገልቱን ሹመኛታቱን ኣሕሉቑን ናብ ንጉስ ባቢሎን ወፁ፤ ንጉስ ባቢሎን ድማ ኣብ መበል ሸሞንተ ዓመት መንግስቱ ማረኾ። ካብኡ ድማ ንዅሉ መዛግብቲ ቤት ኣቦናን ንመዛግብቲ ቤተ መንግስትን ወሰደ፤ ከምቲ ኣቦና ዝበሎ ድማ ነቲ ሰሎሞን ንጉስ እስራኤል ንቤተ መቕደስ ዝገበሮ ዅሉ ኣቑሑ ወርቂ ቘራረፆ። ንብዘላ ኢየሩሳሌም፥ ንዅሎም ሹመኛታትን ንዅሎም ሓያላት ጀጋኑን፥ ዓሰርተ ሽሕ ምሩኻት፥ ንዅሎም ፀረብትን ሰብ ሞያን ድማ ፈለሰ፤ ብዘይካ እቶም ኣዝዮም ድኻታት ሰብ እታ ምድሪ፥ ሓደ እኳ ኣይተረፈን። ንኢዮኣኪን ናብ ባቢሎን ፈለሶ፤ ንእኖ ንጉስን ነንስቱን ሹመኛታቱን ንዓበይቲ እታ ምድርን ድማ፥ ካብ ኢየሩሳሌም ናብ ባቢሎን ማረኾም። ንጉስ ባቢሎን ድማ ንዅሎም ሸውዓተ ሽሕ ተዋጋእቲ ሰባትን ሽሕ ፀረብትን ሰብ ሞያን፥ ኵሎም ሓያላትን ናብ ውግእ ዝወፁን፥ ናብ ባቢሎን ፈለሶም። ንጉስ ባቢሎን ድማ ንሓወቦ ኢዮኣኪን ማታንያስ ኣብ ክንድኡ ኣንገሶ፤ ስሙ ኸዓ ናብ ሴዴቅያስ ለወጠ።

ሴዴቅያስ ኣብ ይሁዳ ነገሰ

ሴዴቅያስ ኪነግስ እንተሎ ወዲ ዕስራን ሓደን ዓመት ነበረ፤ ኣብ ኢየሩሳሌም ከዓ ዓሰርተ ሓደ ዓመት ነገሰ፤ እኖኡ ሓሙጣል ጓል ኤርሚያስ ናይ ልብና ነበረት። ከምቲ ኢዮኣቄም ዝገበሮ፥ ኣብ ቅድሚ ኣቦና ክፉእ ገበረ። እዙይ ኵሉ ብሰሪ ቍጥዓ ኣቦና ኣብ ኢየሩሳሌምን ኣብ ይሁዳን ኮነ፤ ክሳዕ ካብ ቅድሚ ገፁ ዝደርበዮም። ሴዴቅያስ ድማ ኣብ ንጉስ ባቢሎን ዓመፀ።